¹ Abaana ba Isiraeri ni beeyongera ate okukola ekyabbaire mu maiso ga Mukama ekibbiibi, Ekudi bwe yamalire okufa. ² Mukama n'a batunda mu mukono gwa Yabini kabaka wa Kanani, eyafugiire mu Kazoli; omugabe w'eigye lye Sisera, eyatyaime mu Kalosesi eky'a b'a mawanga. ³ Abaana ba Isiraeri ne bakungira Mukama: kubanga yabbaire alina amagaali ag'e kyoma lwenda; n'a joogera inu abaana ba Isiraeri emyaka abiri. ⁴ Era Debola, nabbi, omukali wa Lapidosi, niiye yalamulanga Isiraeri mu biseera ebyo. ⁵ Era yatyamanga wansi w'o lukindu lwa Debola wakati w'e Laama n'e Beseri mu nsi ya Efulayimu ey'ensozi: abaana ba Isiraeri ni bambukanga gy'ali okubasaliranga emisango. ⁶ N'atuma n'a yeta Balaki, mutaane wa Abinoamu ave mu Kedesunafutaali, n'a mukoba nti Mukama, Katonda wa Isiraeri, talagiire nti Yaba mukuŋaanire eri olusozi Taboli, otwale naiwe abasaiza mutwalo ku baana ba Nafutaali n'o ku baana ba Zebbulooni? ⁷ Nzena ndiwalulira gy'oli eri omwiga Kisoni Sisera omugabe w'eigye lya Yabini, n'a magaali ge n'e kibiina kye; Nzena ndimugabula mu mukono gwo. ⁸ Balaki n'a mukoba nti Iwe bw'olyaba nanze, kale ndyaba: naye bw'otolyaba nanze iwe, tindyaba. ⁹ N'akoba nti Mazima ndyaba naiwe: naye olugendo lw'o yaba tirulibba lwe kitiibwa kyo; kubanga Mukama alitunda Sisera mu mukono gw'o mukali: Debola n'a golokoka n'a yaba n'o Balaki e Kedesi. ¹⁰ Balaki n'a bita Zebbulooni ne Nafutaali bakuŋaanire e Kedesi; ni bayambukayo abasaiza mutwalo nga baniina mu bigere bye: Debola n'a yambukira wamu naye. ¹¹ Era Keberi Omukeeni yabbaire ayawukaine n'Abakeeni, niibo baana ba Kobabu omuko wa Musa, n'a zimba eweema ye awali omwera mu Zaananimu ekiri okumpi n'e Kedesi. ¹² Ne bakobera Sisera nga Balaki mutaane wa Abinoamu aniinire ku lusozi Taboli. ¹³ Sisera n'akuŋaanya amagaali ge gonagona, amagaali ag'e kyoma lwenda, n'a bantu bonabona ababbaire naye, okuva ku Kalosesi eky'a b'a mawanga okutuusya ku mwiga Kisoni. ¹⁴ Debola n'a koba Balaki nti golokoka; kubanga watyanu Mukama lw'agabwire Sisera mu mukono gwo: Mukama takutangire okutabaala? Awo Balaki n'ava ku lusozi Taboli, abasaiza mutwalo ni bamusengererya. ¹⁵ Mukama n'afufugalya Sisera n'a magaali ge gonagona n'e igye lye lyonalyona n'o bwogi bw'e kitala mu maiso ga Balaki; Sisera n'ava mu gaali lye, n'a iruka n'e bigere. ¹⁶ Naye Balaki n'asengererya amagaali n'e igye okutuuka e Kalosesi eky'a b'a mawanga: n'e igye lya Sisera lyonalyona obwogi bw'e kitala ni bulimalawo, tiwasigaire muntu. ¹⁷ Naye Sisera n'a iruka n'e bigere n'a tuuka mu weema ya Yayeeri mukali wa Keberi Omukeeni: kubanga Yabini kabaka we Kazoli n'e nyumba ya Keberi Omukeeni babbaire balina emirembe: ¹⁸ Yayeeri n'a fuluma okusisinkana Sisera, n'a mukoba nti Kyama, mukama wange, oyingire ewange, totya. N'a kyama n'a yingira ewuwe mu weema n'a mubiikaku ekigaire. ¹⁹ N'a mukoba nti nkwegayiriire, mpa otwizi nywe, kubanga enyonta enuma. N'a sumulula oluwu lw'a mata, n'a munywisya, n’a mubiikaku. ²⁰ N'amukoba nti yemerera mu mulyango gw'e weema, awo olwatuuka, omuntu yenayena bweyaiza n'akubuulya n'a tumula nti Omusaiza yenayena ali muno? weena watumula nti bbe. ²¹ Awo Yayeeri mukali wa Keberi n'a irira enkondo y'e weema, n'a irira enyundo mu mukono gwe, n'a musemberera ng'a jooma, n'a mukomerera enkondo mu kyeni, n'e bitamu n’e kwata n'e itakali; kubanga yabbaire agonere endoolo nyingi; n'a zirika n'afa. ²² Era, bona, Balaki ng'a sengererya Sisera, Yayeeri n'a fuluma okumusisinkana, n'a mukoba nti iza, Nzena n'akulaga Omusaiza gw'o sagira. N'aiza gy'ali; era, bona, Sisera yabbaire agalamiire afiire, n'e nkondo ng'eri mu kyeni kye. ²³ Atyo Katonda n'a jeemula ku lunaku olwo Yabini kabaka wa Kanani mu maiso g'a baana ba Isiraeri. ²⁴ Omukono gw'a baana ba Isiraeri ne gweyongerayongera okuwangula Yabini kabaka we Kanani, okutuusya lwe bamalire okuzikirirya Yabini kabaka we Kanani.