¹ Musanyukire, musanyukire abantu bange, bw'atumula Katonda wanyu. ² Mutumule eby'okusanyusa Yerusaalemi, mumukoowoole nti entalo gye gimalirizibwe, ng'obutali butuukirivu bwe busonyiyiibwe; ng'aweweibwe mu mukono gwa Mukama emirundi ibiri olw'ebibbiibi bye byonabyona. ³ Eidoboozi lyatumuliire waigulu nti Mulongoosye mu lukoola engira ya Mukama, mugololere mu idungu Katonda waisu oluguudo. ⁴ Buli kiwonvu kirigulumizibwa, na buli lusozi n'akasozi biriikaikanyizibwa: n'obukyamu buligololwa, n'ebifo ebitali bisende biritereezebwa ⁵ n'ekitiibwa kya Mukama kiribiikulibwa, ne bonabona abalina omubiri balikibonera wamu: kubanga omunwa gwa Mukama niigwo gukitumwire. ⁶ Eidoboozi lyatumwire nti tumulira waigulu. Ne wabbaawo eyatumwire nti Natumulira ki waigulu? Omubiri gwonagwona mwido, n'obusa bwagwo bwonabwona buli sooti ekimuli eky'omu nimiro: ⁷ omwido guwotoka, ekimuli kiyongobera; kubanga omwoka gwa Mukama gugufuuwaku: mazima abantu mwido: ⁸ Omwido guwotoka, ekimuli kiyongobera: naye ekigambo kya Katonda waisu kyanyweranga enaku gyonagyona. ⁹ Niiwe akobera Sayuuni ebigambo ebisa, weniiniire ku lusozi oluwanvu; iwe akobera Yerusaalemi ebigambo ebisa, yimusya eidoboozi lyo n'amaani; liyimusye, totya; koba ebibuga by'e Yuda nti bona, Katonda wanyu! ¹⁰ Bona, Mukama Katonda aliiza ng'ow'amaani, n'omukono gwe gulimufuga: bona empeera ye eri naye, n'okusasula kwe kuli mu maiso ge. ¹¹ Aliriisya ekisibo kye ng'omusumba, alikuŋaanya abaana b'entama mu mukono gwe, n'abasitula mu kifubba kye, alibitirirya mpola egyo egiyonsya. ¹² Yani eyabbaire ayabire amaizi mu kibatu kye, n'apima eigulu n'olugalo, n'agaita enfuufu ey'oku nsi mu kigera, n'apima ensozi mu minzaani n'obusozi mu kipimo? ¹³ Yani eyabbaire aluŋamizirye omwoyo gwa Mukama, oba eyamuweereire ebigambo n'amwegeresya? ¹⁴ Yani gwe yabbaire ateeserya naye ebigambo, era yani eyabbaire amwegeresya, n'amutegeeza mu ngira ey'omusango, n'amunyonyola okumanya, n'amulaga engira ey'okutegeera? ¹⁵ Bona, amawanga gali ng'eitondo eriri mu nsuwa, era babalibwa ng'eifufuge eri mu minzaani: bona, asitula ebizinga ng'ekintu ekitono einu. ¹⁶ Ne Lebanooni tamala kubba nku, so n'ensolo gyaku tegimala kubba ekiweebwayo ekyokyebwa. ¹⁷ Amawanga gonagona gali nga ti kintu mu maiso ge; gabalibwa gy'ali nga ti kintu dala era nga kirerya. ¹⁸ Kale yani gwe mulifaananya Katonda: oba kifaananyi ki kye mulimugereraku? ¹⁹ Ekifaananyi ekyole omukozi akifumba, n'omuweesi w'e zaabu akibiikaku zaabu, n'akifumbira emiguufu egy'e feeza. ²⁰ Ayingire obwavu n'okusobola n'atasobola kirabo ekyekankana awo yeerobozya omusaale ogutalivunda; yeesagirira omukozi omugezigezi okusimba ekifaananyi ekyole, ekitaliijulukuka. ²¹ Mukaali kumanya? Mukaali kuwulira? temuwulirirwanga okuva ku luberyeberye, temutegeeranga okuva ku kutondebwa kw'ensi? ²² Niiye oyo atyama ku nsi eneekulungirivu, n'abagityamamu bali sooti madeede; atimba eigulu ng'ejiji, era alibamba ng'eweema ey'okutyamamu: ²³ afuula abalangira obutabba kintu; afuula abalamuzi b'ensi okubba enfeera. ²⁴ Niiwo awo, tebasimbibwanga Niiwo awo, tebasigibwanga; niiwo awo, ekikolo kyabwe tekisimbanga mizi mu itakali; era abafuuwaku ne bawotoka, n'empunga egy'akampusi ne gibatwalira dala ng'ebisusunku. ²⁵ Kale yani gwe mulinfaananya nze okumwekankana? bw'atumula Omutukuvu. ²⁶ Muyimusye amaiso ganyu waigulu mubone eyatondere ebyo bw'ali, afulumya eigye lyabyo ng'omuwendo gwabwe bwe guli: byonabyona abituuma amaina; olw'obukulu bw'obuyinza bwe, era kubanga wa maani mu kusobola, wabula na kimu ekibulaku. ²⁷ Ekikutumulya ki, iwe Yakobo, n'okoba, iwe Isiraeri, nti engira yange mugisiibwe Mukama, n'omusango gwange gubitire ku Katonda wange? ²⁸ Okaali kumanya? Okaali kuwulira? Katonda ataliwaawo, Mukama, Omutondi w'enkomerero gy'ensi, tazirika so takoowa; amagezi ge tegasagirika. ²⁹ Awa amaani abazirika; n'oyo abula buyinza amwongeraku amaani. ³⁰ Abavubuka boona balizirika balikoowa, n'abaisuka baligwira dala: ³¹ naye abo abalindirira Mukama baliiramu buyaka amaani gaabwe; balitumbiira n'ebiwawa ng'eikookooma; balipyata embiro ne batakoowa; balitambula ne batazirika.