¹ Ne bava Erimu nga batambula, ekibiina kyonakyona eky'abaana ba Isiraeri ne batuuka mu idungu lya Sini, eriri wakati wa Erimu ne Sinaayi, ku lunaku olw'eikumi n'eitaanu olw'omwezi ogw'okubiri nga bamalire okuva mu nsi ey'e Misiri. ² Ekibiina kyonakyona eky'abaana ba Isiraeri ne beemulugunyirya Musa no Alooni mu idungu: ³ abaana ba Isiraeri ne babakoba nti Waakiri twandifiiriire olw'omukono gwa Mukama mu nsi ey'e Misiri, bwe twabbaire tutyaime awali entamu egy'enyama, bwe twabbaire tulya emere nga twikuta; kubanga mwatufulumirye mu idungu lino, okwita ekibiina kino kyonakyona n'enjala. ⁴ Mukama kaisi n'akoba Musa nti Bona, nditonnyesya emere okuva mu igulu ku lwanyu; n'abantu balifuluma okukuŋaanya ekitundu eky'olunaku buli lunaku, kaisi mbakeme nga batambuliranga mu mateeka gange oba tebaatambulirengamu. ⁵ Awo olwatuukanga ku lunaku olw'omukaaga bateekateekanga gye baliyingira, era eyesinganga emirundi eibiri gye bakuŋaanya buli lunaku. ⁶ Musa na Alooni ne bakoba abaana ba Isiraeri bonabona nti Olweigulo lwe mulimanya nga Mukama niiye yabatoire mu nsi ey'e Misiri: ⁷ era amakeeri lwe mulibona ekitiibwa kya Mukama; kubanga awuliire okwemulugunya kwanyu ku Mukama: naife ife baani, n'okwemuluguaya ne mwemulugunyirya ife? ⁸ Musa n'atumula nti Kino kyabbawo, Mukama bw'anaabawa olweigulo enyama okulya, n'amakeeri emere okwikuta; kubanga Mukama awuliire okwemulugunya kwanyu kwe mumwemulugunyire: naife niife baani? Temwemulugunyira ife, wabula Mukama. ⁹ Musa n'akoba Alooni nti Bakobe ekibiina kyonakyona eky'abaana ba Isiraeri nti Musembere mu maiso ga Mukama: kubanga awuliire okwemulugunya kwanyu. ¹⁰ Awo, Alooni bwe yabbaire ng'atumula n'ekibiina kyonakyona eky'abaana ba Isiraeri, ne balingirira mu dungu; bona, ekitiibwa kya Mukama ne kiboneka mu kireri. ¹¹ Mukama n'amukoba Musa, ng'atumula nti ¹² Mpuliire okwemulugunya kw'abana ba Isiraeri: obakobere, ng'otumula nti Olweigulo mwalya enyama, n'amakeeri mwaikuta emere; mweena mwamanya nga niinze Mukama Katonda wanyu. ¹³ Awo olweigulo obugubi Kaisi ne buniina ne busaanikira olusiisira: amakeeri olufu ne lugwa ne lwetooloola olusiisira. ¹⁴ Olufu olwagwire bwe lwaweireku, bona, ne wabbaawo kungulu w'eidungu akantu akatono akeekulungiriri, akatono ng'omusulo omukwafu ogubba ku nsi, ¹⁵ Abaana ba Isiraeri bwe bakiboine ne bakobagana bonka na bonka nti Kiki kino? kubanga tebamanyire bwe kyabbaire. Musa n'abakoba nti Eyo niiyo mere Mukama gy'abawaire okulya. ¹⁶ Ekyo niikyo kigambo ky'alagire Mukama nti Mukuŋaanyeeku buli muntu nga bw'alya; buli muntu ikomero imu, ng'omuwendo gw'abantu banyu bwe guli, mulikitwala, buli muntu alibatwalira ab'omu weema ye. ¹⁷ Abaana ba Isiraeri ne bakola batyo, ne bakuŋaanya abandi nyingi, abandi ntono. ¹⁸ Awo bwe baageranga mu ikomero, eyakuŋaanyire enyingi n'atafikyawo, era eyakuŋaanyirye entono n'ateetaaga; baakuŋaanyirye buli muntu nga bw'alya. ¹⁹ Musa n'abakoba nti Omuntu talekaawo okutuukya amakeeri. ²⁰ Naye Musa ne batamuwulira; naye abamu mu ibo ne balekawo okutuukya amakeeri, n'ezaala amagino, n'ewunya: Musa n'abakwatirwa obusungu. ²¹ Ne bakunaanya buli makeeri, buli muntu nga bw'alya: era omusana bwe gwayakanga n'ekereketa. ²² Awo olunaku olw'omukaaga bwe lwatuukanga, ne bakuŋaanya emirundi ibiri emere, buli muntu ikomeri ibiri: abakulu bonabona ab'ekibiina ne baiza ne bamukoba Musa ²³ N'abakoba nti Ekyo Mukama kye yatumwire nti amakeeri niikyo ekiwumilo ekikulu, sabbiiti entukuvu eri Mukama: mwokye bye mutaka mufumbe bye mutaka okufumba; yonayona esigalawo mwegisire ensibo okutuukya amakeeri. ²⁴ Ne beegisira okutuukya amakeeri, Musa nga bwe yalagiire: n'etewunya, so ne mutabba na magino. ²⁵ Musa n'atumula nti Mulye eno watyanu; kubanga watyanu niiyo sabbiiti eri Mukama; watyanu temugibone mu itale. ²⁶ Mukuŋaanye mu naku mukaaga; naye ku lunaku olw'omusanvu niiyo sabbiiti, okwo teribbeerawo. ²⁷ Awo ku lunaku olw'omusanvu ne baaba abamu ku bantu okukuŋaanya, ne batagibona. ²⁸ Mukama n'amukoba Musa nti Mulituukya waina okugaana okukwata amateeka gange n'ebiragiro byange? ²⁹ Mubone, kubanga Mukama abawaire sabbiiti, kyava abawa ku lunaku olw'omukaaga emere ey’enaku eibiri; mutyame buli muntu mu kifo kye, tavanga omuntu yenayena mu kifo kye ku lunaku olw'omusanvu. ³⁰ Ne bawumulanga abantu ku lunaku olw'omusanvu. ³¹ Enyumba ya Isiraeri ne bagyeta eriina lyayo Manu: n'efaanana ng'ensigo gya jada, enjeru; n'obuwoomerevu bwayo bufaanana ng'emigaati egy'omubisi gw'enjoki. ³² Musa n'atumula nti Ekyo niikyo ekigambo Mukama kye yalagiire nti eikomero eizwire egisirwe emirembe gyanyu; kaisi babone emere gye nabaliisya mu idungu bwe nabatoire mu nsi ey'e Misiri. ³³ Musa n'amukoba Alooni nti Twala ekibya osye munda eikomero eizwire manu, okiteeke mu maiso ga Mukama, ensibo y'emirembe gyanyu. ³⁴ Nga Mukama bwe yalagiire Musa, atyo Alooni n'akiteeka mu maiso g'obujulizi, okubba ensibo. ³⁵ Abaana ba Isiraeri ne baliira manu emyaka ana, okutuusya lwe baatuukire mu nsi ey'abantu; ne balya manu okutuuka mu nsalo ez'ensi ye Kanani. ³⁶ Era eikomero niikyo kitundu eky'eikumi ekya efa.