¹ Abasaiza ba Efulayimu ni bamukoba nti kiki ekikukozeserye ife otyo, obutatweta bwe wayabire okulwana n'e Midiyaani? Ni batongana inu naye. ² N'a bakobere nti nze kye nkolere watyanu kiki okukyekankanya na imwe? Eizabbibu Efulayimu gyakungwire ng'a iramu tigisinga egyo obusa Abiyezeeri gy'akungwire? ³ Katonda agabwire mu mukono gwanyu abalangira b'e Midiyaani, Olebu n'o Zeebu: era nze nandisoboiire kukola ki okukyenkanyankaaya naimwe? Awo obusungu bwabwe kaisi ni bwikaikana gy'ali, bwe yamalire okutumula atyo. ⁴ Gidyoni n'a tuuka ku Yoludaani, n'a somoka, iye n'a basaiza bisatu Ababbaire naye, nga bakoowere, naye nga basengererya. ⁵ N'a koba abasaiza ab'o mu Sukosi nti mbeegayiriire, bawe emigaati abantu abansengereirye; kubanga bakoowere, era nsengererya Zeba n'o Zalumunna, bakabaka be Midiyaani. ⁶ Abalangira b'e Sukosi ni batumula nti engalo gya Zeba n'o Zalumuna giri mu mukono gwo atyanu, ife okuwa eigye lyo emigaati? ⁷ Gidyoni n’atumula nti Kale Mukama bw'alimala okugabula Zeba n'o Zalumunna mu mukono gwange, kaisi ni nsika omubiri gwanyu n'a mawa ag'o mu nsiko n'e mifuwanduzi. ⁸ N'avaayo n'a yambuka e Penueri, n'abakoba atyo: abasaiza ab'o mu Penueri ni bamwiramu ng'a basaiza ab'o mu Sukosi bwe bairiremu. ⁹ N'a koba abasaiza ab'o mu Penueri boona nti bwe ndiirawo emirembe, ndimenyamenya ekigo kino. ¹⁰ Era Zeba n'o Zalumunna babbaire mu Kalukoli, n'e igye lyabwe awamu nabo, abasaiza nga mutwalo mu nkumi itaanu, bonabona abaafiikirewo ku igye lyonalyona ery'a baana b'e buvaisana: kubanga abasaiza abasowolanga ebitala babbaire bafiire kasiriivu mu mitwaalo ibiri. ¹¹ Gidyoni n'a yambukira mu ngira yabo abatyama mu weema ku luuyi olw'e buvaisana olw'e Noba n'e Yogubeka, n'a kubba eigye: kubanga eigye lyabbaire tirimanyiriire. ¹² Zeba n'o Zalumuna ni bairuka; n'a basengererya; n'a kwata bakabaka ba Midiyaani bombiri, Zeba n'o Zalumunna, n'atiisya eigye lyonalyona. ¹³ Gidyoni mutaane wa Yowaasi n'a irawo mu ntalo awayambukirwa mu Keresi. ¹⁴ N'akwata omuvubuka ku basaiza ab'o mu Sukosi, n'a mubuulirirya: n'a mutegeeza abalangira b'e Sukosi bwe baafaanana n'a bakaire baayo, abasaiza nsanvu mu musanvu. ¹⁵ N'a iza eri abasaiza ab'o mu Sukosi, n'a tumula nti Mubone Zeba n'o Zalumuna, kwe mwayemere okunduulira nga mutumula nti Engalo gya Zeba n'o Zalumunna giri mu mukono gwo atyanu, ife okubawa emigaati abasaiza bo abakoowere? ¹⁶ N'atwala abakaire ab'e kibuga, n'a irira amawa ag'o mu nsiko n'e mifuwanduzi, n'ayegeresya nabyo abasaiza ab'o mu Sukosi. ¹⁷ N'amenyamenya ekigo eky'e Penueri, n'aita abasaiza ab'o mu kibuga. ¹⁸ Awo kaisi n'a koba Zeba n'o Zalumuna nti Abasaiza be mwaitiire e Taboli babbaire bafaanana batya? Ni bairamu nti iwe nga bw'oli boona bwe baali; buli mumu yafaanaine abaana ba kabaka. ¹⁹ N'a tumula nti babbaire Bagande bange, abaana ba mawange: nga Mukama bw'ali omulamu, singa mwabawonyerye okufa, tinandibaitire imwe. ²⁰ N'akoba Yeseri omuberyeberye we nti Golokoka obaite. Naye omuvubuka oyo n'a tasowola kitala kye: kubanga yatiire, kubanga yabbaire akaali muvubuka. ²¹ Zeba n'o Zalumunna kaisi ni batumula nti Golokoka iwe otugweku: kubanga omusaiza nga bw'ali, n'a maani ge bwe gali gatyo Gidyoni n'a golokoka n'a ita Zeba n'o Zalumunna, n'atwala emyezi egyabbaire ku makoti g'e ŋamira gyabwe. ²² Abasaiza ba Isiraeri kaisi nu bakoba Gidyoni nti tufuge iwe n'o mutaane wo era n'o mwana wa mutaane wo: kubanga otulokoire mu mukono gwa Midiyaani. ²³ Gidyoni n'a bakoba nti Nze tinjaba kubafuga, so n'o mutaane wange tayaba kubafuga: Mukama Niiye yabafuganga. ²⁴ Gidyoni n'a bakoba nti mbaire ntaka okubasaba, mumpe buli muntu empeta egy'o mu matu gye yanyagire. (Kubanga babbaire balina empeta egy'o mu matu egye zaabu, kubanga Baisimaeri.) ²⁵ Ne bairamu nti twagiwa, ti lw'e mpaka. Ne baalawo ekivaalo, ni basuulaku buli muntu empeta egy'o mu matu gye yanyagire. ²⁶ N'o buzito bw'e mpeta egy'o mu matu egya zaabu gye yasabire bwabbaire sekeri gy'e zaabu lukumi mu lusanvu; obutateekaku myezi, ne by'o kulengeiza, n'e bivaalo by'e fulungu bakabaka be Midiyaani bye babbaire bavaire, era obutateekaku miguufu egyabbaire mu makoti g'e ŋamira gyabwe. ²⁷ Gidyoni n'a bikozesya ekanzo, n'a giteeka mu kibuga kye, mu Ofula: ne Isiraeri yenayena ni baaba ne bagisengererya eyo okwenda nayo: n'e fuuka kyambika eri Gidyoni n'eri enyumba ye. ²⁸ Awo Midiyaani n'a jeemulwa abaana ba Isiraeri, so tebaayimusirye ate mitwe gyabwe. Ensi n'e wumulira emyaka ana mu mirembe gya Gidyoni. ²⁹ Yerubbaali mutaane wa Yowaasi n'a yaba n'abba mu nyumba ye ye. ³⁰ Era Gidyoni yabbaire n'a bataane be, be yazaire abaviire mu ntumbu gye nsanvu: kubanga yakweire Abakali bangi. ³¹ N'o muzaana we eyabbaire Sekemu yena yamuzaaliire omwana w'o bwisuka, n'a mutuuma eriina Abimereki. ³² Gidyoni mutaane wa Yowaasi n'afa ng'a malire okukairiwa okusa, ni bamuziika, mu ntaana ya Yowaasi itaaye, mu Ofula eky'Ababiezeri. ³³ Awo olwatuukire Gidyoni bwe yamalire okufa amangu ago abaana ba Isiraeri ni bakyuka ate, ne baaba beenda okusengererya Babaali, ni bafuula Baaluberisi katonda waabwe. ³⁴ Abaana ba Isiraeri ni bataijukira Mukama Katonda waabwe, eyabawonyerye mu mukono gw'a balabe baabwe bonabona ku njuyi gyonagyona: ³⁵ so tibaakolere bye kisa nyumba ya Yerubbaali, niiye Gidyoni, ng'o busa bwonabwona bwe bwabbaire bwe yakolere eri Isiraeri.