¹ Awo olwatuukire kabaka Keezeekiya bwe yakiwuliire n'akanula engoye gye n'avaala ebinyakinyaki n'ayingira mu nyumba ya Mukama. ² N'atuma Eriyakimu eyabbaire omukulu w'enyumba n'o Sebuna omuwandiiki n'abakaire ab'oku bakabona, nga bavaire ebinyakinyaki, eri Isaaya nabbi mutaane wa Amozi. ³ Ne bamukoba nti Atyo bw'atumula Keezeekiya nti Olunaku luno lunaku lw'o kuboneramu naku era lw'o kunenyezebwamu era lw'o kuvumirwamu: kubanga abaana batuukire okuzaalwa, so wabula maani g'o kuzaala. ⁴ Koizi Mukama Katonda wo yawulira ebigambo bya Labusake, kabaka w'e Bwasuli mukama we gw'atumire okuvuma Katonda omulamu, n'anenya ebigambo Mukama Katonda wo by'awuliire: kale yimukirya okusaba kwo ekitundu ekifiikirewo. ⁵ Awo abaidu ba kabaka Keezeekiya ne baiza eri Isaaya. ⁶ Isaaya n'abakoba nti Mutyo bwe mwakoba mukama wanyu nti Atyo bw'atumula Mukama nti totya bigambo by'owuliire, abaidu ba kabaka w’e Bwasuli bye banvumire. ⁷ bona, ndimuteekaku omuzimu, yena aliwulira olugambo n'airayo mu nsi ye; era ndimusuula n'ekitala mu nsi ye iye. ⁸ Awo Labusake n'airayo n'asanga kabaka w'e Bwasuli ng'alwana no Libuna: kubanga yabbaire awuliire nga yasitwiire e Lakisi. ⁹ N'awulira nga batumula ebya Tiraka kabaka w'e Kuusi, nti Atabaire okulwana naiwe. Awo bwe yakiwuliire n'atuma ababaka eri Keezeekiya ng'atumula nti ¹⁰ Mutyo bwe mulikoba Keezeekiya kabaka we Yuda nga mutumula nti Katonda wo gwe weesiga takubbeeyanga ng'atumula nti Yerusaalemi tekirigabulwa mu mukono gwa kabaka w'e Bwasuli. ¹¹ bona, owuliire bakabaka b'e Bwasuli bye baakolanga ensi gyonagyona, nga bagizikiririirye dala: weena oliwonyezebwa? ¹² Bakatonda ab'amawanga bagawonyerye, baitawange ge baazikirizirye, Gozani n'o Kalani n'o Lezefu n'abaana ba Edeni abaabbanga mu Terasali? ¹³ Ali waina kabaka w'e Kamasi n'o kabaka w'e Alupadi n'o kabaka w'ekibuga Sefavayimu ow'e Keena n'o Yiva? ¹⁴ Keezeekiya n'atoola ebaluwa mu mukono gw'ababaka n'agisoma: Keezeeluya n'ayambuka mu nyumba ya Mukama n'agyanjululirya mu maiso ga Mukama. ¹⁵ Keezeekiya ne yeegayirira Mukama ng'atumula nti ¹⁶ Ai Mukama ow'eigye, Katonda wa Isiraeri, atyama ku bakerubi, niwe Katonda, niiwe wenka, w'o bwakabaka bwonabona obw'omu nsi; niiwe wakolere eigulu n'ensi. ¹⁷ Tega ekitu kyo, ai Mukama, owulire; zibula amaiso go, Ai Mukama, obone: owulire ebigambo byonabyona ebya Senakeribu, by'atumire okuvuma Katonda omulamu. ¹⁸ Mazima, Mukama, bakabaka b’e Bwasuli bazikirye amawanga gonagona n'ensi yaabwe, ¹⁹ ne basuula bakatonda baabwe mu musyo: kubanga tebabbaire bakatonda, naye mulimu gwe ngalo gya bantu, musaale na mabbaale; kyebaaviire babazikirirya. ²⁰ Kale atyanu, ai Mukama Katonda waisu, tulokole mu mukono gwe, obwakabaka bwonabona obw'omu nsi butegeere nga niiwe Mukama, niiwe wenka. ²¹ Awo Isaaya mutaane wa Amozi n'atumira Keezeekiya ng'atumula nti atyo bw'atumula Mukama, Katonda wa Isiraeri, nti Kubanga oneegayiriire ebya Senakeribu kabaka w'e Bwasuli, ²² kino niikyo kigambo Mukama ky'atumwire ku iye: Omuwala wa Sayuuni atamaite musaiza akunyoomere era akugaidirye; omuwala wa Yerusaalemi akusiisiikiirye omutwe. ²³ Yani gw'ovumire gw'ovoire? era yani gw'oyimusiriiryeku eidoboozi lyo n'olalama amaiso go waigulu? ku Mutukuvu wa Isiraeri. ²⁴ Oyemere mu baidu bo okuvuma Mukama n'otumula nti N'amagaali gange amangi nyambukire ku ntiiko y'olusozi, ntuukire mu njuyi egy'omunda egy'e Lebanooni; era nditemera dala emivule gyaku emiwanvu, n'enfugo gyaku egisinga obusa: era ndituuka ku lusozi lwaku olukomererayo, ekibira eky'enimiro ye enjimu. ²⁵ Nsimiire era nywire amaizi, era ndikalirya emiiiga gyonagyona egy'e Misiri n'ebigere byange: ²⁶ Towuliranga bwe nakikolere eira einu ne nkibbumba okuva ebiseera eby'eira? Atyanu nkituukiriirye iwe okubba omuzikirirya w'ebibuga ebiriku enkomera obifuule ebifunvu eby'ebyagwire: ²⁷ Abaabityamangamu kyebaaviire babba ab'amaani amatono, baatekemuka ne bakeŋentererwa; ne babba ng'eisubi ery'omu nimiro era ng'omwido omubisi, ng'omwido oguli waigulu ku nyumba, era ng'omusiri gw'eŋaanu nga ekaali kukula. ²⁸ Naye maite bw'otyama era bw'ofuluma era bw'oyingira era bwewesaliraku akajegere. ²⁹ Kubanga wesaliraku akajegere era kubanga eititimbuli lyo liniinire mu matu gange, kyendiva nteeka eirobo lyange mu nyindo yo n'olukoba lwange mu munwa gwo, era ndikwiryayo mu ngira ye waiziramu. ³⁰ Era kano niiko kalibba akabonero gy'oli: mulirya mu mwaka guno ekyo ekimera kyonka, n'o mu mwaka ogw'okubiri ekyo kye gumera; n'o mu mwaka ogw'okusatu musiganga mukungulanga musimbanga ensuku gy'emizabbibu mulyanga ebibala byamu. ³¹ N'ekitundu ekifiikirewo ekiwonere ku nyumba ya Yuda balisimba emizi wansi ne babala ebibala waigulu. ³² Kubanga mu Yerusaalemi muliva ekitundu ekifiikirewo, n'o ku lusozi Sayuuni abo abaliwona: eiyali lya Mukama ow'eigye bulituukirirya ekyo. ³³ Mukama kyava atumula ku kabaka w'e Bwasuli nti Talityama ku kibuga kino, so talirasaayo kasaale, so talikyolekera n'engabo, so talikituumaku kifunvu. ³⁴ Mu ngira mwe yaiziire omwo mw'aliirirayo, so talituuka ku kibuga kino, bw'atumula Mukama. ³⁵ Kubanga ndirwanirira ekibuga kino okukirokola ku bwange nze era n'o ku bw'omwidu wange Dawudi. ³⁶ Awo malayika wa Mukama n'afuluma n'alekula mu lusiisira olw'Abaasuli kasiriivu mu obukumi munaana mu enkumi itaanu: abantu bwe baagolokokere amakeeri mu makeeri, bona, bonabona babbaire mirambo gya bafu. ³⁷ Awo Senakeribu kabaka w’e Bwasuli n'avaayo n'ayaba n'airayo, n'abba e Nineeve. ³⁸ Awo olwatuukire bwe yabbaire ng'asinzirya mu kiigwa kya Nisuloki katonda we, Adulamereki n'o Salezeri bataane be ne bamwita n'ekitala: ne bairukira mu nsi ye Alalati. Esaludooni mutaane we n'amwiira mu bigere.