¹ Samusooni n'a yaba e Gaza, n'abonayo omukali omwenzi, n'ayingira gy'ali. ² (Ne bakobera) ab'e Gaza nti Samusooni atuukire wano: ni bamuzingizya, ni bamuteegera mu mulyango gw'e kibuga okukyeesya obwire, ne basirika obwire bwonabwona, nga batumula nti obwire bukye kaisi tumwite. ³ Samusooni n'a gona okutuusya eitumbi, n'agolokoka mu itumbi, n'a kwata enjigi gy'o muzigo gw'e kibuga, n'e mifuubeeto gyombiri, n'a bisimbulira dala byonabyona era n'e kisiba, n’a biteeka ku kibega kye, n'a bitwala ku ntiiko y'o lusozi oluli mu maiso g'e Kebbulooni. ⁴ Awo olwatuukire oluvanyuma n'ataka omukali mu kiwonvu Soleki, eriina lye Derira. ⁵ Abakungu b'Abafirisuuti ni baambuka gy'ali, ni bamukoba nti musendesende obone amaani ge amangi mwe gasibuka, era kwe tulisinziira okumusobola, tumusibe tumujeezye: feena tulikuwa buli muntu ku ife ebitundu ebye feeza lukumi mu kikumi. ⁶ Derira n'a koba Samusooni nti nkwegayiriire, nkobera amaani go amangi mwe gasibuka, era ekisobola okukusiba okukujeezya. ⁷ Samusooni n'a mukoba nti Bwe balinsibiya enkolokolo embisi omusanvu egitakalire, kaisi ni nfuuka omunafu, ni mba ng'o musaiza ogondi. ⁸ Awo abakungu b'Abafirisuuti ni bamuleetera enkolokolo embisi omusanvu egitakalire, n'amusibisya egyo. ⁹ Era omukali yabbaire n'a bateegi abaabbaire mu nyumba ey'o munda: N'a mukoba nti Abafirisuuti bakugwireku, Samusooni. N'akutula enkolokolo, ng'o mugwa gw'e nkosi bwe gukutuka nga gutuukire ku musyo: Awo amaani ge ni gatategeerekeka: ¹⁰ Derira n'a koba Samusooni nti bona, onduuliire, era ombeyere: atyanu nkwegayiriire, nkobera ekisobola okukusiba. ¹¹ N'a mukoba nti bwe balinsibisya obusibisi emiguwa emiyaaka egitakozesebwanga ku mirimu, kaisi ni nfuuka omunafu, ni mba ng'o musaiza ogondi. ¹² Awo Derira n'a iirira emiguwa emiyaka, n'a musibisya egyo, n'a mukoba nti Abafirisuuti bakugwireku, Samusooni. Era abateegi babbaire bali mu nyumba ey'o munda. N'a gikutula ku mikono gye ng'e wuzi. ¹³ Derira n'a koba Samusooni nti okutuusya atyanu onduulira era ombeya bubbeyi: nkobera ekisobola okukusiba. N'a mukoba nti bwewaluka emivumbo egy'o ku mutwe gwange omusanvu n'e ngoye egirukibwa. ¹⁴ N'agisibira dala n'o lubambo n'a mukoba nti Abafirisuuti bakugwireku, Samusooni. N'a zuuka mu ndoolo gye, n'a kwakula olubambo lw'o musaale ogulukirwaku, n'e ngoye egirukibwa. ¹⁵ N'a mukoba nti osobola otya okutumula nti nkutaka, omwoyo gwo nga tiguli nanze? wakanduulira emirundi gino isatu, so okaali kunkobera amaani go amangi mwe gasibuka. ¹⁶ Awo olwatuukire bwe yamwetayiriranga buli lunaku n'e bigambo bye n'a mwegayiriranga, obulamu bwe ne butaka okufa enaku. ¹⁷ N'a mukobera byonabyona (ebyabbaire mu) mwoyo gwe, n'a mukoba nti akamwanu tekabitanga ku mutwe gwange; kubanga ndi Muwonge eri Katonda okuva mu kida kya mawange: bwe ndibba nga mwereibwe, amaani gange kaisi ni ganvaaku, ni nfuuka munafu, ni mba ng'o musaiza ogondi yenayena. ¹⁸ Derira bwe yaboine ng'a mukobeire byonabyona (ebibbaire mu) mwoyo gwe, n'atuma n'a yeta abakungu b'Abafirisuuti ng'a tumula nti mwambuke omulundi guno gwonka, kubanga ankobeire byonabyona (ebibbaire mu) mumwoyo gwe. Awo abakungu b'Abafirisuuti kaisi ni baambuka gy'ali nga baleeta efeeza mu ngalo gyabwe. ¹⁹ N'a mugonia ku makumbo ge; n'a yeta omusaiza, n'a mwa emivumbo egy'o ku mutwe gwe omusanvu; n'a tandika okumujeezya, amaani ge ni gamuvaaku. ²⁰ N'a tumula nti Abafirisuuti bakugwireku, Samusooni. N'a zuuka mu ndoolo gye n'atumula nti nafuluma ng'o bw'eira, ni niyekunkumula. Naye yabbaire tamaite nga Mukama amulekere. ²¹ Awo Abafirisuuti ni bamukwata, ne batoolamu amaiso ge; ne bamuserengetya e Gaza, ne bamusibya enjegere gy'e bikomo: n'a syeeranga mu nyumba ey'e nkomera. ²² Naye enziiri egy'o ku mutwe gwe ni gitandika okumera bwe yamalire okumwebwa. ²³ Awo abakungu b'Abafirisuuti ni bakuŋaana okuwaayo sadaaka enene eri Dagoni katonda wabwe n'o kusanyuka: kubanga batumwire nti Katonda waisu agabwire Samusooni omulabe waisu mu mukono gwaisu: ²⁴ Awo abantu bwe bamuboine ni batendereza katonda wabwe: kubanga batumwire nti Katonda waisu agabwire omulabe waisu mu mukono gwaisu, era omuzikirirya w'e nsi y'e waisu, eyatwitireku abangi. ²⁵ Awo olwatuukire emyoyo gyabwe bwe gyabbaire gisanyukire, ne batumula nti mwete Samusooni atulogyereku. Ni beeta Samusooni okumutoola mu nyumba ey'e ikomera: n'a baloogyeraku (ng'ali) mu maiso gaabwe: ne bamuteeka wakati w'empango: ²⁶ Samusooni n'a koba omwisuka eyabbaire amukwaite ku mukono nti ndeka okuwamanta empango egiwanirira enyumba, ngyesigikeku. ²⁷ Era enyumba yabbaire eizwire abasaiza n’a bakali; era abakungu b'Abafirisuuti babbaire bali awo bonabona; ne waigulu ku nyumba kwabbaireku abasaiza n'a bakali ng'e nkumi isatu ababbaire balingirira Samusooni ng'a balogyeraku. ²⁸ Awo Samusooni n'a kungira Mukama n'atumula nti Ai Mukama Katonda, njijukira, nkwegayirira, ompe amaani, nkwegayirira, omulundi guno gwonka, ai Katonda, mpalane eigwanga mangu ago ku Bafirisuuti olw'a maiso gange gombiri. ²⁹ Samusooni n'a kwata empango gyombiri egya wakati egyawaniriire enyumba, n'a gyesigikaku, omukono gwe omulyo nga guli ku imu, n'o mugooda nga guli ku gendi: ³⁰ Samusooni n'a tumula nti nfiire wamu n'Abafirisuuti. N'a kutama n'a maani ge gonagona; enyumba n'egwa ku bakungu n'o ku bantu bonabona ababbaire omwo. Batyo abaafiire be yaitiire mu kufa kwe babbaire bangi okusinga be yaitire nga mulamu. ³¹ Awo bagande be n'e nyumba yonayona eya itaaye ne baserengeta ne bamutwala, ne bamwambukya, ni bamuziika wakati w’e Zola ne Esutaoli mu kifo eky'o kuziikangamu ekya Manowa itaaye. Era yalamuliire Isiraeri emyaka abiri.