¹ Kale kino niikyo kiragiro, amateeka n'e misango, Mukama Katonda wanyu bye yalagiire okubyegeresya, kaisi mubikolenga mu nsi gye musomokera okwabamu okugirya: ² otyenga Mukama Katonda wo, okwekuumanga amateeka ge gonagona n'e biragiro bye bye nkulagira iwe n'obmwana wo n'o mwizukulu wo, enaku gyonagyona egy'o bulamu bwo; era kaisi owangaale enaku nyingi. ³ Kale wulira, iwe Isiraeri, okwatenga okukola kutyo; obonenga ebisa, era mwale inu, nga Mukama Katonda wa bazeiza bo bwe yakusuubizirye, mu nsi ekulukuta n'a mata n'o mubisi gw'e njoki. ⁴ Wulira, iwe Isiraeri: Mukama Katonda waisu niiye Mukama omumu: ⁵ era watakanga Mukama Katonda wo n'o mwoyo gwo gwonagwona, n'e meeme yo yonayona, n'a maani go gonagona. ⁶ Era ebigambo bino bye nkulagira watyanu byabbanga ku mwoyo gwo: ⁷ era wanyiikiranga okubyegeresya abaana bo, era wabitumulangaku bwewatyaanga mu nyumba yo, era bwewatambuliranga mu ngira, era bwewagalamiranga, era bwewagolokokanga: ⁸ Era wabisibanga okubba akabonero ku mukono gwo, era byabbanga eby'o ku kyeni wakati w'a maiso go. ⁹ Era wabiwandiikanga ku mifubeeto gy'e nyumba yo, no ku njigi gyo. ¹⁰ Awo olulituuka Mukama Katonda wo bw'a likuyingirya mu nsi gye yalayiriire Bazeiza bo, Ibulayimu n'o Isaaka n'o Yakobo okugikuwa: ebibuga ebinene ebisa by'o taazimbire, ¹¹ n'e nyumba egizula ebisa byonabyona, gy'o taizwirye, n'e bidiba ebyasimiibwe, by'otaasimire, ensuku egy'e mizabbibu n'e mizeyituuni gy'o taasimbire, n'olya n'o ikuta; ¹² kaisi ni weekuuma olekenga okwerabira Mukama: eyakutoire mu nsi y'e Misiri; mu nyumba y'o bwidu. ¹³ Watyanga Mukama Katonda wo; era oyo muweereryanga, era eriina lye lye walayiranga. ¹⁴ Ti musengereryanga bakatonda abandi, ku bakatonda ab'a mawanga agabeetooloire; ¹⁵ kubanga Mukama Katonda wo ali wakati wanyu niiye Katonda ow'e iyali; obusungu bwa Mukama Katonda wo buleke okukubuubuukiraku, n'a kuzikirirya okukutoola ku maiso g'ensi. ¹⁶ Temukemanga Mukama Katonda wanyu, nga bwe mwamukemeire e Masa. ¹⁷ Mwanyiikiranga okwekuuma ebiragiro bya Mukama Katonda wanyu n'e byo bye yategeezerye; n'a mateeka ge, ge yakulagiire: ¹⁸ Era wakolanga ekiri mu maiso ga Mukama ekituukirivu era ekisa: kaisi obonenga ebisa, era oyingire olye ensi ensi Mukama gye yalayiriire bazeiza bo, ¹⁹ okubabbingamu abalabe bo bonabona mu maiso go, nga Mukama bwe yatumwire. ²⁰ Omwana wo bw'a kubuulyanga mu biseera ebyaba okwiza, ng'a tumula nti ebyo niibyo yategeezerye, n'a mateeka, n’e misango Mukama Katonda waisu bye yabalagiire; amakulu gaabyo ki? ²¹ Kaisi n'o koba omwana wo, nti wabula baidu ba Falaawo mu Misiri; Mukama n’a tutoola mu Misiri n'e ngalo egy'a maani: ²² era Mukama n’a laga obubonero n'e by'a magero, ebinene era ebizibu, ku Misiri, ku Falaawo, n'o ku nyumba ye yonayona, mu maiso gaisu: ²³ n'a tutoola omwo, kaisi atuyingirye, okutuwa ensi gye yalayiriire bazeiza baisu. ²⁴ Era Mukama n'a tulagira okukolanga amateeka ago gonagona, okutyanga Mukama Katonda waisu, olw'o busa bwaisu enaku gyonagyona, Kaisi atukuumenga tuleke okufa, nga watyanu. ²⁵ Era kyabbanga butuukirivu gye tuli, bwe twakwatanga okukola ekiragiro kino okukola mu maiso ga Mukama Katonda waisu nga bwe yatulagiire. Ensuula