¹ Awo Yerubbaali, niiye Gidyoni, n'a bantu bonabona Ababbaire naye, ni bagolokoka mu makeeri, ni basiisira ku luzi Kalodi: n'o lusiisira lwa Midiyaani lwabbaire ku luuyi lwabwe olw'obukiika obugooda, ku mbali kw'o lusozi Mole, mu kiwonvu. ² Mukama n'a koba Gidyoni nti Abantu abali naiwe bayingire obungi nze okuwa Abamidiyaani mu mukono gwabwe. Isiraeri aleke okuneenyumiririziryaku ng'atumula nti Omukono gwange nze niigwo gundokoire. ³ Kale atyanu yaba olangire mu matu g'a bantu nti buli atya atengera, aireyo ave ku lusozi Gileyaadi. Ni wairayo ku bantu emitwalo ibiri mu nkumi ibiri; ne wasigalawo mutwalo. ⁴ Mukama n'a koba Gidyoni nti abantu bakaali bayingire obungi; baserengetye ku maizi; nzena nabatangira eyo: awo olwatuuka eyo gwe nakukoba nti ono yayaba naiwe, niiye yayaba naiwe; era buli gwe nakukoba nti Ono tayabe naiwe, niiye atayabe naiwe. ⁵ Awo n'a serengetya abantu ku maizi: Mukama n'a koba Gidyoni nti Buli eyakomba ku maizi n'o lulimi, ng'e mbwa bw'e komba, oyo gwewayawulamu; era atyo buli eyafukamira ku makumbo ge okunywa. ⁶ N'o muwendo gw'abo abakomba n'o lulimi, nga bateekere engalo ku mumwa, babbaire abasaiza bisatu: naye abantu abandi bonabona ne bafukamira ku makumbo gaabwe okunywa amaizi. ⁷ Mukama n'a koba Gidyoni nti Nabalokola n'a basaiza ebikumi bisatu abakombere n'o lulimi, ni ngabula Abamidiyaani mu mukono gwo: era abantu bonabona beirireyo buli muntu mu kifo kye. ⁸ Awo abantu ne batwala ebyokulya mu ngalo gyabwe, n'a makondeere: n'a sindika abasaiza bonabona aba Isiraeri buli muntu mu weema ye; yeena n'abba n'a basaiza abo ebisatu: n'o lusiisira lw'e Midiyaani lwabbaire wansi we mu kiwonvu: ⁹ Awo olwatuukire obwire obwo Mukama n'a mukoba nti golokoka, oserengete mu lusiisira; kubanga ndugabwire mu mukono gwo. ¹⁰ Naye oba ng'otya okuserengeta; yaba n'o Pula omwidu wo oserengete mu lusiisira. ¹¹ era wawulira bye batumula; emikono gyo kaisi ni gibba n'a maani okuserengeta mu lusiisira: Awo n'a serengeta n'o Pula omwidu we ne bayingira mu basaiza Ababbaire n'e by'okulwanisya ababbaire mu lusiisira ku nkomerero yaalwo. ¹² N'Abamidiyaani n'Abamaleki n'a baana bonabona ab'e buvaisana babbaire bateekeibwetekeibwe mu kiwonvu ng'e nzige okubba abangi; n'e ŋamira gyabwe tegyabalikikire, ng'o musenyu oguli ku itale ly'e nyanza okubba enyingi. ¹³ Awo Gidyoni bwe yatuukire, bona, nga waliwo omusaiza akobera mwinaye ekirooto n'a tumula nti bona, nalootere ekirooto, era, bona, omugaati ogwa sayiri ne gugwa mu lusiisira lw'e Midiyaani, ni guyingira mu weema, ni gugikubba n'egwa, ni gugivuunika, eweema n'e galamira bugalamiri. ¹⁴ Mwinaye n'a iramu n'a tumula nti ekyo kitala kya Gidyoni mutaane wa Yowaasi omusaiza wa Isiraeri so ti kindi mu mukono gw'oyo Katonda mw'agabwire Midiyaani n'e igye lyonalyona. ¹⁵ Awo olwatuukire Gidyoni bwe yamuwuliire ng'a buulira ekirooto n'okutegeeza kwakyo, n'a sinza; n'a irayo mu lusiisira lwa Isiraeri n'a tumula nti mugolokoke, kubanga Mukama agabwire mu mukono gwanyu eigye lya Midiyaani. ¹⁶ N'ayawulamu abasaiza babbaire bisatu n'abafuula ebisinde bisatu, n'abakwatisya bonabyona amakondeere mu ngalo gyabwe, n'e nsuwa enkalu, ebitawuliro nga biri mu nsuwa. ¹⁷ N'a bakoba nti mubonere ku nze; mwena mukole mutyo: era, bona, bwe natuukire ku nkomerero y'o lusiisira, awo nze nga bwe nakolere, mweena mwakola mutyo. ¹⁸ Nze bwe nafuuwire eikondeere, nze ni bonabona Ababbaire nanze, mweena kaisi ni mufuuwa amakondeere ku njuuyi gyonagyona egy'o lusiisiira lwonalwona, ni mutumula nti ba Mukama era ba Gidyoni. ¹⁹ Awo Gidyoni n'a basaiza kikumi ababbaire naye ne batuuka ku nkomerero y'o lusiisira ekisisimuko ekya wakati nga kyakaiza kitandike nga bakateekawo abakuumi ne bafuuwa amakondeere, ni baatikya ensuwa, egyabbaire mu ngalo gyabwe. ²⁰ Ebibiina ebisatu ni bafuuwa amakondeere, ni baatikya ensuwa nga bakwaite ebitawuliro n'e mikono gyabwe emigooda, n'a makondeere n'e mikono gyabwe emiryo bafuuwe: ne batumulira waigulu nti ekitala kya Mukama era kya Gidyoni. ²¹ Ni bemerera buli muntu mu kifo kye nga beetooloola olusiisira: eigye lyonalyona ne riruuka; ne batumulira waigulu, ne babairukisya. ²² Ne bafuuwa amakondeere bisatu, Mukama n'a lwanisya buli muntu ekitala kye okusumita mwinaye era n'e igye lyonalyona: eigye ni liruuka okutuuka ku Besusita mu ngira y'e Zerera, okutuuka ku nsalo ye Aberumekola ku mbali kw'e Tabbasi. ²³ Abasaiza ba Isiraeri ni bakuŋaanyizibwa okuva mu Nafutaali n'o mu Aseri n'o mu Manase yonayona, ne basengererya Midiyaani, ²⁴ Gidyoni n'a tuma ababaka okubuna ensi yonayona eya Efulayimu ey'e nsozi nga batumula nti mwize muserengete ku Midiyaani, mubasooke okwekwata amaizi okutuuka ku Besubala, niiye Yoludaani: Awo abasaiza bonabona aba Efulayimu ni bakuŋaanyizibwa, ni beekwata amaizi okutuuka ku Besubala, niiye Yoludaani. ²⁵ Ni bakwata abalangira ba Midiyaani bombiri, Olebu ne Zeebu; ne baitira Olebu ku ibbaale lya Olebu, n'o Zeebu ni bamwitira ku isogolero lya Zeebu, ni batumulira Midiyaani: ni baleetera Gidyoni emitwe gya Olebu n'o Zeebu emitala wa Yoludaani.