¹ Awo Musa n'ayeta Isiraeri yenayena n'a bakoba nti wulira, iwe Isiraeri, amateeka n'e misango bye ntumula mu matu ganyu watyanu, mubyege, mubikwatenga okubikola. ² Mukama Katonda waisu yalagaine endagaanu naife ku Kolebu. ³ Mukama teyalagaine ndagaanu eyo n'a bazeiza baisu, naye naife ife, abali wano fenafena nga balamu watyanu. ⁴ Mukama Yatumwire na imwe nga mubonagana n'a maiso ku lusozi ng'a yema wakati mu musyo, ⁵ (nayemerera wakati wa Mukama na imwe mu biseera ebyo, okubalaga ekigambo kya Mukama: kubanga mwabbaire mutiire olw'o musyo ni mutaniina ku lusozi;) ng'a. tumula nti ⁶ Ninze Mukama Katonda wo eyakutoire mu nsi y'e Misiri, mu nyumba y'o bwidu. ⁷ Tobbanga n'a bakatonda abandi we ndi. ⁸ Ti weekoleranga kifaananyi kyole, ekifaananyi ky'e kintu kyonakyona ekiri mu igulu waigulu, waire wansi ku itakali, waire mu maizi agali wansi w'e itakali: ⁹ tobivuunamiranga, so tobiweereryanga: kubanga ninze Mukama Katonda wo ndi Katonda w'e iyali, awalana ku baana obubbiibi bwa bazeiza baabwe, n'o ku banakabiri n'o ku banakasatu ku abo abankyawa; ¹⁰ era airiramu abantu enkumi n'e nkumi ku abo abantaka, abeekuuma amateeka gange. ¹¹ Tolayiriranga bwereere liina lya Mukama Katonda wo: kubanga Mukama talimulowooza nga abulaku musango omuntu alayirira obwereere eriina lye. ¹² Okwatanga olunaku olwa sabbiiti okulutukulya, nga Mukama Katonda wo bwe yakulagiire. ¹³ Enaku omukaaga okolanga n'o mala emirimu gyo gyonagyona: ¹⁴ naye olunaku olw'o musanvu niiyo sabbiiti ya Mukama Katonda wo: tolukolerangaku mirimu gyonagyona iwe waire mutaane wo waire muwala wo, waire omwidu wo, waire omuzaana wo; waire ente yo, waire endogoyi yo, waire ebisolo byo byonabyona, waire munaigwanga wo ali ewuwo; omwidu wo n'o muzaana wo bawumulenga: era nga naiwe. ¹⁵ Era waijukiranga nga wabbaire mwidu mu nsi y'e Misiri, Mukama Katonda wo n'a kutoolamu n'e ngalo egy'a maani n'o mukono ogwagoloilwe: Mukama Katonda wo Kyeyaviire akulagira okwekuumanga olunaku olwa sabbiiti. ¹⁶ Itaawo n'o mawo obateekangamu ekitiibwa, nga Mukama Katonda wo bwe yakulagiire: enaku gyo gibbe nyingi, era obone ebisa ku nsi Mukama Katonda wo gy'akuwa. ¹⁷ Toitanga. ¹⁸ So toyendanga: ¹⁹ So toibbanga. ²⁰ So towaayiriryanga muntu mwinawo: ²¹ So ti weegombanga mukali w'o muntu mwinawo, so toyaayaaniranga nyumba y'o muntu mwinawo, waire enimiro ye, waire omwidu we, waire omuzaana we, waire ente ye waire endogoyi ye, waire ekintu kyonakyona eky'o muntu mwinawo. ²² Ebigambo ebyo Mukama yabibuuliire ekibiina kyanyu kyonakyona ku lusozi ng'a yema wakati mu musyo n'o mu kireri n'o mu ndikirirya ekwaite, n'e idoboozi einene: n'atayongeraku bindi. N'a biwandiika ku bipande bibiri eby'a mabbaale n'a gampa: ²³ Awo olwatuukire, bwe mwawulira eidoboozi nga liva mu ndikirirya wakati, olusozi nga lwaka omusyo, ne munsemberera, abakulu bonabona ab'e bika byanyu, n'a bakaire banyu; ²⁴ ni mutumula nti bona, Mukama Katonda waisu atulagire ekitiibwa kye n'o bukulu bwe, era tuwuliire eidoboozi lye nga liva mu musyo: wakati: tuboine watyanu nga Katonda atumula n'o muntu n'abba mulamu: ²⁵ Kale atyanu twandifiiriire ki? kubanga omusyo guno omungi gwatuzikirirya: bwe twawulira ate eidoboozi lya Mukama Katonda waisu, twafa. ²⁶ Kubanga yani ku balina omubiri bonabona eyabbaire awuliire eidoboozi lya Katonda omulamu nga litumula nga liva mu musyo wakati, nga ife bwe tuwuliire, n'abba mulamu? ²⁷ Iwe sembera owulire byonabyona Mukama Katonda waisu by'e yatumula: kaisi otukobere byonabyona Mukama Katonda waisu byeyakukobera; feena tulibiwulira ni tubikola. ²⁸ Mukama n'a wulira eidoboozi ly'e bigambo byanyu bwe mwatumwire nanze; Mukama n'a nkomba nti mpuliire eidoboozi ly'e bigambo by'a bantu bano, bye bakukobeire: batumwire kusa byonabyona bye bakobere. ²⁹ Singa mulimu omwoyo mu ibo ogufaanana guti n'o kutya bandintiire ni beekuumanga ebiragiro byange byonabyona enaku gyonagyona, kaisi babone ebisa n'a baana baabwe emirembe gyonagyona ³⁰ Yaba obakobe nti mwireyo mu wema gyanyu. ³¹ Naye iwe, yemerera wano we ndi; nanze nakukobera ekiragiro kyonakyona n'a mateeka n'e misango by'o libegeresya, kaisi babikolenga mu nsi gye mbawa okugirya. ³² Kale mwakwatanga okukola nga Mukama Katonda wanyu bwe yabalagiire: timukyamiranga ku mukono omulyo waire ku mugooda. ³³ Mwatambuliranga mu ngira yonayona Mukama Katonda wanyu gye yabalagiire, kaisi mubbenga abalamu, era mubone ebisa, era mumale enaku nyingi mu nsi gye mulirya.