¹ Ne watyanu, iwe Isiraeri, wulira amateeka n'e misango, bye mbegeresya, okubikolanga; mubbe balamu, muyingire mulye ensi Mukama Katonda wa Bazeiza banyu gy'a bawa. ² Temutumulanga ku kigambo kye mbalagira, so temukisalangaku, mukwatenga ebiragiro bya Mukama Katonda wanyu bye mbalagira. ³ Amaiso ganyu gaboine Mukama kye yakolere olwa Baalipyoli: kubanga abantu bonabona abasengereirye Baalipyoli, Mukama Katonda wo yabazikiriirye wakati mu imwe. ⁴ Naye imwe abeegaitire n'o Mukama Katonda wanyu mukaali balamu buli muntu ku imwe watyanu. ⁵ Bona, mbegeresya amateeka n'e misango, nga Mukama Katonda wange bwe yandagiire, mukolenga mutyo wakati mu nsi gye muyingiramu okugirya. ⁶ Kale mubyekuumenga mubikolenga; kubanga ago niigo magezi ganyu n'o kutegeera kwanyu mu maiso g'a mawanga agawuliranga amateeka ago gonagona ni gatumula nti Mazima eigwanga lino eikulu niibo bantu ab'a magezi era abategeera. ⁷ Kubanga, igwanga ki eririna katonda ali okumpi nga Mukama Katonda waisu bw'ali bwe tumukoowoolanga? ⁸ Era igwanga ki eikulu eririna amateeka n'e misango egy'e nsonga ng'a mateeka gano gonagona bwe gali, ge nteekere mu maiso ganyu watyanu? ⁹ Kyooka wegendererye wekuume emeeme yo ng'o nyiikira, oleke okwerabira ebigambo amaiso go bye gaboine, bireke okuva mu mwoyo gwo enaku gyonagyona egy'o bulamu bwo; naye mubitegeezenga abaana bo n'a baana b'a baana bo; ¹⁰ olunaku lwe wayemereire mu maiso ga Mukama Katonda wo ku Kolebu, Mukama bwe yankobere nti nkuŋaanyirye abantu, nzena nabawulirya ebigambo byange, beege okuntyanga enaku gyonagyona gye babbanga abalamu ku nsi, era begeresyenga abaana baabwe. ¹¹ Ni musembera ni mwemerera wansi w'o lusozi; olusozi ni lwaka n'o musyo okutuusya ku mwoyo gw'e igulu, n'e ndikirirya, n'e kireri, n'e ndikirirya ekwaite. ¹² Mukama n'a tumula naimwe ng'ayema wakati mu musyo: mwawuliire eidoboozi ly'e bigambo, naye ni mutabona kifaananyi kyonakyona; idoboozi lyonka. ¹³ N'a bakobera endagaanu ye, gye yabalagiire okukola, niigo mateeka eikumi; nagawandiikire ku bipande by'a mabbaale bibiri. ¹⁴ Mukama n'a ndagira mu biseera ebyo okubegeresya amateeka n'e misango, mubikolenga mu nsi gye musomokera okwabamu okugirya. ¹⁵ Kale mwekuume inu; kubanga ti mwaboine kifaananyi kyonakyona ku lunaku Mukama lwe yatumwire na imwe ku Kolebu ng'a yema wakati mu musyo: ¹⁶ mulekenga okweyonoona ne mwekolera ekifaananyi ekyole nga kifaanana ekintu kyonakyona, ekifaananyi ky'e kisaiza oba eky'e kikali, ¹⁷ ekifaananyi ky'e nsolo yonayona eri ku nsi, ekifaananyi ky'e nyonyi yonayona erina ebiwawa ebuuka mu ibbanga, ¹⁸ ekifaananyi ky'e kintu kyonakyona ekyewalula ku itakali, ekifaaaanyi ky'e kyenyanza kyonakyona ekiri mu maizi wansi w'e itakali: ¹⁹ era olekenga okuyimusya amaiso go mu igulu, n'o bona eisana n'o mwezi n'e munyenye, niilyo eigye lyonalyona ery'o mu igulu, n'o sendebwasendebwa n'o bisinza, n'o biweererya, Mukama Katonda wo bye yagabiire amawanga gonagona agali wansi w'e igulu lyonalyona: ²⁰ Naye Mukama yabatwaire n'a batoola mu kikoomi eky'e kyoma, mu Misiri, okubba gy'ali abantu ab'e nvuma, nga watyanu. ²¹ Era ate Mukama yansunguwaliire nze ku lwanyu, n'a layira nze obutasomoka Yoludaani, waire okuyingira mu nsi eyo ensa, Mukama Katonda wo gy'a kuwa okubba obutaka: ²² naye kiŋwanira okufiira mu nsi muno, tekiŋwanira kusomoka Yoludaani: naye imwe mulisomoka: ni mulya ensi eyo ensa. ²³ Mwekuume mulekenga okwerabira Endagaanu ya Mukama Katonda wanyu, gye yalagaine naimwe, ne mwekolera ekifaananyi ekyole nga kirina engeri y'e kintu kyonakyona, Mukama Katonda wo kye yakugaine. ²⁴ Kubanga Mukama Katonda wo niigwo musyo ogwokya, Katonda ow'e iyali. ²⁵ Bwe wazaalanga abaana n'a baana b'a baana, era nga mumalire ebiseera bingi mu nsi, era nga mumalire okweyonoona, ni mwekolera ekifaananyi ekyole nga kirina engeri y'e kintu kyonakyona, ni mukola ekiri mu maiso ga Mukama Katonda wo ekibbiibi, okumusunguwalya: ²⁶ Njeta eigulu n'e nsi okubba abajulizi eri imwe watyanu, nga mulizikiririra dala mangu ku nsi gye musomokera Yoludaani okugyabamu okugirya; temuligimalaku naku nyingi, naye mulizikiririra dala. ²⁷ Era Mukama alibasaansaanya mu mawanga, era mulisigalawo batono mu bantu, Mukama gy'alibatwala ewala. ²⁸ Era muliweerererya eyo bakatonda, emirimu gy'e mikono gy'a bantu, emisaale n'a mabbaale, ebitabona waire okuwulira waire okulya waire okuwunyirirya. ²⁹ Naye nga mwema eyo bwe wasagiranga Mukama Katonda wo, wamubonanga bwe wamusagiranga n'o mwoyo gwo gwonagwona n'o bulamu bwo bwonabwona. ³⁰ Bwe wabba ng'o boine enaku; era ebyo byonabyona nga bikwiziire; mu naku egy'e nkomerero wairangawo eri Mukama Katonda wo, era wawuliranga eidoboozi lye; ³¹ kubanga Mukama Katonda wo Katonda w'o kusaasira; taakulekenga, so taakuzikiriryenga, so ti yeerabirenga ndagaanu ya bazeiza bo gye yabalayiriire. ³² Kubanga kale buulya enaku egy'e ira egyakusookere, okuva ku lunaku Katonda lwe yatondere abantu ku nsi, era okuva ku nkomerero y'e igulu okutuuka ku nkomerero yaalyo, oba nga waabbangawo ekifaanana ng'e kigambo kino ekikulu; oba kyawulirwanga ekiri kityo. ³³ Waabbangawo abantu abaawuliire eidoboozi lya Katonda nga litumula nga liva wakati mu musyo, nga iwe bwe wawuliire, ni babba balamu? ³⁴ Oba Katonda yabbaire agezeryeku okwaba okwetwalira eigwanga ng'a kitoola wakati mu igwanga liinaye, n'o kukema n'o bubonero n'e by'a magero n'e ntalo n'e ngalo egy'a maani n'o mukono ogwagoloilwe n'e by'e ntiisya ebikulu, nga byonabyona bwe byabbaire Mukama Katonda wanyu bye yabakoleire mu Misiri mu maiso ganyu? ³⁵ Lwe walagiibwe otyo Kaisi omanye nga Mukama niiye Katonda; wabula gondi wabula iye. ³⁶ Yakuwuliirye eidoboozi lye ng'a yema mu igulu kaisi akwegeresye: n'o ku nsi yakuboneserye omulimu gwe omunene; n'o wulira ebigambo bye nga biva wakati mu musyo. ³⁷ Era kubanga yatakire bazeiza bo, kye yaviire alonda eizaire lyabwe eririirawo, n'a kutoola mu Misiri iye ng'abba naiwe olw'o buyinza bwe obungi; ³⁸ okubbinga mu maiso go amawanga agaakusinga obukulu n'a maani, okukuyingirya iwe, okukuwa ensi yabwe okubba obutaka, nga watyanu. ³⁹ Kale manya watyanu, era okiteeke ku mwoyo, nga Mukama niiye Katonda mu igulu waigulu n'o mu nsi wansi: wabula gondi. ⁴⁰ Era weekuumanga amateeka ge n'e biragiro bye, bye nkulagira watyanu, obonenga ebisa iwe n'a baana bo abaliirawo, era omale enaku nyingi ku nsi, Mukama Katonda wo gy'a kuwa, emirembe gyonagyona. ⁴¹ Awo Musa kaisi n'ayawula ebibuga bisatu emitala we Yoludaani ku luuyi olw'e buvaisana; ⁴² omwiti airukirenga omwo, eyaitanga mwinaye ng'a taniirwe; so nga tamukyawanga; airukiranga mu kimu ku bibuga ebyo abbenga omulamu; ⁴³ Bezeri ekiri mu idungu, mu lusenyu, okubba eky'Abalewubeeni; n'e Lamosi ekiri mu Gireyaadi okubba eky'Abagaadi; n'e Golani ekiri mu Basani okubba eky'Abamanase. ⁴⁴ Era gano niigo mateeka Musa ge yateekere mu maiso g'a baana ba Isiraeri: ⁴⁵ buno niibwo bujulizi n'a mateeka n'e misango Musa bye yakobeire abaana ba Isiraeri bwe baviire mu Misiri; ⁴⁶ emitala wa Yoludaani, mu kiwonvu ekyolekera Besupyoli, mu nsi ye Sikoni kabaka w'Abamoli, eyatyamaanga mu Kesuboni, Musa n'a baana ba Isiraeri gwe baakubbire, bwe baaviire mu Misiri: ⁴⁷ ni balya ensi ye, n'e nsi y'e Ogi kabaka w'e Basani, bakabaka bombiri ab'Abamoli, abaabbanga emitala wa Yoludaani ku luuyi olw'e buvaisana; ⁴⁸ okuva ku Aloweri, ekiri ku mbali kw'e kiwonvu kye Alunoni, okutuusya ku lusozi Sayuuni (eyo niiyo Kerumooni), ⁴⁹ n Abona yonayona emitala wa Yoludaani ku luuyi olw'e buvaisana, okutuusya ku nyanza ya Alaba, awali entunumba gya Pisuga. Essuula