¹ Awo abaana ba Isiraeri bonabona kaisi ni bafuluma, ekibiina ni kikuŋaana ng'o muntu omumu, okuva ku Daani okutuukire ku Beeruseba, wamu n'e nsi y'e Gireyaadi, eri Mukama e Mizupa. ² Abakungu b'a bantu bonabona, ab'e bika byonabyona ebya Isiraeri, ni beeraga mu ikuŋaaniro ly'a bantu ba Katonda, abasaiza abatambula n'e bigere abaasowolanga ebitala obusiriivu buna. ³ (Era abaana ba Benyamini babbaire bawuliire ng'a baana ba Isiraeri bayambukire e Mizupa.) Abaana ba Isiraeri ni batumula nti tukobere, Obubbiibi buno bwakoleibwe butya? ⁴ Awo Omuleevi ibaye w'o mukali gwe baitire, n'a iramu n’a tumula nti natuuka e Gibea, amakeeri Benyamini, nze n'o muzaana wange, okugonayo. ⁵ Abasaiza ab'e Gibea n'i bangolokokeraku, ni bazingizya enyumba enjuyi gyonagyona mwe nabbaire obwire; nze babbaire bataka okungita, n'o muzaana wange bamukwaite, era yafiire. ⁶ Ne ntwala omuzaana wange, ni musalaasala ebitundu, ni muweererya okubunya ensi yonayona ey'o busika bwa Isiraeri: kubanga bakolere eky'o bukaba era eky'o busirusiru mu Isiraeri. ⁷ Mubone, imwe abaana ba Isiraeri, mwenamwena, muleete amagezi ganyu muteesye. ⁸ Abantu bonabona ni bagolokoka ng'o muntu omumu nga batumula nti wabula muntu mu ife alyaba mu weema ye, so wabula mu ife alikyama okuyingira mu nyumba ye. ⁹ Naye atyanu ekigambo kye tulikola e Gibea niikyo kino; tulyambuka okulwana nakyo nga tukubbire akalulu; ¹⁰ era tulitoola abasaiza ikumi ku buli kika okubunisya ebika byonabyona ebya Isiraeri, era kikumi ku buli lukumi, era lukumi ku buli mutwalo, okusakira abantu emere, bwe balituuka e Gibea ekya Benyamini kaisi bakole ng'o busirusiru bwonabwona bwe buli bwe baakoleire mu Isiraeri. ¹¹ Awo, abasaiza bonabona aba Isiraeri ni bakuŋaanira ku kibuga, nga beegaitire ng'o muntu omumu. ¹² Awo ebika bya Isiraeri ni batuma abantu okubunya ekika kyonakyona ekya Benyamini nga batumula nti bubbiibi ki obwo obwakoleibwe mu imwe? ¹³ Kale atyanu muweeyo abasaiza, abaana aba Beriali; abaali mu Gibea; kaisi tubaite, tutoolemu Obubbiibi mu Isiraeri. Naye Benyamini n'a gaana okuwulira eidoboozi lya Bagande baabwe abaana ba Isiraeri. ¹⁴ Awo abaana ba Benyamini baviire mu bibuga ni bakuŋanira e Gibea, okwaba okutabaala abaana ba Isiraeri. ¹⁵ Abaana ba Benyamini ni bababala ku lunaku olwo abaaviire mu bibuga abasaiza abasowolanga ebitala emitwaalo ibiri mu kakaaga, obutateekaaku abo abaatyaime mu Gibea be babalire abasaiza abalonde lusanvu. ¹⁶ Mu bantu bano bonabona mwabbairemu abasaiza abalonde abomugooda lusanvu; buli mumu yasoboire okuvuumuulira Amabbaale oluziiri, n’atasubwa: ¹⁷ Abasaiza ba Isiraeri, obutateekaku Benyamini, bababalire abasaiza abasowolanga ebitala obusiriivu buna: abo bonabona nga bazira. ¹⁸ Abaana ba Isiraeri ni bagolokoka, ne bayambuka e Beseri, ne babuulya Katonda abalagule; ni bakoba nti yani alisooka okutwambukira okulwana: n'a baana ba Benyamini? Mukama n'atumula nti Yuda niiye alisooka. ¹⁹ Abaana ba Isiraeri ni bagolokoka amakeeri, ni basiisira ku Gibea. ²⁰ Abasaiza ba Isiraeri ni bafuluma okulwana n'o Benyamini; abasaiza ba Isiraeri ni basimba enyiriri okulwanira nabo e Gibea. ²¹ Awo abaana ba Benyamini ni bava mu Gibea ni bamega wansi ni bazikirirya ku lunaku olwo abasaiza emitwalo ibiri mu nkumi ibiri ku Baisiraeri. ²² Awo abantu, abasaiza ba Isiraeri, ni beegumya emyoyo, ne basimba enyiriri ate mu kifo mwe babbaire bagisimbiire ku lunaku olw'o luberyeberye: ²³ (Era abaana ba Isiraeri ne baniina ne bakungira amaliga mu maiso ga Mukama okutuusya olweigulo; ne babuulya Mukama nga batumula nti Nasembera ate okulwana n'a baana ba Benyamini mugande wange? Mukama n'atumula nti Yambuka okulwana naye.) ²⁴ Awo abaana ba Isiraeri ne basembera okulwana n'a baana ba Benyamini ku lunaku olw'o kubiri. ²⁵ Benyamini n'ava mu Gibea ku lunaku olw'o kubiri okulwana nabo, ni bamega wansi ni bazikirirya ate abasaiza mutwalo gumu mu kanaana ku Isiraeri; abo bonabona baasowolanga ebitala. ²⁶ Awo abaana ba Isiraeri bonabona n'a bantu bonabona kaisi ni baniina ni batuuka e Beseri, ni bakunga amaliga, ni batyama eyo mu maiso ga Mukama, ne basiiba ku lunaku olwo okutuusya olw'eigulo; ni bawaayo ebiweebwayo eby'okyebwa n'e biweebwayo olw'e mirembe mu maiso ga Mukama: ²⁷ Abaana ba Isiraeri ne babuulya Mukama, (kubanga sanduuku ey'e ndagaani ya Katonda yabbaireyo mu naku egyo, ²⁸ n'o Finekaasi mutaane wa Eriyazaali mutaane wa Alooni yemereranga mu maiso gaayo mu naku egyo) nga batumula nti Naafuluma ate omulundi ogw'okusatu okulwana n'a baana ba Benyamini mugande wange oba naalekera awo? Mukama n'atumula nti Yambuka, kubanga Amakeeri na mugabula mu mukono gwo. ²⁹ Awo Isiraeri n'a teekawo abateegi okuteega Gibea enjuyi gyonagyona. ³⁰ Awo abaana ba Isiraeri ne bambuka okulwana n'a baana ba Benyamini ku lunaku olw'o kusatu, ne basimba enyiriri gyabwe nga boolekera Gibea ng'o lundi ³¹ Abaana ba Benyamini ne bafuluma okulwana n'abantu, ne basendebwasendebwa okuva ku kibuga; ne batandika okukubba n'okwita ku bantu ng'o lundi, mu nguudo, olumu niilwo lwambuka e Beseri, n'o lundi e Gibea, no mu nimiro, abasaiza ba Isiraeri ng'asatu. ³² Abaana ba Benyamini ni batumula nti Bamegeibwe mu maiso gaisu ng'o luberyeberye. Naye abaana ba Isiraeri ni batumula nti twiruke, tubasendesende okuva ku kibuga baabe mu nguudo. ³³ Abasaiza ba Isiraeri bonabona ne bagolokoka ne bava mu kifo kyabwe, ni basimba enyiriri gyabwe mu Baalutamali: n'a bateegi ba Isiraeri ni bafubutuka okuva mu kifo kyabwe, okuva mu Maalegeba. ³⁴ Ni wabita okulwana ne Gibea abasaiza abaalondeibwe mu Isiraeri yenayena, mutwalo, ni balwana inu: naye babbaire tebamaite ng'a kabbiibi kabali kumpi. ³⁵ Mukama n'a kubba Benyamini mu maiso ga Isiraeri: abaana ba Isiraeri ku lunaku olwo ni bazikirirya ku Benyamini abasaiza Emitwaalo ibiri mu nkumi itaanu mu kikumi: abo bonabona baasowolanga ebitala. ³⁶ Awo abaana ba Benyamini ni babona nga bakubbiibwe: kubanga abasaiza ba Isiraeri baseguliire Benyamini, kubanga babbaire beesigire abateegi be babbaire bateegeseeye e Gibea. ³⁷ Awo abateegi ni banguwa ne bafubutuka ku Gibea; abateegi ni basembera enjuyi gyonagyona, ni baita ekibuga kyonakyona n'o bwogi bw'e kitala. ³⁸ Era akabonero abasaiza ba Isiraeri n'a bateegi ke babbaire balagaine niiko kano, ibo akunyoosya ekireri ekinene eky'o mwoka okuva mu kibuga. ³⁹ Abasaiza ba Isiraeri ni bakyuka mu lutalo, n'o Benyamini n'atandika okukubba n'o kwita ku basaiza ba Isiraeri abasaiza ng'a satu: kubanga batumwire nti Mazima Bamegeibwe mu maiso gaisu nga mu lutabaalo olw'o luberyeberye. ⁴⁰ Naye ekireri bwe kyasookere okunyooka okuva mu kibuga ng'e mpango y'o mwoka, Ababenyamini ni balinga enyuma, era, bona, ekibuga kyonakyona nga kinyooka akutuusya mu igulu. ⁴¹ Awo abasaiza ba Isiraeri ni bakyuka, abasaiza ba Benyamini ni bawuniikirira: kubanga baboine ng'a kabbiibi kabatuukireku. ⁴² Awo ni bakubba amabega mu maiso g'a basaiza ba Isiraeri okwaba mu ngira eira mu idungu; naye olutalo ne lubasengererya kumpi; boona abaaviire mu bibuga ne babazikirirya wakati mu ebyo. ⁴³ Ni bazingizya Ababenyamini enjuyi gyonagyona, n'a babayiganya, ne babaniinirira mu bisulo byabwe, okutuusya emitala w'e Gibea ku luuyi lw'ebuvaisana. ⁴⁴ Ne wagwa ku Benyamini abasaiza mutwalo gumu mu kanaana; abo bonabona basaiza bazira. ⁴⁵ Ne bakyuka ne bairuka mu ngira y'eidungu okutuuka ku ibbaale lye Limoni: ne bafuunzya Ababbaire bairukire mu nguudo abasaiza enkumi itaanu; ni babayiganya okutuuka e Gidomu, ni babaitaku abasaiza enkumi ibiri. ⁴⁶ Batyo bonabona abagwire ku lunaku olwo ku Benyamini babbaire abasaiza Emitwaalo ibiri mu nkumi itaanu abaasowolanga ebitala; abo bonabona basaiza bazira: ⁴⁷ Naye abasaiza lukaaga ni bakyuka ne bairukira mu ngira y'e idungu ni batuuka ku ibbaale lye Limoni, ne babba mu ibbaale lye Limoni okumalayo emyezi ina. ⁴⁸ Abasaiza ba Isiraeri ni bakyuka ate okulwana n'a baana ba Benyamini, ne babaita n'o bwogi bw'e kitala, ekibuga kyonakyona era n'e nte ne byonabyona bye basangire: era n'e bibuga byonabyona bye basangire ne babyokya.