¹ Mu biseera ebyo Merodakubaladani mutaane wa Baladani, kabaka w'e Babulooni, n'aweererya Keezeekiya ebbaluwa n'ekirabo: kubanga yawuliire nga yabbaire alwaire era ng'awonere. ² Keezeekiya n'abasanyukira, n'abalaga enyumba ey'ebintu bye eby'omuwendo omungi, efeeza n'e zaabu n'eby'akaloosa n'amafuta ag'omuwendo omungi, n'enyumba yonayona ey'eby'okulwanisya bye, ne byonabyona ebyabonekere mu bugaiga bwe: tewabbaire kintu mu nyumba ye waire mu matwale ge gonagona Keezeekiya ky'ataabalagire. ³ Awo Isaaya nabbi n'aiza eri kabaka Keezeekiya n'amukoba nti Abasaiza bano batumwire ki? era baava waina okwiza gy'oli? Keezeekiya n'atumula nti baviire mu nsi ye wala okwiza gye ndi, baaviire Babulooni. ⁴ Awo n'atumula nti Baboine ki mu nyumba yo? Keezeekiya n'airamu nti byonabyona ebiri mu nyumba yange babiboine: Wabula kintu mu bugaiga bwange kye ntabalagire. ⁵ Awo Isaaya n'akoba Keezeekiya nti wulira ekigambo kya Mukama ow'eigye, ⁶ Bona, enaku giiza byonabyona ebiri mu nyumba yo n'ebyo baitaawo bye bagisanga okutuusya atyanu lwe biritwalibwa e Babulooni: tewalibba kintu ekirisigalawo, bw'atumula Mukama. ⁷ N'o ku bataane bo abaliva mu iwe b'olizaala balibatwalaku; era balibba balaawe mu lubiri lwa kabaka w’e Babulooni. ⁸ Awo Keezeekiya n'akoba Isaaya nti ekigambo kya Mukama ky'otumwire kisa. Era n'atumwire nti Kasita wabbanga emirembe n'amazima mu mirembe gyange.