¹ Mu mwezi ogw'okusatu oluvannyuma abaana ba Isiraeri nga bamalire okuva mu nsi ey'e Misiri, ku lunaku ludi ne batuuka mu idungu lya Sinaayi. ² Bwe baaviire mu Lefidimu ne batuuka mu idungu lya Sinaayi, ne bakubba eweema mu idungu; Isiraeri n'asiisira wadi mu maiso g'olusozi. ³ Musa n'aniina eri Katonda, Mukama n'amweta ng'ayema ku lusozi, ng'atumula nti Otyo bw'olibakoba enyumba ya Yakobo, n'obakobera abaana ba Isiraeri ⁴ nti Mwaboine bye nakolere Abamisiri, era bwe nasitwire imwe n'ebiwaawaatiro by'empungu era bwe nabaleetere gye ndi. ⁵ Kale, atyanu, bwe mwawuliranga eidoboozi lyange dala, ne mukwata endagaanu yange, bwe mutyo mwabbanga ekintu kyange ekiganzi imwe mu mawanga gonagona kubanga ensi yonayona yange: ⁶ naimwe mulimbeerera obwakabaka bwa bakabona, n'eigwanga eitukuvu. Bino niibyo bigambo by'olibakobera abaana ba Isiraeri. ⁷ Musa n'aiza n'ayeta abakaire ab'abantu, n'ateeka mu maiso gaabwe ebigambo bino byonabyona Mukama bye yamulagire. ⁸ Abantu bonabona ne bairamu awamu ne batumula nti Byonabyona bye yatumula Mukama tulibikola. Musa n'aleeta ate ebigambo by'abantu eri Mukama. ⁹ Mukama n'amukoba Musa nti Bona, ngiza gy'oli mu kireri ekizimbire, abantu bawulire bwe ntumula naiwe, era bakwikirirye enaku gyonagyona. Musa n'akobera Mukama ebigambo eby'abantu. ¹⁰ Mukama n'akoba Musa nti yaba eri abantu, obatukulye watyanu ne n'eizo, era booze engoye gyabwe, ¹¹ beeteketeeke okutuusya olunaku olw'okusatu: kubanga ku lunaku olw'okusatu Mukama aliika mu maiso g'abantu bonabona ku lusozi Sinaayi. ¹² Weena olibateekera abantu ensalo enjuyi gyonagyona, ng'otumula nti Mwekuume, muleke okuniina ku lusozi waire okukwata ku nsalo yaalwo: buli alikwata ku lusozi, talireka kwitibwa: ¹³ omukono gwonagwona guleke okumukwataku, yeena talireka kukubbibwa mabbale oba kusumitwa; oba ensolo, oba muntu, talibba mulamu: eŋombe bw'erivuga einu, balisemberera olusozi. ¹⁴ Musa n'aika ng'ava mu lusozi ng'aiza eri abantu, n'atukulya abantu; ne booza engoye gyabwe. ¹⁵ N'akoba abantu nti Mweteekereteekere alunaku olw'okusatu: temusemberera mukali. ¹⁶ Awo ku lunaku olw'okusatu, bwe bwakyeire amakeeri, ne wabba okubwatuka n'okumyansa, n'ekireri ekizimbire ku lusozi, n'eidoboozi ery'eŋombe einene einu; awo abantu bonabona ababbaire mu lusiisira ne bakankana. ¹⁷ Musa n'aleeta abantu okuva mu lusiisira basisinkane Katonda; ne bemerera wansi w'olusozi. ¹⁸ Olusozi Sinaayi lwonalwona ne lunyooka omwoka, kubanga Mukama yalwikiireku mu musyo: omwoka gwalwo ne gunyooka ng'omwoka gw'ekikoomi, olusozi lwonalwona ne lutengera inu. ¹⁹ Eidoboozi ly'eŋombe bwe lyavugire ne lyeyongera inu, Musa n'atumula, Katonda n'amwiramu n'eidoboozi. ²⁰ Mukama n'aika ku lusozi Sinaayi, ku ntiiko y'olusozi; Mukama n'ayeta Musa okuniina ku ntiiko y'olusozi: Musa n'aniina. ²¹ Mukama n'akoba Musa nti Serengeta, olagire abantu, baleke okuwaguza eri Mukama okwekalisisya n'amaiso, abantu bangi baleke okugota mu ibo. ²² Era na bakabona abasembereire Mukama, beetukulye, Mukama aleke okugwa ku ibo. ²³ Musa n'akoba Mukama nti Abantu tebasobola kuniina ku lusozi Sinaayi: kubanga watulagiire, ng'otumula nti Teeka ensalo okwetooloola olusozi, era olutukulye. ²⁴ Mukama n'amukoba nti Yaba, oserengete; weena oliniina, iwe na Alooni wamu naiwe; naye bakabona n'abantu baleke okuwaguza okuniina eri Mukama, aleke okugwa ku ibo. ²⁵ Awo Musa n'aserengeta eri abantu, n'abakobera.