¹ Era abasaiza ba Isiraeri babbaire balayiire mu Mizupa nga batumula nti Tiwabbanga ku ife alimuwa Benyamini omuwala we okumukwa. ² Abantu ni baiza e Beseri, ne batyama eyo okutuusya olw'e igulo mu maiso ga Katonda, ne bayimusya amaloboozi gabwe, ni bakunga inu amaliga. ³ Ne batumula nti Ai Mukama Katonda wa Isiraeri, kiki ekiretere kino mu Isiraeri, watyanu ekika kimu okugota mu Isiraeri? ⁴ Awo olwatuukire Amakeeri abantu ni bagolokoka mu makeeri, ni bazimba eyo ekyoto, ni bawaayo ebiweebwayo ebyokyebwa n'e biweebwayo olw'e mirembe. ⁵ Abaana ba Isiraeri ni batumula nti Aliwa mu bika byonabyona ebya Isiraeri atayambukire eri eikuŋaaniro eri Mukama? Kubanga babbaire balayiire ekirayiro ekikulu ku oyo atayambukire eri Mukama e Mizupa nga batumula nti Talireka kwitibwa: ⁶ Abaana ba Isiraeri ni bejusa olwa Benyamini mugande waabwe ni batumula nti waliwo ekika kimu atyanu ekyazikiriziibwe mu Isiraeri. ⁷ Tulibabonera tutya Abakali abo abasigairewo, kubanga twalayiire Mukama obutabawanga ku bawala baisu okubakwa? ⁸ Ne batumula nti kika ki ku bika bya Isiraeri ekitayambukire eri Mukama e Mizupa? Era, bona, mu Yabesugireyaadi temwaviire muntu okwaba mu lusiisira eri eikuŋaaniro. ⁹ Kubanga abantu bwe babaliibwe, bona, nga wabulawo ku abo abatyaime mu Yabesugireyaadi. ¹⁰ Ekibiina ni kitumayo abasaiza omutwalo gumu mu nkumi ibiri ku abo abasingire obuzira, ni babalagira nga batumula nti mwabe mwite n'o bwogi bw'e kitala abatyama mu Yabesugireyaadi, wamu n'a bakali n'a baana abatobato. ¹¹ N'e kino niikyo ekigambo kye mwakolere; mwazikiririrya dala buli musaiza na buli mukali eyabbaire agonere n'o musaiza. ¹² Ne babona mu abo abatyama mu Yabesugireyaadi abawala abatobato bina; abatamanyanga musaiza okugona naye: ne babaleeta mu lusiisira e Siiro, ekiri mu nsi y'e Kanani. ¹³ Awo ekibiina kyonakona ni batuma ni batumula n'a baana ba Benyamini ababbaire mu ibbaale ly'e Limoni, ne babalangira emirembe. ¹⁴ Awo Benyamini n'a irawo mu biseera ebyo; ni babawa abakali be babbaire bawonyerye okubaita ku bakali ab'e Yabesugireyaadi: era naye ne batabamala batyo. ¹⁵ Abantu ne beejusa olwa Benyamini, kubanga Mukama yabbaire awagwire ekituli mu bika bya Isiraeri: ¹⁶ Awo Abakaire b'e kibiina ni batumula nti tulibonera tutya abakali abo abasigairewo; kubanga Abakali bazikiriziibwe mu Benyamini? ¹⁷ Ni batumula nti Kigwana okubbaawo obusika eri abo abawonere ku Benyamini, ekika kireme okusangulibwa mu Isiraeri. ¹⁸ Naye titusobola kubawa ku bawala baisu okubakwa: kubanga abaana ba Isiraeri babbaire balayiire nga batumula nti abaamiibwe oyo awa Benyamini omukali okukwa. ¹⁹ Ne batumula nti bona, waliwo embaga ya Mukama buli mwaka mu Siiro, ekiri ku luuyi olw'o bukiika obugooda olw'e Beseri, ku luuyi olw'ebuvaisana olw'o luguudo oluva e Beseri olwambuka e Sekemu; n'o ku luuyi olw'o bukiika obulyo olw'e Lebona. ²⁰ Awo ne balagira abaana ba Benyamini nga batumula nti Mwabe muteegere mu nsuku gy'e mizabbibu; ²¹ mumoge, era, bona, abawala ab'e Siiro bwe balifuluma okukina mu mizanyu gyaisu, kaisi ni muva mu nsuku, mukwate buli muntu mukazi we ku bawala ab'e Siiro, mwabe mu nsi ya Benyamini. ²² Awo olulituukire baitawabwe oba Bagande baabwe bwe baliiza okutuwozerya, ni tubakoba nti mubatuwe lw'e kisa: kubanga tetwabanyagiire buli muntu mukali we mu ntalo: so temwababawaire; atyanu mwandikolere omusango. ²³ Awo abaana ba Benyamini ne bakola batyo, ni beenyagira abakali ku abo abakinire, ng'o muwendo gwabwe bwe gwabbaire abo be baanyagire: ni bairayo mu busika bwabwe, ne bazimba ebibuga, ni batyama omwo. ²⁴ Awo abaana ba Isiraeri ni bavaayo mu biseera ebyo, buli muntu eri ekika kye n'eri enyumba ye, ni bavaayo ni baaba buli muntu mu busika bwe. ²⁵ Mu naku egyo nga wabula kabaka mu Isiraeri: buli muntu yakolanga ekyabbanga mu maiso ge iye ekisa.