¹ Ekiragiro kyonakyona kye nkulagira watyanu mwakikwatanga okukikola, kaisi mubbenga abalamu, mwalenga, muyingire mulye ensi Mukama gye yalayiriire bazeiza banyu. ² Era waijukiranga olugendo lwonalwona Mukama Katonda wo lwe yakutambuliirye emyaka gino ana mu idungu, akutoowalye, akukeme, okumanya ebyabbaire mu mwoyo gwo, oba ng'o yaba okwekuumanga ebiragiro bye oba ti niiwo awo. ³ N'a kutoowalya, n'a kulumya enjala, n'a kuliisya emaanu, gye wabbaire tomaite, so na bazeiza bo tebagimanyanga; akutegeezye ng'o muntu tabba mulamu na mere yonka, naye olwa buli ekiva mu munwa gwa Mukama omuntu kyava abba omulamu. ⁴ Ebivaalo byo tebyakairiwiranga ku iwe, so n'e kigere kyo tekyazimbanga, emyaka gino ana. ⁵ Era walowoozanga mu mwoyo gwo ng'o muntu nga bw'a kangavula omwana we, atyo Mukama Katonda wo bw'a kukangavvula iwe. ⁶ Era wekuumanga ebiragiro bya Mukama Katonda wo, okutambuliranga mu mangira ge, n’o kumutyanga. ⁷ Kubanga Mukama Katonda wo akuyingirya mu nsi ensa, ensi ey'e miiga gy'a maizi, ey'e nsulo n'e bidiba, agakulukutira mu biwonvu n'o ku nsozi; ⁸ ensi ey'e ŋaanu n'e sayiri; n'e mizabbibu n'e mitiini n’e mikomamawanga; ⁹ ensi mwewaliiranga emere n'e tegota, toobbengaku ky'o bulwa omwo; ensi amabbaale gaayo kyoma, n'o mu nsozi gyayo osobola okusima ebikomo. ¹⁰ Era walyaaga n'o ikuta, ni weebalya Mukama Katonda wo olw'e nsi ensa gye yakuwaire. ¹¹ Weekuumenga oleke okwerabira Mukama Katonda wo, obuteekuumanga ebiragiro bye n'e misango gye n'a mateeka ge bye nkulagira watyanu: ¹² bwe wamalanga okulya n'o ikuta, era ng'o malire okuzimba enyumba ensa n'o kutyama omwo; ¹³ era ente gyo n’e mbuli gyo nga gyaalire, n'e feeza yo n'e zaabu yo nga gyalire, ne byonabyona by'olina nga byaalire; ¹⁴ kale omwoyo gwo gulekenga okugulumizibwa, ni weerabira Mukama Katonda wo, eyakutoire mu nsi y'e Misiri, mu nyumba y'o bwidu; ¹⁵ eyakubitirye mu idungu einene era ery'e ntiisya, omwabbaire emisota egy'o musyo n’e njaba egy'o busagwa, n'e itakali erirumwa enyonta awabula maizi; eyakutoleire amaizi mu lwazi olw'e mbaalebbaale; ¹⁶ eyakuliisiirye mu idungu emaanu, bazeiza bo gye batamanyanga; akutoowalye, akukeme, akukole obusa ku nkomerero yo: ¹⁷ era olekenga okutumula mu mwoyo gwo nti obuyinza bwange n’a maani g'o mukono gwange niibyo binfuniire obugaiga buno. ¹⁸ Naye waijukiraaga Mukama Katonda wo, kubanga oyo niiye akuwa obuyinza okufuna obugaiga; anywezye endagaanu ye gye yalayiriire bazeiza bo, nga watyanu. ¹⁹ Awo olwatuukanga, bwewerabiranga Mukama Katonda wo n'osengererya bakatonda abandi n'o baweererya n'o basinza, mbategeeza watyanu nga temuulemenga kuzikirira. ²⁰ Ng'a mawanga Mukama g'a zikirirya mu maiso ganyu, bwe mwazikiriranga mutyo; kubanga temwaikiriirye kuwulira idoboozi lya Mukama Katonda wanyu. Essuula