¹ Gano niigo mawanga Mukama ge yalekere okukema Isiraeri olw'abo, bonabona ku abo abataamaite ntalo gyonagyona egya Kanani; ² kyooka emirembe gy'a baana ba Isiraeri bamanye, okubegeresya okulwana, ibo Ababbaire tibamaiteku n'a katadiidiiri oluberyeberye; ³ abakungu abataanu ab'Abafirisuuti, n'Abakanani bonabona, n'Abasidoni, n'Abakiivi abatyamanga ku lusozi Lebanooni, okuva ku lusozi Baalukerumoni okutuusya awayingirirwa mu Kamasi. ⁴ Era babbaire b'o kukema Isiraeri, okumanya oba nga baaba okuwulira ebiragiro bya Mukama bye yalagiire bazeiza babwe ku bwa Musa. ⁵ Abaana ba Isiraeri ne batyama mu Bakanani; Omukiiti, n'Omwamoli, n'Omuperizi, n'Omukiivi, n'Omuyebusi: ⁶ ni bakwa abawala baabwe okubba abakali baabwe, ni bawa abawala baabwe ibo eri bataane baabwe, ni baweererya bakatonda baabwe. ⁷ Abaana ba Isiraeri ni bakola ekyabbaire mu maiso ga Mukama ekibbiibi, ni beerabira Mukama Katonda wabwe; ne baweereryanga Babaali na Baasera. ⁸ Obusungu bwa Mukama kyebwaviire bubuubuuka ku Isiraeri, n'abatunda mu mukono gwa Kusanurisasaimu kabaka w'e Mesopotamiya: abaana ba Isiraeri ne baweerererya Kusanurisasaimu emyaka munaana, ⁹ Awo abaana ba Isiraeri bwe bakungiire Mukama, Mukama n'a bayimusirya omulokozi abaana ba Isiraeri, eyabalokoire, iye Osunieri mutaane wa Kenazi, niiye mwanawaabo owa Kalebu. ¹⁰ Omwoyo gwa Mukama ni gumwiziira, n'a lamula Isiraeri; n'ayaba okutabaala, Mukama n'a gabula Kusanurisasaimu kabaka w'e Mesopotamiya mu mukono gwe: omukono gwe ni guwangula Kusanurisasaimu. ¹¹ Ensi n'e wumulira emyaka ana. Osunieri mutaane wa Kenazi n'afa: ¹² Awo abaana ba Isiraeri ne beeyongera ate okukola ekyabbaire mu maiso ga Mukama ekibbiibi: Mukama n'awa Eguloni kabaka wa Moabu amaani okulwana ne Isiraeri, kubanga babbaire bakolere ekyabbaire mu maiso ga Mukama ekibbiibi. ¹³ Ne yeekuŋaanyirya abaana ba Amoni ne Amaleki; n'a yaba n'a kubba Isiraeri, ne balya ekibuga eky'e nkindu. ¹⁴ Abaana ba Isiraeri ni baweerererya Eguloni kabaka wa Mowaabu emyaka ikumi na munaana. ¹⁵ Naye abaana ba Isiraeri bwe bakungiire Mukama, Mukama n'abayimusirya omulokozi, Ekudi mutaane wa Gera, Omubenyamini, eyabbaire ow'o mugooda: abaana ba Isiraeri ni bamukwatisya ekirabo akitwalire Eguloni kabaka wa Mowaabu. ¹⁶ Ekudi ne yeeweererya ekitala eky'o bwogi obubiri, obuwanvu bwakyo omukono gumu; n'a kyesiba ku kisambi kye ekiryo munda mu ngoye gye. ¹⁷ N'awa Eguloni kabaka w'e Mowaabu ekirabo: Eguloni yabbaire musaiza munene inu. ¹⁸ Awo bwe yamalire okuwa ekirabo; n'a sindika abantu ababbaire beetiikire ekirabo. ¹⁹ Naye iye mwene n'airayo ng'a koma ku mabbaale agaali okumpi w'e Girugaali, n'a tumula nti ntumiibwe ebigambo eby'e kyama eri iwe, kabaka. N'a tumula nti Musirike. Bonabona ababbaire beemereire naye ni bafuluma ni bamuleka. ²⁰ Ekudi n'a iza gy'ali; yabbaire atyaime mumu yenka mu nyumba ye eya waigulu ey'o kuwolawolerangamu. Ekudi n'atumula nti nina ebigambo ebiva eri Katonda gy'oli. N'ayimuka ku ntebe ye. ²¹ Ekudi n'a golola omukono gwe omugooda, n'atoola ekitala ku kisambi ekiryo, n'a musumita ekida: ²² n'e kisaale kyoona ni kigoteramu; amasavu ni gazibikira ekitala we kiyingiriire, kubanga tiyasowoire kitala mu kida kye, ne kiviiramu nyuma. ²³ Awo Ekudi n'afuluma n'ayaba mu kisasi, n'a mwigalirawo enjigi gy'e nyumba eya waigulu, n'a gisiba. ²⁴ Awo bwe yamalire okufuluma, abaidu be ni baiza; ne babona, era, bona, enjigi gy'e nyumba eya waigulu nga gisibiibwe; ni batumula nti ali sooti abiikire ku bigere bye mu nyuba ye ey'o kuwolawolerangamu. ²⁵ Ne balindirira okutuusya ensoni lwe gyabakwaite: era, bona, nga taigulawo njigi gye nyumba eya waigulu; awo ni bairira ekisumuluzo, ni bagiigulawo: era, bona, mukama wabwe ng'a igwire wansi afiire. ²⁶ Ekudi n'a wona nga bakaali balindirira, n'abita ku mabbaale, n'a wona n'atuuka e Seyiri. ²⁷ Awo olwatuukire, bwe yatuukire, n'afuuwa eikondeere mu nsi ya Efulayimu ey'e nsozi, abaana ba Isiraeri ni baserengetera wamu naye okuva mu nsi ey'e nsozi, naye ng'a batangira. ²⁸ N'abakoba nti musengererye: kubanga Mukama Agabwire abalabe banyu Abamowaabu mu mukono gwanyu. Ni bamusengererya ni baserengeta, ne beekwata emisomoko gya Yoludaani nga balwana n'Abamowaabu, ni bataganya muntu kusomoka. ²⁹ Ni baita ku Mowaabu mu biseera ebyo abasaiza nga mutwalo, buli muntu ow'a maani na buli muntu muzira; so tikwawonereku muntu. ³⁰ Awo Mowaabu n'a jeemulwa ku lunaku olwo n'o mukono gwa Isiraeri: Ensi n'e wumulira emyaka kinaana. ³¹ Samugali mutaane wa Anasi n'airira oyo, n'aita ku Bafirisuuti abasaiza lukaaga n'o mufuwaduzi ogusoya ente: era yeena n'a lokola Isiraeri.