¹ Kale watakanga Mukama Katonda wo, ni weekuuma bye yakuutiire n'a mateeka ge n'e misango gye n'e biragiro bye enaku gyonagyona. ² Era mu manye watyanu: kubanga ti ntumula na baana banyu abatamaite era abakali kubona kukangavula kwa Mukama Katonda wanyu, obukulu bwe, engalo gye egy'a maani, n'o mukono gwe ogwagoloilwe, ³ n'o bubonero bwe, n'e mirimu gye, bye yakolere wakati mu Misiri Falaawo kabaka w’e Misiri n'e nsi ye yonayona; ⁴ era kye yakoleire eigye ery'e Misiri; embalaasi gyabwe n'a magaali gabwe; bwe yabakulukutiiryeku amaizi ag'Enyanza Emyofu bwe babbaire nga babasengererya, era Mukama bwe yabazikiriirye okutuusya watyanu; ⁵ era bye yabakoleire mu idungu okutuusya lwe mwaizire mu kifo kino; ⁶ era kye yakolere Dasani n'o Abiramu, abaana ba Eriyaabu, omwana wa Lewubeeni; ensi bwe yayasamire omunwa gwayo, n'e bamira bugobo, n'a b'o mu nyumba gyabwe, n'e weema gyabwe na buli kintu ekiramu ekyabasengereirye, wakati mu Isiraeri yenayena: ⁷ naye amaiso ganyu gabonanga omulimu gwonagwona omukulu ogwa Mukama gwe yakolere. ⁸ Kale mwekuumanga ekiragiro kyonakyona kye nkulagira watyanu, kaisi mubbe n'a maani, muyingire mulye ensi gye musomokera okwabamu okugirya; ⁹ era kaisi mumale enaku nyingi ku nsi, Mukama gye yalayiriire bazeiza banyu okugibawa n'e izaire lyabwe, ensi ekulukuta n'a mata n'o mubisi gw'enjoki. ¹⁰ Kubanga ensi gy'o yingiramu okugirya, tefaanana ng'e nsi y'e Misiri mwe mwaviire, mwe wasigiranga ensigo gyo n'o gifukirira amaizi n'e kigere kyo, ng'e nimiro y'eiva: ¹¹ ate ensi gye musomokera okwabamu okugirya niiyo ensi ey'e biwonvu n'e nsozi, enywa amaizi agatoonya okuva mu igulu: ¹² ensi Mukama Katonda wo gye yatakire; amaiso ga Mukama Katonda wo gabba ku iyo enaku gyonagyona, okuva omwaka we gusookera okutuusya ku nkomerero ya gwo. ¹³ Awo olwatuukanga bwe mwanyiikiranga okuwulira ebigambo byange bye mbalagira watyanu, okutaka Mukama Katonda wanyu, n'o kumuweererya n'o mwoyo gwanyu gwonagwona n'e meeme yanyu yonayona, ¹⁴ natonyesyanga amaizi g'e nsi yanyu mu ntuuko yaago, enkubba ago musambya n'ago mutoigo, okungulenga eŋaanu yo n’e nvinyu yo n'a mafuta go. ¹⁵ Era nawanga omwido mu nimiro gyo olw'e bisibo byo era walyanga n'o ikuta. ¹⁶ Mwekumenga omwoyo gwanyu guleke okubbeyebwa, ni mukyama, ni muweererya bakatonda abandi, ni mubasinza; ¹⁷ obusungu bwa Mukama ne bubabuubuukiraku, n'a igalawo eigulu, enkubba obutatonyanga, n'e nsi obutabalanga bibala byayo; ni muzikirira mangu okuva ku nsi ensa Mukama gy'abawa. ¹⁸ Kale mugise, ebigambo byange ebyo mu mwoyo gwanyu n'o mu meeme yanyu; era mwabisibanga okubba akabonero ku mikono gyanyu, era byabbanga eby'oku kyeni, wakati w'a maiso ganyu. ¹⁹ Era mwabyegeresyanga, abaana banyu nga mubiroogya, bwewatyamanga mu nyumba yo, era bwewatambuliranga mu ngira, era bwewagalamiranga, era bwewagolokokanga. ²⁰ Era wabiwandiikanga ku mifubeeto gy'e nyumba yo n'o ku njigi gyo: ²¹ enaku gyanyu gyeyongerenga, n'e naku egy'a baana banyu, ku nsi Mukama gye yalayiriire bazeiza banyu okubawa, ng'e naku egy'e igulu eriri waigulu w'e nsi. ²² Kubanga bwe mwanyiikiranga okwekuuma ekiragiro kino kyonakyona kye mbalagira, okukikola; okutakanga Mukama Katonda wanyu, okutambuliranga mu mangira ge gonagona, n'o kwegaita naye; ²³ Mukama yabbingangamu amawanga gano gonagona mu maiso ganyu, imwe ni mulya amawanga agabasinga obunene n'a maani. ²⁴ Buli kifo ekyaniinibwangaku ekigere kyanyu kyabbanga kyanyu: okuva ku idungu n'e Lebanooni, okuva ku mwiga; omwiga Fulaati, okutuuka ku nyanza ey'o mu mabega niiwo wabbanga ensalo yanyu. ²⁵ Tewalibba muntu asobola okwemerera mu maiso ganyu; Mukama Katonda wanyu yateekanga ekitiibwa kyanyu n'e ntiisya yanyu ku nsi yonayona kwe mwaniinanga, nga bwe yabakobere. ²⁶ bona, watyanu nteeka mu maiso ganyu omukisa n'o kukulaamibwa; ²⁷ omukisa bwe mwawuliranga ebiragiro bya Mukama Katonda wanyu, bye mbalagira watyanu: ²⁸ n'okukulaamiwa, bwe mwawulirenga biragiro bya Mukama Katonda wanyu, naye ni mukyama okuva mu ngira gye mbalagira atyanu, okusengererya bakatonda abandi be mutamanyanga. ²⁹ Awo olulituuka Mukama Katonda wo bw'alikuyingirya mu nsi gy'o yabamu okugirya, oliteeka omukisa ogwo ku lusozi Gerizimu, n'o kukolaamibwa okwo ku lusozi Ebali. ³⁰ Egyo tigiri mitala wa Yoludaani, enyuma w'e ngira ey'e bugwaisana, mu nsi ey'Abakanani abatyama mu Alaba, ekyolekera Girugaali, ku mbali g'e myera gya Mole? ³¹ Kubanga mwaba okusomoka Yoludaani okuyingira okulya ensi Mukama Katonda wanyu gy'a bawa, era muligirya, ne mutyama omwo. ³² Era mwakwatanga okukola amateeka gonagona n'e misango bye nteeka mu maiso ganyu watyanu. Ensuula