¹ Mukama Katonda wo bw'alikuyingirya mu nsi gy'o yaba okulya, n'a simbula mu maiso go amawanga mangi, Omukiiti, n'Omugirugaasi, n'Omwamoli, n'Omukanani; n'Omuperizi, n'Omukiivi, n'Omuyebusi, amawanga musanvu agakusinga obukulu n'a maani; ² era Mukama Katonda wo bw'alibagabula mu maiso go, wena n'o baita; kaisi obazikiririrya dala; tolagaananga nabo ndagaanu yonayona, so tobalaganga ekisa: ³ so tofumbirwaganwanga nabo; muwala wo tomuwanga mutaane we, so n'o muwala we tomukwesyanga mutaane wo. ⁴ Kubanga alikyusa mutaane wo obutasengererya, baweereryenga bakatonda abandi: obusungu bwa Mukama bulibuubuuka butyo ku imwe, era alikuzikirirya mangu. ⁵ Naye muti bwe mwabakolanga; mwamenyaamenyanga ebyoto byabwe, mu mwabbetentanga n'e mpango gyabwe, mwatemaatemanga na Baasera baabwe, n'e bifaananyi byabwe ebyole mwabyokyanga omusyo. ⁶ Kubanga iwe oli igwanga itukuvu eri Mukama Katonda wo: Mukama Katonda wo yakulondere okubba eigwanga ery'e nvuma gy'ali, okusinga amawanga gonagona agali ku maiso g'e nsi. ⁷ Mukama ti yabateekereku kutaka kwe, so teyabalondere, kubanga mwasingire eigwanga lyonalyona obungi; kubanga mwabbaire batono okusinga amawanga gonahona: ⁸ naye kubanga Mukama abataka, era kubanga ataka okukwata ekirayiro kye yalayiriire bazeiza banyu, Mukama kyeyaviire abatoolamu n'e ngalo egy'a maani, n'a banunula mu nyumba y'o bwidu, mu mukono gwa Falaawo kabaka w’e Misiri. ⁹ Kale manya nga Mukama Katonda wo niiye Katonda; Katonda omwesigwa, akwata endagaanu n'o kusaasira eri abo abamutaka ni beekuuma ebiragiro bye okutuusya emirembe olukumi; ¹⁰ asasula abo abamukyawa ng'a bonagagana n'a maiso, okubazikirirya: tairirenga eri oyo amukyawa, naye yamusasulanga ng'a bonagana n'a maiso. ¹¹ Kale yekuumanga ekiragiro ekyo, n'a mateeka, n'e misango, bye nkulagira watyanu, okubikolanga. ¹² Awo olulituuka kubanga muwulira emisango gino; ni mugikwata, ne mugikola; Mukama Katonda wo yakukwatiranga endagaanu n'o kusaasira bye yalayiriire bazeiza bo: ¹³ era yakutakanga yakuwanga omukisa, yakwalyanga: era yawanga omukisa ebibala by'o mubiri gwo n'e bibala by'e itakali lyo, eŋaanu yo envinyu yo n'a mafuta go, eizaire ly'e nte gyo n'a baana b'e mbuli gyo, mu nsi gye yalayiriire bazeiza bo okukuwa. ¹⁴ wabbanga n'o mukisa okusinga amawanga gonagona: tewaabbenga mugumba mu imwe waire Omusaiza waire omukali, waire mu bisibo byo. ¹⁵ Era Mukama yakutoolangaku obulwaire bwonabona; so taakuteekengaku n’e imu ku ndwaire embiibbi egy'e Misiri, gy'o maite; naye yagiteekanga ku abo bonabona abakukyawa. ¹⁶ Era wazikiriryanga amawanga gonagona Mukama Katonda wo geyakugabulanga; amaiso go ti gaabasaasirenga: so toweereryanga bakatonda baabwe; kubanga ekyo kyabbanga kyambika gy'oli. ¹⁷ Bwe watumulanga mu mwoyo gwo nti Amawanga gano gansinga obusa; nsobola ntya okubanyaga? ¹⁸ tobatyanga; waijukiriranga dala Mukama Katonda wo bwe yakolere Falaawo, n'e Misiri yonayona; ¹⁹ okukemebwa okunene amaiso go kwe gaboine, n'o bubonero, n'e by'a magero, n’e ngalo egy'a maani, n'o mukono ogwagoloilwe Mukama Katonda wo bye yakutooleiremu: atyo Mukama Katonda wo bwewakolanga amawanga gonagona g'otya. ²⁰ Era Mukama Katonda wo yatumanga mu ibo eirumba okutuusya abo abalisigalawo ni beegisa lwe balizikirira mu maiso ge. ²¹ Tobatekemukiranga: kubanga Mukama Katonda wo ali wakati wo, Katonda omukulu era ow'e ntiisya. ²² Era Mukama Katonda wo yasimbulanga amawanga agali mu maiso go limu ku limu; tolisobola kubamalawo mulundi gumu, ensolo egy'o mu nsiko gireke okweyongera okukuyinga. ²³ Naye Mukama Katonda wo yabagabulanga mu maiso go; era yabeeraliikiriryanga okweraliikirira okungi, okutuusya lwe balizikirira. ²⁴ Era yabagabulanga bakabaka baabwe mu mukono gwo, era wazikiriryanga eriina lyabwe okuva wansi w'e igulu: ti waabbenga muntu eyasobolanga okwemerera mu maiso go, okutuusya lw'o libazikirirya. ²⁵ Ebifaananyi ebyole ebya bakatonda baabwe mwabyokyanga omusyo: ti weegombanga feeza waire zaabu ebiriku, so ti weetwaliranga, oleke okutegebwa mu ebyo: kubanga mizizo eri Mukama Katonda wo: ²⁶ so toleetanga kintu ky'o muzizo mu nyumba yo, weena n'o fuuka ekyalaamiibwe okufaanana nga ikyo: wakikyawiranga dala, era wakitamirwanga dala; kubanga kintu ekyalaamiibwe.