¹ Mukama n'amukoba Musa, ng'atumula nti ² Bakobe abaana ba Isiraeri baire enyuma bagone mu maiso ga Pikakirosi, wakati we Migudooli n'enyanza, mu maiso ga Baalizefoni: emitala w'edi muligona ku mbali kwe Nyanza. ³ Falaawo alibatumulaku abaana ba Isiraeri nti Bazingiziibwe mu nsi, eidungu libasibire. ⁴ Nzena Falaawo ndimukakanyakya omwoyo, alibasengererya enyuma waabwe; Nzena ndyefunira ekitiibwa ku Falaawo no ku igye lye lyonalyona; n'Abamisiri balimanya nga ninze Mukama. Batyo bwe bakolere. ⁵ Ne bamukoba kabaka w'e Misiri nti Abantu bairukire: omwoyo gwa Falaawo n'ogw'abaidu be ne gukyukira ku bantu, ne basengererya nti Kiki kino kye tukokolere, okuleka Isiraeri obutatuweererya? ⁶ N'ateekateeka egaali lye, n'atwala abantu be wamu naye: ⁷ n'atwala amagaali lukaaga amalonde, n'amagaali gonagona ag'e Misiri, n'abaami okubba ku igo gonagona. ⁸ Mukama n'akakanyalya omwoyo gwa Falaawo kabaka w'e Misiri, n'asengererya abaana ba Isiraeri: kubanga abaana ba Isiraeri bafulumire n'okwewaana. ⁹ Abamisiri ne basengererya enyuma, embalaasi gyonagyona n'amagaali gonagona aga Falaawo, n'ababe abeebagala embalaasi n'eigye lye, ne babatuukaku nga bagonere kumpi n'enyanza, ku mbali kwa Pikakirosi, mu maiso ga Baalizefoni. ¹⁰ Falaawo bwe yasembeire, abaana ba Isiraeri ne bayimusya amaiso gaabwe, bona, Abamisiri nga babasengererya enyuma waabwe: ne batya inu: abaana ba Isiraeri ne bakungira Mukama. ¹¹ Ne bakoba Musa nti Kubanga wabula magombe mu Misiri kyoviire otuleeta tufiire mu idungu? Kiki ekikutukolerye oti, okututoola mu Misiri? ¹² Kino ti niikyo ekigambo kye twakukobeire mu Misiri, nga tutumula nti Tuleke tuweererye Abamisiri? Kubanga kisa okubaweererya Abamisiri okusinga okufiira mu idungu. ¹³ Musa n'abakoba abantu nti Temutya, mwemerere bwemereri, mubone obulokozi bwa Mukama bw'eyabakolera watyanu : kubanga Abamisiri be muboine watyanu, temulibabona ate emirembe gyonagyona. ¹⁴ Mukama yabalwanirira, mweena mwasirika. ¹⁵ Mukama n'akoba Musa nti Kiki ekikunkungiirye? Bakobe abaana ba Isiraeri baabe mu maiso. ¹⁶ Era yimusya omwigo gwo, ogolole omukono gwo ku nyanjanza, ogyawulemu: n'abaana ba Isiraeri bayaba wakati w'enyanza ku lukalu. ¹⁷ Nzena, bona, ninze ndibakakanyalya emyoyo Abamisiri, baliyingira okubasengererya: Nzena ndyefunira ekitiibwa ku Falaawo, ne ku igye lye lyonalyona, ku magaali ge, no ku bantu be abeebagala. ¹⁸ Abamisiri balimanya nga ninze Mukama bwe ndimala okwefunira ekitiibwa ku Falaawo, ku magaali ge, no ku bantu be abeebagala. ¹⁹ Malayika wa Katonda, eyatangiire eigye lya Isiraeri, n'avaayo n'aira enyuma waabwe; empagi ey'ekireri n'eva mu maiso gaabwe, n'eyemerera enyuma waabwe; ²⁰ n'eiza n'ebba wakati w'eigye ly'e Misiri n'eigye lya Isiraeri; ne wabba ekireri n'endikirirya, naye n'ereeta omusana obwire : abo ne batabasemberera badi obwire bwonabwona. ²¹ Musa n'agolola omukono gwe ku nyanza; Mukama n'asindika enyanza n'empunga ey'amaani ey'ebuvaisana obwire okukya, enyanza n'agifuula olukalu, amaizi ne geeyawulamu. ²² Abaana ba Isiraeri ne bayingira wakati w'enyanza ku lukalu: amaizi ne gababbeerera ekisenge ku mukono omulyo no ku mugooda. ²³ Abamisiri ne basengererya, ne bayingira enyuma waabwe wakati w'enyanza, embalaasi gyonagyona eza Falaawo, amagaali ge, n'abantu be abeebagala. ²⁴ Awo olwatuukire mu kisisimuko eky'amakeeri Mukama n'alingirira eigye ery'Abamisiri mu mpagi ey'omusyo n'ekireri, ne yeeraliikirirya eigye ery'Abamisiri. ²⁵ N'atoolaku empanka gy'amagaali gaabwe, ne bagabinga nga gazitowa: Abamisiri ne batumula nti Twiruke mu maiso ga Isiraeri; kubanga Mukama abalwanirira ku Bamisiri. ²⁶ Mukama n'akoba Musa nti Golola omukono gwo ku nyanza, amaizi gaire ku Bamisiri, ku magaali gaabwe no ku beebagali baabwe. ²⁷ Musa n'agolola omukono gwe ku nyanza, enyanja n'eira mu maani gaayo nga bukyeire; Abamisiri ne bagiruka; Mukama Abamisiri n'abakunkumulira wakati mu nyanza. ²⁸ Amaizi ne gaira, ne gasaanikira amagaali, n'abeebagali, era n'eigye lya Falaawo lyonalyona abayingiird mu nyanza enyuma waabwe; tewaasigaire n'omumu mu ibo. ²⁹ Naye abaana ba Isiraeri ne batambula ku lukalu wakati mu nyanza; amaizi ne gababbeerera ekisenge ku mukono omulyo, n'omugooda. ³⁰ Atyo Mukama n'alokola Isiraeri ku lunaku ludi mu mukono gw'Abamisiri; Isiraeri ne babona Abamisiri nga bafiife ku mbali kwenyanza. ³¹ Isiraeri ne babona omulimu omunene Mukama gwe yakolere Abamisiri, abantu ne bamutya Mukama; ne bamwikirirya Mukama n'omwidu we Musa.