¹ Yesero, kabona we Midiyaani, muko wa Musa, n'awulira byonabyona Katonda bye yakoleire Musa ne Isiraeri abantu be, nti Mukama yatoiremu Isiraeri mu Misiri. ² Yesero, muko wa Musa, n'atwala Zipola, mukali wa Musa, bwe yamubbingire, ³ iye n'abaana be babiri; eriina ly'omumu mu ibo Gerusomu; kubanga yatumwire nti Nabbaire mugeni mu nsi etali yange: ⁴ n'eriina ery'ogondi Eryeza; kubanga yatumwire nti Katonda wa itawange yabbaire mubbeeri wange n'amponya mu kitala kya Falaawo: ⁵ Yesero, muko wa Musa, n'aiza n'abaana be no mukali we eri Musa mu idungu eryo gye yagonere ku lusozi lwa Katonda: ⁶ n'akoba Musa nti Niize muko wo Yesero ngizire gy'oli no mukali wo n'abaana be bombiri wamu naye. ⁷ Musa n'avaayo okusisinkana muko we, n'akutama, n'amunywegera; ne basugiryagana nti Oli otya? ne bayingira mu weema. ⁸ Musa n'akobera muko we byonabyona Mukama bye yakolere Falaawo n'Abamisiri ku lwa Isiraeri, ebizibu byonabyona ebyababbaireku mu ngira, era Mukama bwe yabawonyerye. ⁹ Yesero n'asanyuka ku lw'obusa bwonabwona Mukama bwe yakolere Isiraeri, kubanga yabalokoire mu mukono gw'Abamisiri. ¹⁰ Yesero n'atumula nti Yeebazibwe Mukama eyabalokoleire mu mukono gw'Abamisiri, no mu mukono gwa Falaawo; eyalokoire abantu mu mukono gw'Abamisiri. ¹¹ Atyanu ntegeire nti Mukama niiye mukulu okusinga bakatonda bonabona: Niiwo awo mu kigambo mwe beenyumiririrya ku ibo. ¹² Yesero muko wa Musa, n'atwala ekiweebwayo ekyokebwa ne Sadaaka eri Katonda: Alooni n'aiza, n'abakaire bonabona aba Isiraeri, balye emere awamu no muko wa Musa mu maiso ga Katonda. ¹³ Awo olwatuukire amakeeri Musa n'atyama okubalamula abantu: abantu ne bemerera nga beetooloire Musa okusooka amakeeri okutuukya olweigulo. ¹⁴ Muko wa Musa bwe yaboine byonabyona bye yakoleire abantu, n'atumula nti Kiki kino ky'okolera abantu? Lwaki iwe wenka niiwe otyaime, abantu ne babba nga bemereire okukwebungulula, okuva amakeeri okuzibya obwire. ¹⁵ Musa n'akoba muko we nti Kubanga abantu baiza gye ndi okubuulya Katonda: ¹⁶ bwe babba n'ekigambo, ne baiza gye ndi; nzena mbasaalira omusango omuntu no mwinaye, ne mbategeezya amateeka ga Katonda, n'ebiragiro bye. ¹⁷ Muko wa Musa n'amukoba nti Ekigambo ky'okola ti kisa. ¹⁸ Tolirema kusiriira iwe n'abantu bano abali awamu naiwe: kubanga ekigambo kizitowa okusinga bw'osobola iwe: tosobola kukituukirirya wenka. ¹⁹ atyanu wulira eidoboozi lyange, nakuteeserya ebigambo, Katonda abbe naiwe: obabbeerere abantu eri Katonda, oleete ensonga eri Katonda ²⁰ naiwe olibegeresya amateeka n'ebiragiro, era olibalaga engira ebagwaniire okuyitamu, n'emirimu egibagwaniire okukola. ²¹ Ate olonde mu bantu bonabona abasaiza abasaana, abatya Katonda, ab'amazima, abakyawa amagoba agatali go butuukirivu; obakulye ku ibo, babbe abakulu b'enkumi, n'abakulu b'ebikumi, n'abakulu b'ataanu, n'abakulu b'amakumi: ²² babasalire abantu omusango ebiseera byonabyona: kale buli nsonga enene bagikuleeteranga iwe, naye buli nsonga ntono bagiramulanga bonka: Kityo kyabbanga kyangu ku iwe, nabo betiikanga wamu naiwe. ²³ Bw'olikola ekigambo ekyo, era Katonda bw'alikulagira atyo, kaisi n'osobola okugumiinkiriza iwe, n'abantu abo bonabona balyaba mu kifo kyabwe mu mirembe. ²⁴ Awo Musa n'awulira eidoboozi lyo muko we, n'akola byonabyona bye yatumwire. ²⁵ Musa n'alonda abasaiza abasaaniire mu Isiraeri yenayena, n'abakulya ku bantu, abakulu ab'enkumi, abakulu b'ebikumi, abakulu b'ataanu, n'abakulu b'amakumi. ²⁶ Ne balamulanga abantu ebiseera byonabyona; ensonga enzibu baireeteranga Musa, naye buli nsonga entono baagiramulanga bonka. ²⁷ Musa n'aseebula muko we; n'ayaba mu nsi ye iye.