¹ Wulira, iwe Isiraeri: oyaba okusomoka Yoludaani watyanu, okuyingira okulya amawanga agakusinga obunene n'a maani, ebibuga ebinene ebyazimbiibweku ebigo okutuuka mu igulu, ² abantu abanene abawanvu, abaana b'Anaki, b'o maite, era be wawuliireku nga bakoba nti Yani asobola okwemerera mu maiso g'a baana ba Anaki? ³ Kale manya watyanu nga Mukama Katonda wo niiye oyo asomoka okukukutangira ng'o musyo ogwokya; iye alibazikirirya, era alibamega mu maiso go: otyo bw'o libabbingamu, n'o bazikirirya mangu, nga Mukama bwe yakukobere. ⁴ Totumulanga mu mu mwoyo gwo, Mukama Katonda wo bw'alimala okubasindika mu maiso go, ng'o koba nti Olw'o butuukirivu bwange Mukama kyaviire anyingirya okulya ensi eno: kubanga olw'o bubbiibi bw'a mawanga ago Mukama kyaviire agabbinga mu maiso go. ⁵ Ti lwo butuukirivu bwo so ti lwo bugolokofu bwa mwoyo gwo, kyova oyingira okulya ensi yaabwe: naye olw'obubbiibi bw'amawanga ago Mukama Katonda wo kyaviire agabbinga mu maiso go, era kaisi anywezye ekigambo Mukama kye yalayirIire bazeiza bo, Ibulayimu, Isaaka, n'o Yakobo. ⁶ Kale manya nga Mukama Katonda wo takuwa nsi eno ensa okugirya lw'o butuukirivu bwo; kubanga oli igwanga eririna eikoti enkakanyavu. ⁷ Ijukira ti weerabiranga bwe wasunguwairye Mukama Katonda wo mu idungu: okuva ku lunaku lwe waviiriiremu mu nsi y'e Misiri okutuusya lwe mwaizire mu kifo kino; mujeemera Mukama. ⁸ Era n'o ku Kolebu mwasunguwairye Mukama, Mukama n'a banyiigira okubazikirirya. ⁹ Bwe nabbaire nga malire okuniina ku lusozi okuweebwa ebipande eby'a mabbaale, niibyo bipande eby'e ndagaanu Mukama gye yalagaine na imwe, kaisi ni mala ku lusozi enaku ana emisana n'o bwire; ti naalyanga mere so tinanywanga maizi. ¹⁰ Mukama n’a mpa ebipande bibiri eby'a mabbaale ebyawandiikibweku n'e ngalo ya Katonda; era ku ibyo kwawandiikiibwe ng'e bigambo byonabyona bwe biri, Mukama bye yatumwire na imwe ku lusozi ng'a yema wakati mu musyo ku lunaku olw'o kukuŋaaniraku. ¹¹ Awo olwatuukire enaku ana bwe gy'a bitirewo emisana n'o bwire, Mukama n'a mpa ebipande ebibiri eby'a mabbaale, niibyo ebipande eby'endagaanu. ¹² Mukama n'a nkoba nti Golokoka ove wano oserengete mangu: kubanga abantu bo be watoire mu Misiri beeyoonoonere; bakyamire mangu okuva mu ngira gye nabalagiire; beekoleire ekifaanaayi ekisaanuukye. ¹³ Era Mukama ni yeeyongera n'a koba nti mboine eigwanga lino, era, bona, niilyo eigwanga eririna eikoti eikakanyali: ¹⁴ ndeka mbazikirirye, nsangule eriina lyabwe wansi w'e igulu: era ndifuula iwe eigwanga eribasinga amaanni n'o bukulu. ¹⁵ Awo ni nkyuka ni nva ku lusozi, era olusozi nga lwaka omusyo: n’e bipande eby'e ndagaanu byombiri nga biri mu mikono gyange gyombiri. ¹⁶ Ni moga, era, bona, mwabbaire mumalire okusobya ku Mukama Katonda wanyu; mwabbaire mumalire okwekolera enyana ensaanuukye: mwabbaire mumalire okukyama amangu okuva mu ngira Mukama gye yabalagiire. ¹⁷ Ni nkwata ebipande byombiri, ni mbisuula mu mikono gyange gyombiri, ne mbimenya mu maiso ganyu. ¹⁸ Ni nvuunamira mu maiso ga Mukama, ng'o luberyeberye, enaku ana emisana n'o bwire; tinalyanga mere so tinanywanga maizi; olw'o kwonoona kwanyu kwonakwona kwe mwayonoonere, nga mukola ekyabbaire mu maiso ga Mukama ekibbiibi okumusunguwalya. ¹⁹ Kubanga natiire obusungu n'e kiruyi, Mukama bwe yabbaire abasunguwaliire okubazikirirya. Naye Mukama n’a mpulira n'o mulundi gudi. ²⁰ Mukama n’a sunguwalira inu Alooni okumuzikirirya: era ni nsabira na Alooni mu biseera ebyo. ²¹ Ne ngirira ekibbiibi kyanyu, enyana gye mwabbaire mukolere, ni ngyokya omusyo, ni ngisambirira, nga ngisekulasekula inu, okutuusya lwe yafaanaine ng'e nfuufu: ne nsuula enfuufu yaayo mu kaiga akaserengeta okuva ku lusozi. ²² Era e Tabera, n’e Masa, n'e Kiberosukataava mwasunguwaliiryeyo Mukama. ²³ Awo Mukama bwe yabatumire okuva e Kadesubanea, ng'atumula nti mwambuke mulye ensi gye mbawaire; kaisi ni mujeemera ekiragiro kya Mukama Katonda wanyu, so temwamwikiriirye, so temwawuliire eidoboozi lye. ²⁴ Mujeemera Mukama okuva ku lunaku lwe nabamaite. ²⁵ Awo ne nvuunamira mu maaso ga Mukama enaku ana emisana n’o bwire gye navuunamiriire; kubanga Mukama yabbaire atumwire ng'a yaba okubazikirirya. ²⁶ Ni nsaba Mukama ni ntumula nti Ai Mukama Katonda, tozikirirya bantu bo n'o busika bwo, be wanunwire olw'o bukulu bwo, be watoire mu Misiri n'e ngalo egy'a maani. ²⁷ ijukira abaidu bo, Ibulayimu, Isaaka, n'o Yakobo; tolingirira bukakanyali bwa bantu bano waire obubbiibi bwabwe waire okwonoona kwabwe: ²⁸ ensi gye watutoiremu ereke okutumula nti Kubanga Mukama ti yasoboire kubaleeta: mu nsi gye yabasuubizirye; era kubanga yabakyawire, Kyeyaviire abafulumya mu idungu okubaita. ²⁹ Naye niibo bantu bo, era niibwo busika bwo, be watoiremu n'o buyinza bwo obungi n’o mukono gwo ogwagoloilwe. Ensuula