¹ Musirike mu maiso gange, imwe ebizinga, amawanga gairemu obuyaka amaani gaabwe: basembere; Kaisi batumule: tusembere wamu eri omusango. ² Yani ayimusirye omuntu ava ebuvaisana, gw'ayeta mu butuukirivu okwiza ku kigere kye? Agaba amawanga mu maiso ge, era amufugisya bakabaka; abawa ekitala kye ng'enfuufu, ng'ebisasiro ebikuŋunsibwa eri omutego gwe. ³ Abagoba n'abitawo mirembe; abita mu ngira gy'atabitangamu n'ebigere bye. ⁴ Yani eyakireetere eyakikolere, ng'ayeta emirembe okuva ku luberyeberye? Ninze Mukama ow'oluberyeberye era ow'enkonerero, ninze oyo. ⁵ Ebizinga byabona ne bitya; enkomerero gy'ensi gyatengeire: basembeire ne baiza. ⁶ Bayambire buli muntu muliraanwa we; buli muntu n'akoba mugande we nti guma omwoyo. ⁷ Awo omubaizi n'agumya omwoyo omuweesi w'e zaabu, n'oyo asenyenta n'enyundo n'agumya oyo akubba ku lubaale, ng'atumula ku kyoma ekigaita nti kisa: n'akikomereire n'eninga kireke okusagaasagana. ⁸ Naye iwe, Isiraeri, omwidu wange, Yakobo gwe nalondere, eizaire lya Ibulayimu mukwanu gwange; ⁹ gwe nakwaiteku okuva ku nkomerero gy"ensi ne nkweta okukutoola mu nsonda gyayo, ne nkukoba nti iwe mwidu wange, nakulondere so tinkusuulanga; ¹⁰ totya, kubanga nze ndi wamu naiwe; tokeŋentererwa, kubanga ninze Katonda wo: nakuwanga amaani; niiwo awo, nakuyambanga; niiwo awo, nakuwaniriranga n'omukono omulyo ogw'obutuukirivu bwange. ¹¹ Bona, abo bonabona abakusunguwaliire balikwatibwa ensoni baliswazibwa: abo abawakaine naiwe balibba nga ti kintu, era baligota. ¹² Olibasagira so tolibabona abo abakuziyizya: abo abalwana naiwe balibba nga ti kintu era ng'efeera. ¹³ Kubanga ninze Mukama Katonda wo nakwatanga ku mukono gwo omulyo nga nkukoba nti totya; ninze nakuyambanga. ¹⁴ Totya, iwe omusioni Yakobo, naimwe abasaiza ba Isiraeri; ninze nakuyambanga, bw'atumula Mukama, era Omutukuvu wa Isiraeri niiye mununuzi wo. ¹⁵ Bona, ndikufuula ekintu ekiwuula ekiyaka eky'obwogi ekirina amainu: iwe oliwuula ensozi, n'ogisyeera dala, n'ofuula obusozi okubba ng'ebisusunku. ¹⁶ Oligiwuja, empewo n'egifuumuula, empunga egy'akampusi ne gigisaansaanya: naiwe olisanyukira Mukama, olyenyumiririrya Omutukuvu wa Isiraeri. ¹⁷ Abaavu n'ababula kintu basagira amaizi so nga wabula, olulimi lwabwe ne lulakasira; ninze Mukama ndibairamu, ninze Katonda wa Isiraeri tindibaleka. ¹⁸ Ndizibikula emiiga ku nsozi egy'e wanza n'ensulo wakati mu biwonvu: ndifuula olukoola ekidiba ky'amaizi, n'eitakali eikalu okubba ensulo gy'amaizi. ¹⁹ Ndisimba mu lukoola omuvule n'omusita n'omumwanyi n'omuzeyituuni; nditeeka mu idungu enfugo n'omuyovu ne namukago wamu: ²⁰ babone, bamanye, balowooze, bategeere wamu ng'omukono gwa Mukama niigwo gukolere kino, era nga Omutukuvu wa Isiraeri niiye akitondere. ²¹ Muleete ensonga yanyu, bw'atumula Mukama; mwolesye ensonga gyanyu egy'amaani, bw'atumula Kabaka wa Yakobo. ²² Bagireete, batukobere ebyaba okubbaawo: mubuulire ebyasookere okubbaawo bwe biri, tubirowooze tutegeere enkomerero yaabyo ey'oluvanyuma; oba mutulage ebyaba okwiza. ²³ Mubuulire ebigambo ebiiza okubbaawo oluvanyuma, kaisi tutegeere nga muli bakatonda: niiwo awo, mukole obusa oba mukole obubbiibi tukeŋentererwe tukibonere wamu. ²⁴ bona, mubulaku gye muva, so n'omulimu gwanyu gubulaku gye guva: oyo abalonda w'o muzizo. ²⁵ Nyimusirye omuntu ava obukiika obugooda, era atuukire; okuva ebuvaisana omuntu ayeta eriina lyange: era aliiza ku bafuga nga ku itakali, era ng'omubbumbi bw'asamba eibbumba. ²⁶ Yani eyakibuuliire okuva ku luberyeberye Kaisi tumanye? era mu biseera eby'eira kaisi tutumule nti Mutuukirivu? Niiwo awo, wabula abuulira, niiwo awo, wabula alaga, niiwo awo, wabula awulira ebigambo byanyu. ²⁷ Ndisooka okukoba Sayuuni nti Babone, babone; era ndiwa Yerusaalemi omuntu aleeta ebigambo ebisa. ²⁸ Era bwe moga, wabula muntu; mu ibo beene mubula ateesya ebigambo, asobola okwanukula ekigambo bwe mbabuulya. ²⁹ bona, ibo bonabona emirimu gyabwe nfeera so ti kintu: ebifaananyi byabwe ebyole mpewo no kwetabula.