¹ Naye olwatuukire eibbanga bwe lyabitirewo, nga bakungula eŋaanu, Samusooni n'akyalira mukali we ng'alina omwana gw'e mbuli; n'atumula nti N'ayingira eri mukali wange mu nyumba. Naye itaaye n'atamuganya kuyingira. ² itaaye n'a nkoba nti Mazima mbaire ndowooza nga wamukyawiire dala; kyenaviire muwa mwinawo: mugande we omutomuto tamusinga obusa? nkwegayiriire, mutwale mu kifo kye. ³ Samusooni n'a bakoba nti Omulundi guno ndibba nga mbulaku musango eri Abafirisuuti, bwe ndibakolera akabbiibi. ⁴ Samusooni n'ayaba n'akwata ebibbe bisatu, n'airira ebitawuliro, n'a bikwataganya emikira, n'a teeka ekitawuliro wakati w'e mikira bibiri bibiri. ⁵ Awo bwe yamalire okukoleerya ebitawuliro, n'a bilekula okwaba mu ŋaanu edi mu nimiro ey'Abafirisuuti, n'a yokya ebinywa era n'e ŋaanu eri mu nimiro, era n'e nsuku gy'e mizeyituuni. ⁶ Awo Abafirisuuti kaisi ni batumula nti akolere atyo niiye ani? Ni batumula nti Samusooni muko w'Omutimuna, kubanga yatwaire mukali we n'a muwa mwinaye. Abafirisuuti ni bayambuka, ni bookya omukali no itaaye omusyo. ⁷ Samusooni n'a koba nti bwe mukola mutyo, tindireka kubawalanaku igwanga, kaisi ni ndekera awo. ⁸ N'abaitira dala inu dala bangi inu: n'a serengeta n'a tyama mu lwatika olw'o mu ibbaale lya Etamu. ⁹ Awo Abafirisuuti ni bayambuka, ne basiisira mu Yuda, ni bayanjaala mu Leki. ¹⁰ Abasaiza ba Yuda ni batumula nti kiki ekibayambukirye okulwana naife? Ne batumula nti Twambukire okusiba Samusooni, okumukola nga bwe yatukobere ife. ¹¹ Awo abasaiza enkumi isatu aba Yuda kaisi ni baserengeta eri olwatika olw'o mu ibbaale lya etamu, ni bakoba Samusooni nti Tomaite nga Abafirisuuti batufuga? kale kino kiki kye watukolere? N'a bakoba nti ibo nga bwe bankolere, nzena bwe nabakolere. ¹² Ne bamukoba nti tuserengetere okukusiba, tukugabule mu mukono gw'Abafirisuuti. Samusooni n'a bakoba nti mundayirire obutangwaku imwe beene. ¹³ Ne batumula naye nga bakoba nti bbe; naye twakusibira dala, ni tukugabula mu mukono gwabwe: naye mazima tetwakwite. Ni bamusibisya emiguwa ibiri emiyaka, ni bamuniinisya okuva mu ibaale. ¹⁴ Bwe yatuukire e Leki, Abafirisuuti ni batumulira waigulu bwe basisinkaine naye: omwoyo gwa Mukama ni gumwizaku n'a maani, n'e miguwa egyabbaire ku mikono gye ne gifuuka ng'e nkosi egyokyeibwe omusyo, ebyabbaire bimusibire ni biva ku mikono gye. ¹⁵ N'a bona olusaya lw'e ndogoyi olubisi, n'a golola omukono gwe, n'a lukwata, n'a lwitisya abasaiza lukumi. ¹⁶ Samusooni n’a tumula nti Olusaya lw'e ndogoyi, entuumu n'e ntuumu, Oluba lw'e ndogoyi lwe ngitisirye abasaiza olukumi. ¹⁷ Awo olwatuukire bwe yamalire okutumula n'a suula olusaya okuva mu ngalo gye; ekifo ekyo ni kyetebwa Lamasuleki: ¹⁸ Enyonta n'e muluma inu, n'a kungira Mukama, n’a tumula nti otuwaire okulokoka kuno okunene n'o mukono gw'o mwidu wo: ne watynu enyonta yangita, ni ngwa mu mukono gw'a batali bakomole. ¹⁹ Naye Katonda n'ayasya ekiina ekiri mu Leki, amaizi ni gavaamu; awo bwe yamalire okunywa, omwoyo gwe ne gumwiramu, n'a lamuka: kyerwaviire lutuumibwa eriina Enkakole, oluli mu Leki, okutuusya atyanu. ²⁰ N'alamulira Isiraeri emyaka abiri mu naku gy'Abafiiisuuti.