¹ Musa n'abaana ba Isiraeri kaisi ne bembera Mukama olwembo luno ne batumula nti Ndimwembera Mukama, kubanga yawanguliire dala: Embalaasi n'omwebagali waayo yabiswire mu nyanga. ² Mukama niigo maani gange, era niilwo lwembo lwange, Anfuukiire obulokozi bwange: Ono niiye Katonda wange, nzena ndimutendereza; Niiye Katonda wa itawange, nzena ndimugulumizya. ³ Mukama niiye muzira okulwana: Mukama niilyo eriina lye, ⁴ Amagaali ga Falaawo n'eigye lye yabiswire mu nyanza: N'abakungu be be yalondere basaaniewo mu Nyanza Emyofu. ⁵ Obuliba bubasaanikiire: Baikire mu buliba ng'eibbale. ⁶ Omukono gwo omulyo, Mukama, gulina ekitiibwa mu maani, Omukono gwo omulyo, Mukama, gubbetenta omulabe. ⁷ Era mu bukulu obw'okusinga kwo obasuula abakulumba: Otuma obusuugu bwo, ne bubasiriirya ng'ebisasiro. ⁸ Era n'omwoka ogw'omu nyindo gyo amaizi ganiinisibwa. Ebitaba ne beemerera entuum; Obuliba ne bukwata mu mwoyo ogw'enyanza. ⁹ Omulabe n'atumula nti Nasengererya, naatuuka, naagereka omunyago: Okwegomba kwange kwaikutibwa ku ibo; Naasowola ekitala kyange, omukono gwange gulibazikirirya. ¹⁰ Wakuntirye omuyaga gwo, enyanza n'ebasaanikira: Basaanirewo nga lisasi mu maizi ag'amaani. ¹¹ Yani afaanana nga iwe, Mukama, mu bakatonda? Yani afaanana nga iwe alina ekitiibwa mu butukuvu, Ow'entiisya mu kutenderezebwa, akola amagero? ¹² Wagoloire omukono gwo omulyo, Ensi n'ebamira. ¹³ Iwe mu kisa kyo wabatangiire abantu be wanunwire: N'obaleeta mu maani go okutuuka mu kifo kyo ekitukuvu. ¹⁴ Amawanga gawuliire, ne gatengera: Emitwaalo gyabakwaite abatyama mu Bufirisuuti. ¹⁵ Abakungu ab'omu Edomu kaisi ne beewuunya; Ab'amaani ab'omu Mowaabu, okukankana kubakwata: Abatyama mu Bukanani bonabona bayenjebuka. ¹⁶ Okutekemuka n'entiisya bibagwireku; Mu bukulu obw'omukono gwo batyaime ng'eibbale; Okutuusya abantu bo lwe balisomoka, Mukama, Okutuusya abantu lwe balisomoka be wefunira. ¹⁷ Olibayingirya, olibasimba ku lusozi olw'obusika bwo, Ekifo kye weerongooseirye, Mukama, okutyama omwo, Awatukuvu wo, Mukama, emikono gyo we gyanywezerye. ¹⁸ Mukama alifuga emirembe n'emirembe. ¹⁹ Kubanga embalaasi gya Falaawo ne giyingira wamu n'amagaali ge n'abeebagala mu nyanza, Mukama n'airyawo amaizi ag'omu nyanza ku ibo; naye abaana ba Isiraeri ne batambula ku lukalu wakati mu nyanza. ²⁰ Miryamu, nabbi, mwanyoko Alooni, n'atwala ensaasi mu mukono gwe; abakali bonabona ne bafuluma ne bamusengererya nga balina ensaasi nga bakina. ²¹ Miryamu n'abairamu nti Mumwembere Mukama, kubanga yawanguliire dala; Embalaasi n'omwebagali waayo yabiswire mu nyanza. ²² Musa n'atambulya Isiraeri okuva ku Nyanza Emyufu, ne bavaamu ne batuuka mu idungu lya Suuli; ne baaba enaku isatu mu idungu ne batabona maizi. ²³ Bwe baatuukire e Mala, ne batasonola kunywa ku maizi ge Mala, kubanga gabbaire gakaawa : kyekyaviire kyetebwa eriina lyakyo Mala. ²⁴ Abantu ne bamwemulugunyilya Musa, nga batumula nti Twanywa ki? ²⁵ N'akungira Mukama; Mukama n'amulaga omusaale, n'agusuula mu maizi, amaizi ne gafuuka amasa. Awo we yabalagiriire eiteeka n'e mpisa, n'abakemera awo; ²⁶ n'atumula nti Oba nga oliwulira inu eidoboozi lya Mukama Katonda wo, n'okola obutuukirivu mu maiso ge, n'owulira amateeka ge, n'okwata by'alagira byonabyona, tindikuteekaku iwe endwaire gyanagyona gye nateekere ku Bamisiri: kubanga niinze Mukama akuwonya. ²⁷ Ne batuuka Erimu, awali ensulo gy'amaizi eikumi n'eibiri, n'enkindu ensanvu: ne bagona awo awali amaizi.