¹ Abaana ba Isiraeri ni bakola ekyabbaire mu maiso ga Mukama ekibbiibi: Mukama n'a bagabula mu mukono gwa Midiyaani emyaka musanvu. ² Omukono gwa Midiyaani ni guwangula Isiraeri: era olwa Midiyaani abaana ba Isiraeri kye baaviire beekolera obuyu obuli ku nsozi n'e mpuku n'e bigo. ³ Awo olwatuukire Isiraeri bwe yamalanga okusiga, Abamidiyaani ni bayambukanga n'Abamaleki n'a baana ab'e buvaisana, n'abo babayambukiireku; ⁴ ne basiisira ewaabwe, ni bazikirirya ebibala by'e itakali, okutuusya bw'otuuka e Gaaza so tebaalekere yo ky'okulya mu Isiraeri, waire entama, waire ente, waire endogoyi. ⁵ Kubanga bayambukiire wamu n'e nte gyabwe n'e weema gyabwe, bayingiranga ng'e nzige okubba abangi; ibo era n'e ŋamira gyabwe tibyabalikikire ni bayingira mu nsi okugizikirirya. ⁶ Isiraeri n'ajeezebwa inu olwa Midiyaani; abaana ba Isiraeri ni bakungira Mukama. ⁷ Awo olwatuukire, abaana ba Isiraeri bwe bakungiire Mukama olwa Midiyaani, ⁸ Mukama n'a tuma, nabbi eri abaana ba Isiraeri: n'a bakoba nti Atyo bw'atumula Mukama, Katonda wa Isiraeri, nti nabatoire mu Misiri ni mbaniinisya, era na batoire mu nyumba y'o bwidu; ⁹ era nabawonyerye mu mukono gw'Abamisiri, n'o mu mukono gw'abo bonabona ababajooga, ni mbabbinga mu maiso ganyu, ne mbawa ensi yaabwe; ¹⁰ ne mbakoba nti nze ndi Mukama Katonda wanyu; timutyanga bakatonda b'Abamoli, bemutyamira mu nsi yaabwe: naye timuwuliire eidoboozi lyange. ¹¹ Malayika wa Mukama n'a iza, n'a tyama wansi w'o mwera, ogwabbaire mu Ofula, niikyo kyabbaire ekya Yowaasi Omwabiezeri: n'o mutaane we Gidyoni yabbaire awuula eŋaanu mu isogolero agikise Abamidiyaani. ¹² Malayika wa Mukama n'a mubonekera, n'a mukoba nti Mukama ali wamu naiwe, iwe omusaiza ow'a maanni omuzira. ¹³ Gidyoni n'a mukoba nti Ai mukama wange, oba nga Mukama ali wamu naife, kale ekitubeeseryeku ebyo byonabyona kiki? era ebikolwa bye byonabyona eby'e kitalo biri waina bazeiza baisu bye batukobeireku, nti Mukama teyatutoire mu Misiri? naye watyanu Mukama atuswire, atugabwire mu mukono gwa Midiyaani. ¹⁴ Mukama n'a mulingirira n'a tumula nti Yaba n'a maani go gano, olokole Isiraeri mu mukono gwa Midiyaani: ti ninze nkutumire? ¹⁵ N'a mukoba nti Ai Mukama wange, Isiraeri ndimulokolera ku ki? Bona, bagande bange niibo basinga okubba abaavu mu Manase, nzena ndi mutomuto mu nyumba ya itawange. ¹⁶ Mukama n'a mukoba nti Mazima ndibba wamu naiwe, era olikubba Abamidiyaani ng'o muntu omumu. ¹⁷ N'a mukoba nti oba nga atyanu mboine ekisa mu maiso go, kale ndaga akabonero nga niiwe oyo atumula nanze. ¹⁸ Tova wano, nkwegayiriire, okutuusya lwe naiza gy'oli, ne nfulumya ekirabo kyange, ni nkiteeka mu maiso go. N'a tumula nti nabba wano okutuusya lwe wairawo. ¹⁹ Gidyoni n'a yingira, n'ateekateeka omwana gw'e mbuli, n'e migaati egitazimbulukuswa n'e efa ey'o bwita: enyama n'agiteeka mu kiibo, n'a maizi gaayo n'a gafuka mu kibya, n'a bimuleetera wansi w'o mwera, n'a bimuwa. ²⁰ Malayika wa Mukama n'a mukoba ati Iriira enyama n'e migaati egitazimbulukuswa obiteeke ku ibbaale lino, ofuke amaizi g'e nyama. N'a kola atyo. ²¹ Awo malayika wa Mukama n'a golola ekikolo ky'o mwigo ogwabbaire mu mukono gwe, n'a koma ku nyama n'o ku migaati egitazimbulukuswa; omusyo ni guva mu ibbaale ni guniina, ne gumalawo enyama n'e migaati egitazimbulukuswa; malayika wa Mukama n'ava mu maiso ge. ²² Gidyoni n'a bona nga niiye malayika wa Mukama; Gidyoni n’a tumula nti Ginsangire, Ai Mukama Katonda, kubanga mbonagaine n'a maiso no malayika wa Mukama. ²³ Mukama n'a mukoba nti emirembe gibbe gy'oli; totya: toyaba kufa. ²⁴ Gidyoni kaisi n'a zimbira eyo ekyoto eri Mukama, n'akyeta Yakuwasalumu: okutuusya watyanu kikaali kiri mu ifula eky'Ababiezeri. ²⁵ Awo olwatuukire mu bwire obwo Mukama n'a mukoba nti Irira ente ya itaawo, niiyo ente ey'o kubiri ey'a kamala emyaka omusanvu, osuule ekyoto kya Baali itaawo ky'alina, otemeeteme ne Asera akiri okumpi: ²⁶ ozimbe ekyoto eri Mukama Katonda wo waigulu ku kigo kino, ng'e mpisa bwe yalagiirwe, oirire ente eyo ey'o kubiri, oweeyo ekiweebwayo ekyokyebwa n'o musaale gwa Asera gwewatemaatema. ²⁷ Awo Gidyoni n'atwala abasaiza ikumi ku baidu be, n'a kola nga Mukama bw'amulagiire: awo olwatuukire, kubanga yabaibbire atiire ab'e nyumba ya itaaye n'a basaiza ab'o mu kibuga, n'atasobola kukola atyo emisana, kyeyaviire akola obwire. ²⁸ Abasajja ab'o mu kibuga bwe bagolokokere amakeeri mu makeeri, bona, ekyoto kya Baali nga kimenyekeremenyekere, ne Asera akibabbaire okumpi ng'a temeibwetemeibwe, n'e nte eyo ey'o kubiri ng'e weweibweyo ku kyoto ekizimbiibwe. ²⁹ Ne bakobagana nti Yani akolere kino? Awo bwe babwirye ni bakemererya, ne batumula nti Gidyoni mutaane wa Yowaasi niiye akolere kino. ³⁰ Awo abasaiza ab'o mu kibuga ni bakoba Yowaasi nti Fulumya mutaane wo afe: kubanga amenyeremenyere ekyoto kya Baali, era kubanga atemeretemere Asera akibaire okumpi. ³¹ Yowaasi n'akoba bonabona abamwemereire mu maiso ge nti mutaka okuwozererya Baali? oba mutaka okumulokola? ataka okumuwozererya, bamwite nga (bukaali) makeeri: oba nga niiye katonda, yewozererye, kubanga bamenyeremenyere ekyoto kye. ³² Ku luaaku olwo kyeyaviire amweta Yerubbaali, ng'a tumula nti Baali amuwaabire kubanga amenyeeremenyere ekyoto kye. ³³ Awo Abamidiyaani bonabona n'Abamaleki n'a baana ab'e buvaisana ni bakuŋaana wamu; ni basomoka, ne basiisira mu kiwonvu eky'e Yezureeri: ³⁴ Naye omwoyo gwa Mukama ni gwiza ku Gidyoni; n'a fuuwa eikondeere; Abiezeri n'a kuŋaana wamu gy'ali. ³⁵ N'a tuma ababaka okubuna Manase yenayena; era boona ne bakuŋaanira wamu gy'ali: n'atuma ababaka eri Aseri n'eri Zebbulooni n'eri Nafutaali; ne bayambuka okubasisinkana. ³⁶ Gidyoni n'a koba Katonda nti oba nga olirokola Isiraeri n'o mukono gwange, nga bwe watumwire, ³⁷ bona, nateekere ebyoya by'e ntama mu iguuliro; oba ng'o musulo gwabba ku byoya byonka, eitakali lyonalyona nga ikalu, kaisi ni manya ng'o lirokola Isiraeri n'o mukono gwange, nga bwe watumwire. ³⁸ Awo bwe kyabbaire kityo: kubanga n'a golokoka amakeeri mu makeeri; n'a kamula ebyoya, omusulo n'a gumalamu mu byoya, amaizi ni gaizula ekibya. ³⁹ Gidyoni n'a koba Katonda nti Obusungu bwo buleke okumbuubuukiraku, era n'atumula omulundi guno gwonka: nkwegayiriire, nkeme n'e byoya omulundi guno gwonka; atyanu ebyoya byonka bibbe bikalu, omusulo gubbe ku itakali lyonalyona. ⁴⁰ Katonda n'a kola atyo obwire obwo: kubanga ebyoya byonka niibyo byabbaire ebikalu, omusulo ne gubba ku itakali lyonalyona.