¹ Mukama n'abakoba Musa na Alooni mu nsi ey'e Misiri, ng'atumula nti ² Omwezi guno gulibabbeerera ogw'olubereberye mu myezi: gulibabbeerera omwezi ogw'olubereberye ogw'omwaka. ³ Mukobe ekibiina kyonakyona ekya Isiraeri, nga mutumula nti Ku lunaku olw'eikumi olw'omwezi guno balyetwalira buli muntu omwana gw'entama, ng'ennyumba gya bazeiza baabwe bwe giri, omwana gw'entama buli nyumba: ⁴ era enyumba bw'ebbanga entono nga teemaleewo mwana gw'entama, kale abbe no muliraanwa we ali okumpi n'enyumba ye bamutwale ng'omuwendo gw'emyoyo gy'abantu bwe guli; buli muntu nga bw'alya, mulibalibwa ku mwana gw'entama. ⁵ Omwana gw'entama gwanyu tegulibbaaku buleme, omusaiza ogwakamala omwaka: muligutoola mu ntama oba mu mbuli: ⁶ muligugisa okutuusya olunaku olw'eikumi n'eina olw'omwezi guno: eikuŋaaniro lyonalyona ery'ekibiina kya Isiraeri baligwita lweigulo. ⁷ Era balitwala ku musaayi, baguteeke ku mifuubeeto gyombiri no ku kabuno, mu nyumba mwe baliguliira. ⁸ Awo balirya enyama mu bwire budi, ng'eyokyeibwe n'omusyo, n'emigaati egitali mizimbulukukye; baligiriira ku iva erikaawa. ⁹ Temugiryangaku mbisi, waire enfumbe n'amaizi wabula enjokye n'omusyo; omutwe gwayo n'ebigere byayo n'eby'omunda byayo. ¹⁰ Mweena temugiirekangawo okutuukya amakeeri; naye erekebwaku okutuukya amakeeri muligyokya n'omusyo. ¹¹ Era bwe mutyo bwe muligirya; nga mwesibire ebimyu, n'engaito nga giri mu bigere byanyu, n'omwigo nga guli mu mukono gwanyu: mugiryanga mangu: eyo niikwo kubitaku kwa Mukama. ¹² Kubanga ndibita mu nsi ey'e Misiri mu beire budi, ndikubba ababeryeberye bonabona mu nsi ey'e Misiri, omuntu era n'ensolo; era ku bakatonda bonabona ab'e Misiri ndisala emisango: nze Mukama. ¹³ Awo omusaayi gulibabbeerera akabonero ku nnyumba gye mulimu: nzena bwe ndibona omusaayi, ndibabiitaku, so tewalibba lumbe ku imwe okubazikirirya, bwe ndikubba ensi ey'e Misiri. ¹⁴ Era olunaku luno lulibabbeerera ekiijukiryo, na imwe mwalwekuumanga embaga ya Mukama: mu mirembe gyanyu gyonagyona mwalwekuumanga embaga mu iteeka eritawaawo. ¹⁵ Enaku musanvu mulirya emigaati egitazimbulukuswa; era no ku lunaku olw'oluberyeberye mwatolangamu ekizimbulukusya mu nyumba gyanyu: kubanga buli alya emigaati egizimbulukuswa okuva ku lunaku olw'oluberyeberye okutuukya olunaku olw'omusanvu, omwoyo ogwo gulisalibwa ku Isiraeri. ¹⁶ Era ku lunaku olw'oluberyeberye walibabbeerera okukuŋaana okutukuvu, era ku lunaku olw'omusanvu okukuŋaana okutukuvu; emirimu gyonagyona gireke okukolebwa mu naku egyo, wabula gye yeetaaga buli muntu okulya, egyo gyonka niikyo ekisa okukolebwa imwe. ¹⁷ Mulyekuuma embaga ey'emigaati egitazimbulukuswa; kubanga ku lunaku luno lwene lwe ntoleiremu eigye lyanyu mu nsi ey'e Misiri: kye mwavanga mulwekuuma olunaku luno mu mirembe gyanyu gyonagyona mu iteeka eritaliwaawo. ¹⁸ Mu mwezi ogw'oluberyeberye ku lunaku olw'eikumi n'eina olw'omwezi olweigulo, mulirya emigaati egitazimbulukuswa, okutuusya olunaku olw'abiri mu lumu olweigulo. ¹⁹ Enaku musanvu ekizimbulukusya tekiriboneka mu nyumba gyanyu: kubanga buli alya ekizimbulukukire, omwoyo ogwo gulisalibwa ku kibiina kya Isiraeri, bw'alibba munaigwanga oba nga nzaalwa. ²⁰ Temulyanga ekizimbulukukire; mu bifo byanyu byonabyona mulyanga emigaati egitazimbulukuswa. ²¹ Musa kaisi abayeta abakaire bonabona aba Isiraeri, n'abakoba nti Mulonde mwetwalire abaana b'entama ng'enyumba gyanyu bwe giri, mwite okubitaku. ²² Mweena mulitwala omuvumbo gwa ezobu ne mwinika mu musaayi ogw'omu kibya, no mumansulira ku kabuno n'emifuubeeto gyombiri n'omusaayi ogw'omu kibya; temufuluma omuntu yenayena mu mulyango ogw'enyumba ye okutuusya amakeeri. ²³ Kubanga Mukama alibita okukubba Abamisiri; awo bw'alibona omusaayi ku kabuno no ku mifuubeeto gyombiri, Mukama alibita ku mulyango, so talireka muzikirirya okuyingira mu nyumba gyanyu okubakubba. ²⁴ Era mulyekuuma ekigambo ekyo ng'eiteeka eri iwe n'eri abaana bo eritawaawo. ²⁵ Awo bwe mulibba mutuukire mu nsi Mukama gy'alibawa, nga bwe yasuubizirye, mwekuumanga okuweererya kuno. ²⁶ Awo olulituuka abaana banyu bwe balibakoba nti Okuweererya kwanyu kuno amakulu ki? ²⁷ mulitumula nti Niiyo sadaaka ey'okubitaku kwa Mukama eyabitire ku nyumba gy'abaana ba Isiraeri mu Misiri bwe yakubbire Abamisiri n'awonya enyumba gyaisu. Abantu ne bakutama ne basinza. ²⁸ Abaana ba Isiraeri ne baaba ne bakola batyo; Mukama nga bwe yalagiire Musa no Alooni, batyo bwe baakolere. ²⁹ Awo olwatuukire mu itumbi Mukama n'akubba abaana ababeryeberye bonabona ab'omu nsi ey'e Misiri, okuva ku muberyeberye wa Falaawo eyatyaime ku ntebe ey'obwakabaka, okutuuka ku muberyeberye ow'omusibe eyabbaire mu ikomera; n'emberyeberye gyonagyona egy'ebisibo. ³⁰ Falaawo n'agolokoka obwire, iye n'abaidu be bonabona n'Abamisiri bonabona; ne wabba okukukunga okunene mu Misiri; kubanga tewabbaire nyumba etaafiiremu muntu. ³¹ N'abeeta Musa no Alooni obwire, n'atumula nti Mugolokoke muve mu bantu bange, imwe era n'abaana ba Isiraeri; mwabe, mumuweererye Mukama nga bwe mwatumwire. ³² Mutwale entama era n'ente gyanyu, nga bwe mwatumwire, mwabe; mumpe omukisa nzena. ³³ N'Abamisiri ne babakubbirirya abantu, okubanguyirirya okuva mu nsi; kubanga baatumwire nti Tufiire fenafena. ³⁴ Abantu ne batwala obwita bwabwe nga bukaali kuzimbulukusibwa, ebiibo byabwe eby'okudyokoleramu nga bisibiibwe mu ngoye gyabwe ku bibega byabwe. ³⁵ Abaana ba Isiraeri ne bakola ng'ekigambo kya Musa; ne basaba Abamisiri ebintu ebya feeza n'ebintu ebya zaabu, n'engoye: ³⁶ Mukama n'abawa abantu okutakibwa mu maiso g'Abamisiri, ne babawa bye baasaba. Ne banyaga Abamisiri. ³⁷ Abaana ba Isiraeri ne batambula okuva mu Lameseesi okutuuka mu Sukosi, ng'obusiriivu mukaaga abaatambwire n'ebigere abasaiza, era n'abaana. ³⁸ Era n'ekibiina ekya banaigwanga ne baniina wamu nabo; n'entama n'ente, ebisibo bingi inu. ³⁹ Ne bookya emigaati egitazimbulukuswa n'obwita bwe batoire mu Misiri, kubanga bwabbaire nga bukaali kuteekebwamu ekizimbulukusya; kubanga babbingiibwe mu Misiri nga tebasobola kulwa, so babbaire bakaali kwefumbira mere yonayona: ⁴⁰ N'okutyama kw'abaana ba Isiraeri, kwe baatyaime mu Misiri, gyabbaire emyaka bina mu asatu. ⁴¹ Awo olwatuukire emyaka ebina mu asatu nga gibitire, ku lunaku ludi eigye lyonalyona erya Mukama kaisi ne riva mu Misiri. ⁴² Niibwo obwire ekisaanira okukyekuuma einu eri Mukama okubafulumya mu nsi ey'e Misiri: obwo niibwo bwire budi obwa Mukama obusaanira abaana bonabona aba Isiraeri okubwekuumanga einu mu mirembe gyabwe gyonagyona. ⁴³ Mukama n'abakoba Musa na Alooni nti Lino niilyo eiteeka ery'okubitaku: munaigwanga yenayena talyangaku: ⁴⁴ naye buli mwidu w'omuntu agulibwa n'ebintu, bw'eyamalanga okumukomola, kaisi n'alyaku. ⁴⁵ Omugeni n'omuwereeza aweebwa empeera tebalyangaku. ⁴⁶ Mu nyumba eimu mw'eyaliirwanga; totwalanga wanza we nyumba ku nyama yaayo; so temumenyanga eigumba lyayo. ⁴⁷ Ekibiina kyonakyona ekya Isiraeri balikukwata. ⁴⁸ Era munaigwanga bw'eyagonanga ewuwo, ng'ataka okwekuuma okubitaku eri Mukama, abasaiza be bonabona bakomolebwenga, kaisi asembere akwekuume; yabbanga ng'enzaalwa: naye ataakomolebwenga yenayena talyangaku. ⁴⁹ Walimubbeerera eiteeka limu enzaalwa n'omugeni agona omumwe. ⁵⁰ Batyo bwe baakolere abaana ba Isiraeri bonabona; nga Mukama bwe yabalagiire Musa na Alooni, batyo bwe baakolere. ⁵¹ Awo ku lunaku ludi Mukama kaisi natoola abaana ba Isiraeri mu nsi ey'e Misiri mu igye lyabwe.