¹ Mu biseera ebyo Keezeekiya n'alwala kumpi n'okufa. Isaaya nabbi mutaane wa Amozi n'aiza gy'ali n’amukoba nti Atyo bw'atumula Mukama nti Teekateeka enyumba yo; kubanga oyaba kufa so toyaba kulama. ² Awo Keezeekiya n'akyusirya amaiso ge ku kisenge ne yeegayirira Mukama n'atumula nti ³ Ijukira atyanu, Ai Mukama, nkwegayiriire, bwe natambuliranga mu maiso go n'amazima n'omwoyo ogwatuukiriire, ne nkola ebiri mu maiso go ebisa. Keezeekiya n'akunga inu amaliga. ⁴ Awo ekigambo kya Mukama ne kiizira Isaaya nti ⁵ Yaba okobe Keezeekiya nti atyo bw'atumula Mukama, Katonda wa Dawudi itaawo, nti mpuliire okusaba kwo, Mboine amaliga go: bona, ndyongera ku naku gyo emyaka ikumi n'aitaanu. ⁶ Era ndikuwonya iwe n'ekibuga kino mu mukono gwa kabaka w'e Bwasuli: era ndirwanirira ekibuga kino. ⁷ Era kano niiko kaabba kabonero gy'oli okuva eri Mukama nga Mukama alikola ekigambo kino ky'atumwire: ⁸ bona, nairyaayo enyuma ekiwolyo ekiri ku madaala, ekiikiire ku madaala ga Akazi awamu, n'eisana, eibbanga ery'amadaala eikumi. Awo eisana n'eriirayo eibbanga ery'amadaala ikumi ku madaala ge lyabbaire liikiireku. ⁹ Okuwandiika kwa Keezeekiya kabaka we Yuda, bwe yamalire okulwala era ng'awonere endwaire ye. ¹⁰ N'atumura nti Mu iwangwe ly'enaku gyange mwe ndyabira mu miryango gy'emagombe: Ntoleibweku emyaka gyange egisigaireyo. ¹¹ N'atumula nti tindibona Mukama, Mukama mu nsi y'abalamu: tindibona bantu ate wamu n'abatyama mu nsi. ¹² Ebiseera byange biviirewo, era binjigairweku ng'eweema ey'omusumba: Nzingire obulamu bwange ng'omuluki w'engoye; alinsala ku musaale ogulukirwaku: Okuva amakeeri okutuukya obwire olimalirawo dala. ¹³ Neesirikya okutuukya amakeeri; ng'empologoma, bw'amenya gatyo amagumba gange gonagona: Okuva amakeeri okutuukya obwire olimalirawo dala. ¹⁴ Ng'emiini oba lugaaga, bwe lwavulungutana ntyo; Nawuubaala nga kaamukuukulu: amaiso gange gafuuyirira olw'okulalama; Ai Mukama, njoogebwa; iwe bba mwema wange. ¹⁵ Ntumula ntya? yatumwire nanze era iye mwene niiye akikolere: Naatambulanga mpola emyaka gyange gyonagona olw'okusaata kw'obulamu bwange. ¹⁶ Ai Mukama, olw'ebyo abantu babba balamu, Era mu ebyo mwonka niimwo muli obulamu bw'omwoyo gwange: Kale mponya onamye. ¹⁷ Bona, olw'emirembe gyange kyenaviire nsatwa inu: Naye iwe olw'okutaka obulamu bwange obuwonyerye mu bwina obufundirwamu; Kubanga oswire ebibbiibi byange byonabyona enyuma w'amabega go. ¹⁸ Kubanga amagombe tigasobola kukutendereza, okufa tikusobola kukusuuta: Abo abaika mu bwina tebasobola kusuubira mazima go. ¹⁹ Omulamu, omulamu niiye alikutendereza nga nze bwe nkola atyanu Itawabwe alitegeeza abaana amazima go. ²⁰ Mukama yeeteekereteekere okundokola: Kyetwavanga twembera enyembo gyange mu nanga enaku gyonagona egy'obulamu bwaisu mu nyumba ya Mukama. ²¹ Era Isaaya yabbaire atumwire nti Bairire ekitole ky'eitiini bakisiige ku iyute, era aliwona. ²² N'o Keezeekiya yabbaire atumwire nti Kaliwa akabonero nga ndyambuka mu nyumba ya Mukama?