¹ Gano niigo amateeka n'e misango, bye mwakwatanga okukola mu nsi Mukama Katonda wa bazeiza bo gye yakuwaire okugirya, enaku gyonagyona gye mwabbangamu abalamu ku nsi. ² Temulireka kuzikirirya bifo byonabyona amawanga ge mulirya imwe baweerereryanga bakatonda baabwe, ku nsozi empanvu, n'o ku busozi, ne wansi wa buli musaale omubisi: ³ era mwasuulanga ebyoto byabwe, era mwamenyamenyanga empango gyabwe, era mwayokyanga Abaasera baabwe n'o musyo; era mwatematemanga ebifaananyi ebyole ebya bakatonda baabwe; era mulizikirirya eriina lyabwe mu kifo omwo. ⁴ Ti mukolanga mutyo Mukama Katonda wanyu. ⁵ Naye mu kifo Mukama Katonda wanyu ky'alyeroboza mu bika byanyu byonabyona okuteeka omwo eriina lye, niikyo kifo mw'a tyama, mwasagirangayo, era watoolangayo; ⁶ era mwaleetanga eyo ebyo bye muwaayo ebyokyebwa, Sadaaka gyanyu, n’e bitundu byanyu eby’e ikumi, n'e kiweebwayo ekisitulibwa eky'o mukono gwanyu, n'o bweyamu bwanyu, n'e byo bye muwaayo ku bwanyu, era n'e biberyeberye by’e nte gyanyu n'e by’e ntama gyanyu: ⁷ era mwaliiranga eyo mu maiso ga Mukama Katonda wanyu, era mwasanyukiranga ebyo byonabyona bye muteekaku emikono gyanyu, imwe n'a b'o mu nyumba gyanyu, Mukama Katonda wo mwe yakuweereire omukisa. ⁸ Temukolanga ng'e byo byonabyona bwe biri bye tukola wano watyanu, buli muntu ekiri mu maiso ge ekisa; ⁹ kubanga mukaali kutuuka mu kuwumula n'o mu busika Mukama Katonda wanyu bw'akuwa. ¹⁰ Naye bwe mulisomoka Yoludaani ni mutyama mu nsi Mukama Katonda wanyu gy'a basikisya, n'a bawa okuwumula eri abalabe banyu bonabona ababeetooloolanga n'o kutyama ni mutyama mirembe; ¹¹ awo olulituuka mu kifo Mukama Katonda wanyu ky'alyeroboza okutyamisya omwo eriina lye, mwaleetanga eyo byonabyona bye mbalagira, ebyo bye muwaayo ebyokyebwa, n'e Sadaaka gyanyu, ebitundu byanyu eby'e ikumi, n'e kiweebwayo ekisitulibwa eky'o mukono gwanyu, n'o bweyamu bwonabyona obisinga obusa bwe mweyama Mukama: ¹² era mwasanyukiranga mu maiso ga Mukama Katonda wanyu, imwe n'a bataane banyu n'a bawala banyu n'a baidu banyu n'a bazaana banyu n'Omuleevi ali munda w'e njigi gyanyu, kubanga abula mugabo waire obusika wamu naimwe. ¹³ Weekuumenga oleke okuweerayo ebyo bye muwaayo ebyokyebwa mu buli kifo ky'o bona: ¹⁴ naye mu kifo Mukama ky'alyeroboza mu kimu ku bika byanyu; eyo gyewaweeranga ebyo bw'o waayo ebyokyebwa era eyo gyewakoleranga byonabyona bye nkulagira. ¹⁵ Naye osobola okwita enyama n'o kugirya munda w'e njigi gyo gyonagyona, ng'o kutaka kwonakwona okw'e meeme yo bwe kwabbanga, ng'o mukisa gwa Mukama Katonda wo gwe yakuwaire: abatali balongoofu n'a balongoofu basobola okugiryaku, nga bwe balya ku mpuuli n'o ku njaza. ¹⁶ Kyooka ti mulyanga ku musaayi; wagufukanga ku itakali ng'a maizi: ¹⁷ Toliiranga munda w'e njigi gyo kitundu eky'e ikumi eky'e ŋaanu yo, waire eky'e nvinyu yo, waire eky'a mafuta go, waire ebiberyeberye by'e nte gyo waire eby'e ntama gyo, waire ekintu kyonakyona ku ebyo bye weeyamire, waire ebyo by'o waayo ku bubwo, waire ekiweebwayo ekisitulibwa eky'omukono gwo: ¹⁸ naye wa biriiranga mu maiso ga Mukama Katonda wo mu kifo Mukama Katonda wo ky'a lyeroboza, iwe n'o mutaane wo n'o muwala wo n'o mwidu wo n'o muzaana wo n'Omuleevi ali munda w'e njigi gyo: era wasanyukiranga ebyo byonabyona byewateekangaku omukono gwo mu maiso ga Mukama Katonda wo. ¹⁹ Weekuumenga oleke okwabulira Omuleevi enaku gyonagyona gyewabbangamu omulamu mu nsi yo. ²⁰ Mukama Katonda wo bw'aligaziya ensalo yo, nga bwe yakusuubizirye, weena n'o tumula nti Naalya enyama, kubanga emeeme yo ekata okulya enyama; osobola okulya enyama, ng'o kutaka kwonakwona okw'e meeme yo bwe kuli. ²¹ Oba ng'e kifo Mukama Katonda wo ky'alyeroboza okuteeka omwo eriina lye kiriyinga okukubba ewala, waitanga ku nte gyo n'o ku mbuli gyo, Mukama ye yakuwaire, nga bwe nakulagiire, era waliiranga munda w'e njigi gyo, ng'o kutaka kwonakwona okw'e meeme yo bwe kwabbanga. ²² Ng'e mpuuli n'e njaza bwe giriibwa, otyo bwewagiryangaku: atali mulongoofu n'o mulongoofu bagiryangaku okwekankana: ²³ Kyooka weetegerezye olekenga okulya ku musaayi: kubanga omusaayi niibwo bulamu; so toliiranga bulamu wamu n'e nyama. ²⁴ Togulyanga; wagufukanga ku itakali ng'a maizi. ²⁵ Togulyanga; Kaisi obonenga ebisa n'a baana bo abaliirawo, bwewakolanga ekiri mu maiso ga Mukama ekisa. ²⁶ Kyooka ebitukuvu byo by'olina n'o bweyamu bwo wabiiriranga n'o yingira mu kifo Mukama ky'alyerobozya; ²⁷ era waweerangayo ebyo by'owaayo ebyokyebwa; enyama n'o musaayi, ku kyoto kya Mukama Katonda wo: era omusaayi gwe Sadaaka gyo gwafukibwanga ku kyoto kya Mukama Katonda wo; naiwe walyanga enyama. ²⁸ Kwata owulirenga ebigambo ebyo byonabyona bye nkulagira; Kaisi obonenga ebisa n'a baana bo abaliirawo emirembe gyonagyona, bwewakolanga ekiri mu maiso ga Mukama Katonda wo ekisa era eky'e nsonga; ²⁹ Mukama Katonda wo bw'alizikirirya amawanga mu maiso go, gy'o yingira okugalya, n'o galya, n'o tyama mu nsi yabwe; ³⁰ weekuumenga oleke okutegebwa okugasengererya, bwe galimala okuzikirira mu maiso go; era olekenga okubuulya ebya bakatonda babwe ng'otumula nti Amawanga gano gaweererya gatya bakatonda baabwe? era nzena bwe nakolanga ntyo. ³¹ Tokolanga otyo Mukama Katonda wo: kubanga buli kigambo Mukama ky'ayeta eky'o muzizo ky'a kyawa badi bakikolanga bakatonda baabwe: kubanga na bataane baabwe n'a bawala babwe babookyanga omusyo eri bakatonda baabwe. ³² Buli kigambo kye mbalagira mwakikwatanga okukola: tokyongerangaku, so tokisalangaku. Ensuula