¹ Bwe wabbangawo wakati mu iwe nabbi oba omulooti w'e birooto, n'a kuwa akabonero oba eky'a magero, ² akabonero ako oba eky'a magero ekyo ni kituukirira, kye yakukobereku ng'a tumula nti tusengereryenga bakatonda abandi b'otomanyanga, era tubaweereryenga; ³ towuliranga bigambo bya nabbi oyo oba omulooti w'e birooto oyo: kubanga Mukama Katonda wanyu ng'a bakema okumanya nga mutaka Mukama Katonda wanyu n'o mwoyo gwanyu gwonagwona n'e meeme yanyu yonayona. ⁴ Mwatambulanga okusengererya Mukama Katonda wanyu ni mwekuumanga ebiragiro bye ni muwuliranga eidoboozi lye, era mwamuweereryanga, ni mwegaitanga naye. ⁵ Era nabbi oyo obba omulooti w'e birooto yaitibwanga; kubanga atumwire eby'o kujeemera Mukama Katonda wanyu, eyabatoire mu nsi y'e Misiri, n'a kununula mu nyumba y'o bwidu, okukusendasenda okukyama okuva mu ngira Mukama Katonda wo gye yakulagiire okutambulirangamu. Otyo bwewatoolangamu Obubbiibi wakati mu iwe. ⁶ Mugande wo, mutaane wa mawo, oba mutaane wo, oba muwala wo, oba omukali ow'o mu kifubba kyo, oba mukwanu gwo, aliŋanga obulamu bwo iwe, bw'a kusendasendanga ekyama, ng'a tumula nti Twabe tuweererye bakatonda abandi, b'otomanyanga iwe waire bazeiza bo; ⁷ ku bakatonda ab'a mawanga ababeetooloire, abali okumpi naiwe, oba abakuli ewala okuva ku nkomerero y'e nsi okutuuka ku nkomerero y'ensi: ⁸ tomwikiriryanga so tomuwuliranga; so n'e riiso lyo ti rimusaasiranga, so tosonyiwanga, so tomugisanga: ⁹ naye tolemanga kumwita; omukono gwo niigwo gwasookanga okubba ku iye okumwita, omukono gw'a bantu bonabona kaisi ni gumubbaaku. ¹⁰ Era wamukubbanga amabbaale afe; kubanga agezeryeku okukusendasenda okuva ku Mukama Katonda wo, eyakutoire mu nsi y'e Misiri, mu nyumba y'o bwidu. ¹¹ N'e Isiraeri yenayena yawuliranga, ni batya, ni batakola ate bubbiibi obwekankana awo wakati mu iwe, ¹² Bwewawuliranga nga batumula ku kimu ku bibuga byo, Mukama Katonda wo by'akuwa okutyama omwo, nga bakoba nti ¹³ Waliwo abantu ababulaku kye bagasa abaviire wakati mu iwe, era abasenderesendere abatyama mu kibuga kyabwe, nga batumula nti twabe tuweererye bakatonda abandi be mutamanyanga; ¹⁴ wakeberanga n'o sagira n'o buulirirya; era bona, oba nga kya mazima, ekigambo ne kitegeerekeka, ng'e ky'o muzizo ekyekankana awo kikolerwa wakati mu iwe; ¹⁵ tolekanga kwita abatyama mu kibuga omwo n’o bwogi bw'e kitala, ng'o kizikiririrya dala ne byonabyona ebikirimu n'e bisibo byakyo, n'o bwogi bw'e kitala. ¹⁶ Era wakuŋaanyanga omunyago gwakyo gwonagwona wakati mu luguudo lwakyo, n'o yokya ekibuga omusyo, n'o munyago gwonagwona buli kantu konakona, eri Mukama Katonda wo: era kyabbanga kifunvu enaku gyonagyona; ti kirizimbibwa ate. ¹⁷ So ti wabbanga ku kintu ekyalaamiibwe ekyegaitanga n'o mukono gwo: Mukama akyuke okuleka obusungu bwe obukambwe, akulage ekisa, akusaasire, era akwalye, nga bwe yalayiriire bazeiza bo; ¹⁸ bwe wawuliranga eidoboozi lya Mukama Katonda wo, okwekuumanga ebiragiro bye byonabyona bye nkulagira watyanu, okukolanga ekiri mu maiso ga Mukama Katonda wo ekisa. Ensuula