¹ Mu biseera ebyo Mukama n'a nkoba nti weetemere ebipande bibiri eby'a mabbaale ebifaanana ng'e by'o luberyeberye, oniine gye ndi ku lusozi, weekolere esanduuku ey'o musaale. ² Era nawandiika ku bipande ebigambo ebyabbaire ku bipande eby'o luberyeberye bye wamenyere, era wabiteeka mu sanduuku. ³ Awo ne nkola esanduuku ey'o musaale gwa sita, ne ntema ebipande bibiri eby'a mabbaale ebifaanana ng'e by'o luberyeberye, ni niina ku lusozi, nga nkwaite ebipande ebibiri mu ngalo gyange. ⁴ N'a wandiikire ku bipande, ng'o kuwandiika okw'o lubereberye bwe kwabbaire, amateeka eikumi, Mukama ge yababuuliire ku lusozi ng'a yema wakati mu musyo ku lunaku olw'o kukuŋaaniraku Mukama n'a bimpa. ⁵ Ne nkyuka ni nva ku lusozi, ni nteeka ebipande mu sanduuku, gye nabbaire nkolere; era biri omwo, nga Mukama bwe yandagiire. ⁶ (Abaana ba Isiraeri ni batambula okuva e Beerosubeneyaakani okutuuka e Mosera: Alooni n'a fiira eyo, era eyo gye yaziikiibwe; Eriyazaali Mutaane we n'a weereryanga mu bwakabona mu kifo kye. ⁷ Ni bavaayo ni batambula okutuuka e Gudugoda; ni bava e Gudugoda ne batambula okutuuka e Yotubasa, ensi ey'e miiga egy'a maizi. ⁸ Mu biseera ebyo Mukama n'a yawula ekika kya Leevi, okusitulanga esanduuku ey'e ndagaanu ya Mukama, okwemerera mu maiso ga Mukama, okumuweereryanga, n'o kwebalyanga eriina lye, ne watyanu. ⁹ Leevi kyava aleka okubba n'o mugabo waire obusika awamu n'a bagande be; Mukama niibwo busika bwe, nga Mukama Katonda we bwe yamukobere.) ¹⁰ Ni mala enaku ana emisana n’o bwire ku lusozi, ng'o mulundi ogw'o luberyeberye: Mukama n'a mpulira n'o mulundi ogwo; Mukama nga tayaba kukuzikirirya. ¹¹ Mukama n'a nkoba nti Golokoka, otambule ku lugendo lwo ng'o tangira abantu; era baliyingira balirya ensi gye nalayiriire bazeiza baabwe okubawa: ¹² Ne watyanu, Isiraeri, Mukama Katonda wo akutakirya ki wabula okutyanga Mukama Katonda wo, okutambuliranga mu mangira ge gonagona, n'o kumutaka, n’o kuweererya Mukama Katonda wo n'o mwoyo gwo gwonagwona, n'e meeme yo yonayona, ¹³ okwekuumanga ebiragiro bya Mukama n'a mateeka ge, bwe nkulagira watyanu olw'o busa bwo? ¹⁴ Bona, Mukama Katonda wo niiye mweene igulu, n'e igulu erye waigulu, ensi era n'e bigirimu byonabyona. ¹⁵ Mukama yasanyukiire busanyukiri bazeiza be okubataka, n'a londa eizaire lyabwe eryairirewo, niiye imwe okusinga amawanga gonagona, nga watyanu. ¹⁶ Kale mukomole ekikuta ky'o mwoyo gwanyu, so ti mubbanga ate be ikoti ikakanyali. ¹⁷ Kubanga Mukama Katonda wanyu niiye Katonda wa bakatonda era Mukama w'a baami, Katonda omukulu, ow'a maanni era ow'e ntiisya, atatya maiso ga bantu, so talya nguzi. ¹⁸ Asalira omusango mulekwa n'o namwandu, era ataka munaigwanga, ng'a muwa eby'o kulya n'e by'o kuvaala. ¹⁹ Kale mutakenga munaigwanga: kubanga mwabbaire banaigwanga mu nsi y'e Misiri. ²⁰ Watyanga Mukama Katonda wo; eyo gw'e waweereryanga; era eyo gwegaitanga naye, n'e riina lye lyewalayiranga. ²¹ Oyo niilyo eitendo lyo, era niiye Katonda wo, eyakukoleire ebyo ebikulu era eby'e ntiisya, amaiso go bye gaboine. ²² Bazeiza bo baserengetere mu Misiri nga bali abantu nsanvu; ne watyanu Mukama Katonda wo akufiire ng'e muyenye egy'o mu igulu olw'o bungi. Ensuula