¹ Mukama n'amukoba Musa, ng'atumula nti ² Ongisiranga abaana ababeryeberye bonabona, buli agula enda mu baana ba Isiraeri, oba wo muntu oba we nsolo: niiye wange. ³ Musa n'abakoba abantu nti Mwijukiranga olunaku luno, lwe mwaviiriire mu Misiri, mu nyumba ey'obwidu: kubanga mu maani g'omukono Mukama mwe yabatoire mu kifo ekyo: tebalyanga ku migaati egizimbulukuswa. ⁴ Ku lunaku luno bwe mwavaamu mu mwezi ogwa Abibu. ⁵ Awo olulituuka Mukama bw'alikuleeta mu nsi y'omu Kanani n'ey'Omukiiti n'ey'omu Amoli, n'ey'Omukiivi, n'ey'omu Yebusi, gye yalayiriire bazeiza bo okugikuwa, ensi eizwire amata n'omubisi gw'enjoki, wekuumanga okuweererya kuno mu mwezi guno. ⁶ Enaku musanvu walyanga emigaati egitazimbulukuswa, era ku lunaku olw'omusanvu wabbabanga embaga eri Mukama. ⁷ Emigaati egitazimbulukuswa giriibwe mu naku egyo omusanvu; so tegyabonekenga gy'oli emigaati egizimbulukuswa, so tekiriboneka ekizimbulukusya gy'oli, mu nsalo gyo gyonagyona. ⁸ Era wamukobanga omwana wo olunaku ludi, ng'otumula nti Olw'ebigambo Mukama bye yankoleire bwe nava mu Misiri. ⁹ Era gyatambularanga akabonero ku mukono gwo, era ekijukiryo wakati w'amaiso go, amateeka ga Mukama kaisi gabbe mu munwa gwo: kubanga mu mukono ogw'amaani Mukama mwe yakutoleire mu Misiri. ¹⁰ Kyewavanga wekuuma eiteeka lino mu biseera byalyo buli mwaka, buli mwaka. ¹¹ Awo olulituuka Mukama bw'alikuleeta mu nsi ey'omu Kanani, nga bwe yakulayiriire iwe na bazeiza bo, bw'aligikuwa, ¹² wamugisiranga Mukama buli kiigulanda, na buli kiberyeberye ky'olina ekiva mu nsolo; abasaiza baabbanga ba Mukama. ¹³ Era wanunulanga buli mberyeberye y'endogoyi n'omwana gw'entama; era oba nga tootakenga kuginunula, wagimenyanga eikoti: era ababeryeberye bonabona mu baana bo wabanunulanga. ¹⁴ Awo omwana wo bw'alikubuulyanga mu biseera ebiriiza ng'atumula nti Kiki kino? Wamukobanga nti mu maani ag'omukono gwe Mukama mwe yatutoleire mu Misiri, mu nyumba ey'obwidu: ¹⁵ awo alwatuukire Falaawo bw'ataatulekere wabula olw'empaka, Mukama n'aita ababeryeberye bonabona ab'omu nsi ey'e Misiri, ababeryeberye ab'abantu, era n'emberyeberye egy'ensolo: kyenva muwa Mukama buli kiigulanda ekisaiza, okubba sadaaka; naye ababeryeberye bonabona ab'abaana bange mbanunula. ¹⁶ N'ekyo kyabbanga akabonero ku mukono gwo, n'ebiteekebwa wakati w'amaiso go: kubanga mu maani ag'omukono gwe Mukama mwe yatutoleire mu Misiri. ¹⁷ Awo Falaawo ng'amalire okubaleka abantu, Katonda n'atabatwala mu ngira ey'ensi ery'Abafirisuuti waire nga niilyo yabbaire okumpi; kubanga Katonda yatumwire nti koizi abantu baleke okwejusa bwe balibona okulwana, baleke okuwira e Misiri: ¹⁸ naye Katonda n'abeetooloolya abantu mu ngira ey'eidungu ku mbali k'Enyanza Emyofu: abaana ba Isiraeri ne baniina nga balina ebyokulwanisya okuva mu nsi ey'e Misiri. ¹⁹ Musa n'atwala amagumba ga Yusufu wamu naye: kubanga yabalayiirye dala abaana ba Isiraeri, ng'atumula nti Katonda talireka kubaizira; naimwe mulitwala amagumba gange okuva wano wamu namwe. ²⁰ Ne bava mu Sukosi okutambula, ne bagona mu Yesamu ku nsalo y'eidungu. ²¹ Mukama n'ayaba mu maiso gaabwe emisana mu mpagi ey'ekireri okubatangira, mu ngira; era obwire mu mpagi ey'omusyo, okubaakira: kaisi batambule emisana N'obwire; ²² empagi ey'ekireri emisana, n'empagi ey'omusyo obwire, tegyawaangawo mu maiso g'abantu.