¹ Debola n'o Balaki mutaane wa Abinoamu kaisi ni beemba ku lunaku olwo nti ² Kubanga abakulembeze baakulembera mu Isiraeri, Kubanga abantu beegabula bonka nga bataka, Mumwebalye Mukama: ³ Muwulire, imwe bakabaka; mutege amatu, imwe abalangira; Nze, ninze, nayembera Mukama; Nayemba okutendereza Mukama, Katonda wa Isiraeri. ⁴ Mukama, bwe wafulumire mu Seyiri, Bwe waviire mu nimiro ya Edomu okutabaala: Ensi n'e tengera, era n'e igulu ni litonnya, niiwo awo, ebireri ni bitonya amaizi. ⁵ Ensozi ni gikulukutira mu maiso ga Mukama, Niiwo awo, era ne Sinaayi oli mu maiso ga Mukama, Katonda wa Isiraeri. ⁶ Mu mirembe gya Samugali mutaane wa Anasi, Mu mirembe gya Yayeeri, enguudo tegyabbairemu bantu, Abatambuli ni batambuliranga mu mpenda: ⁷ Abafuga bawaawo mu Isiraeri, bawaawo, Okutuusya nze Debola lwe nabbaawo. Lwe nabbaawo nze omukaire mu Isiraeri. ⁸ Baalondere bakatonda abayaka; Entalo kaisi ne gibba mu miryango: Wabonekere engabo oba kitala; Mu basaiza emitwalo ina mu Isiraeri? ⁹ Omwoyo gwange gubalowooza abafuga Isiraeri, Abeegabula bonka mu bantu nga bataka: Mumwebalye Mukama. ¹⁰ Mukyogereku, imwe abeebagala ku ndogoyi enjeru, Imwe abatyama ku mikeeka emidalizye, Mweena abatambula mu ngira. ¹¹ Eidoboozi ly'abo abalasa obusaale nga libali wala, mu bifo mwe basenera amaizi, eyo gye balyatulira ebikolwa bya Mukama eby'o butuukirivu, Ebikolwa bye eby'obutuukirivu ng'a fugira mu Isiraeri. Abantu ba Mukama kaisi ni baserengeta ni baaba ku miryango. ¹² Zuuka, zuuka, Debola; Zuuka, zuuka, yatula olwembo: Golokoka, Balaki, obitye obusibe bwo nga busibiibwe, iwe mutaane wa Abinoamu. ¹³ Kaisi ni baserengeta ekitundu ky'a bakungu n'e ky'a bantu ekyafiikirewo; Mukama yanserengeterye okulwana n'a b'a maani. ¹⁴ Mu Efulayimu ne muva abo ababbaire ekikolo kyabwe mu Amaleki; Nga bakusengererya iwe, Benyamini, mu bika byo; Mu Makiri (ni muva) abafuga ne baserengeta, N'o mu Zebbulooni abo abakwata omwigo gw'oyo asimba enyiriri. ¹⁵ N'abalangira ba Isakaali babbaire wamu n'o Debola; nga Isakaali bwe yabbaire, n'o Balaki bwe yabbaire atyo; Bafubutukire mu kiwonvu (nga baniina) mu bigere bye. Awali ensulo gya Lewubeeni wabbairewo okuteesya kw'e myoyo okukulu. ¹⁶ Kiki ekyabatyamisirye mu bisibo byo eby'e ntama, Okuwulira endere gye bafuwiire ebisibo? Awali ensulo gya Lewubeeni Niiwo awo okuteesya kw'e myoyo okukulu. ¹⁷ Gireyaadi yabbaire emitala wa Yoludaani: N'o Daani ekyamusisiirye mu byombo kiki? Aseri n'a tyama ng'a sirika ku mwalo gw'enyanza, N'abba awali ebikono bye. ¹⁸ Zebbulooni niibo abantu abagabula obulamu bwabwe okutuusya okufa, N'o Nafutaali, mu bifo ebigulumivu eby'o lutalo. ¹⁹ Bakabaka baizire ni balwana; Awo nga lwe balwaine bakabaka ba Kanani, mu Taanaki ku maizi ga Megido: Tebabbingire magoba g'e bintu. ²⁰ Ab'o mu igulu balwaine, emunyenye mu ŋendo gyagyo gyalwaine n'o Sisera. ²¹ Omwiga Kisoni gwabatwaliire dala, Omwiga ogwo ogw'e ira, omwiga Kisoni. Iwe obulamu bwange, tambula n'a maani: ²² Ebinuulo by'e mbalaasi kaisi ni bisambirira Olw'o kubuuka, olw'o kubuuka kw'e nsolo gyabwe egy'a maani. ²³ Mulaamire Merozi, bw'a tumula malayika wa Mukama, Mulaame inu abatyama omwo; Kubanga tebairukirira Mukama, tibairukirira Mukama awali ab'a maani. ²⁴ Alibba n'o mukisa Yayeeri okusinga Abakali, Mukali wa Keberi Omukeeni: Alibba n'o mukisa okusinga Abakali mu weema: ²⁵ Yasabiire amaizi, n'a muwa amata; N'a muleetera omuzigo mu kibya eky’e kikungu. ²⁶ Yakwatisirye omukono enkondo, Yakwatisirye omukono gwe omulyo enyundo ey'o mukozi; n'a kubbisya Sisera enyundo, yakomereire omutwe, niiwo awo, yamusumitire ekyeni n’a mubityamu. ²⁷ Ku bigere bye n'a kutama n’agwa n'a galamiirira: Ku bigere bye n'akutama n'agwa: We yakutamira we yagwiire dala ng'a fiire. ²⁸ Mu dirisa yalingiriire n'a tumulira waigulu, Maye wa Sisera yatumuliire waigulu mu dirisa nti ekirwisirye egaali lye okwiza kiki? Ebisinde by'e igaali lye ekibibonererya kiki? ²⁹ Abakyala niibo ab'a magezi ni bamwiramu, niiwo awo, ne yeiramu yenka nti ³⁰ Tebaboine munyago, tebagugerekere? Buli musaiza omuwala, abawala babiri; Sisera omunyago ogw'a mabala amangi, Omunyago ogw'a mabala amangi amadalizye, Amabala amangi amadalizye eruuyi n'e ruuyi, ku matoti g'o munyago? ³¹ Batyo bazikirirenga abalabe bo bonabona, ai Mukama: Naye abo bonabona abamutaka babbe ng'e isana bw'e livaayo mu maani galyo. Ensi n'e wumulira emyaka ana.