¹ Kaisi ni tukyuka ni twambukira mu ngira eyaba e Basani: Ogi kabaka w'e Basani n'a situla okutulumba, iye n'a bantu be bonabona, okulwanira Ederei. ² Mukama n'a nkoba nti ti mutya: kubanga mugabwire iye n'a bantu be bonabona n'e nsi ye mu mukono gwo; era olimukola nga bwe wakolere Sikoni kabaka w'Abamoli abatyamanga mu Kesuboni. ³ Awo Mukama Katonda waisu n'a gabula mu mukono gwaisu n'e Ogi kabaka w'e Basani n'a bantu be bonabona: ni tumwita okutuusya lwe watamusigaliirewo n'o mumu: ⁴ Ni tunyaga ebibuga bye byonabyona mu biseera ebyo; tewabbaire kibuga kye tutabanyagirku; ebibuga nkaaga, ensi yonayona eya Alugobu, obwakabaka bwa Ogi mu Basani. ⁵ Ebyo byonabyona byabbaire bibuga ebyazimbiibweku bugwe omuwanvu n'e njigi n'e bisiba; obutateekaku bibuga ebibula bugwe bingi inu: ⁶ Ni tubizikiririrya dala nga bwe twakolere Sikoni kabaka w'e Kesuboni, nga tuzikiririrya dala buli kibuga omuli abantu, wamu n'a bakali n'a baana abatobato. ⁷ Naye ente gyonagyona n'e byo bye twanyagire mu bibuga, ni twetwalira okubba omunyago. ⁸ Era mu biseera ebyo ni tutoola ensi mu mukono gwa bakabaka bombiri ab'Abamoli ababbaire emitala wa Yoludaani, okuva mu kiwonvu kya Alunoni okutuusya ku lusozi Kerumooni; ⁹ (Kerumooni Abasidoni bamwetere Siriyooni, n'Abamoli bamwetere Seniri;) ¹⁰ ebibuga byonabyona eby'o mu lusenyu, n'e Gireyaadi yonayona, n'e Basani yonayona, okutuusya ku Saleka n'e Ederei, ebibuga by'o bwakabaka bwa Ogi mu Basani: ¹¹ (Kubanga Ogi kabaka w'e Basani niiye yasigairewo yenka ku abo abaasigairewo ku Balefa; bona, ekitanda kye kyabbaire kye kyoma; tikiri mu Labba eky'a baana ba Amoni? obuwanvu bwakyo emikono mwenda, n'o bugazi bwakyo emikono ena, ng'o mukono gw'o muntu bwe guli.) ¹² N'e nsi eyo ni tugirya mu biseera ebyo: okuva ku Aloweri, ekiri ku mbali kw'e kiwonvu kya Alunoni, n'e kitundu ky'e nsi ey'e nsozi eya Gireyaadi, n'e bibuga byayo n'a biwa Abalewubeeni n'Abagaadi: ¹³ n'e kitundu kye Gireyaadi ekyasigairewo, n'e Basani yonayona, obwakabaka bwa Ogi, na biwa ekitundu ky'e kika kya Manase; ensi yonayona eya Alugobu, niiyo Basani yonayona, (Eyo eyetebwa nsi ya Balefa. ¹⁴ Yayiri Mutaane wa Manase n'a twala oluuyi lwonalwona olwa Alugobu okutuuka ku nsalo y'Abagesuli n'Abamaakasi; n'a gituuma iye Basani, N ng'e riina lye bwe lyabbaire, Kavosuyayiri, okutuusya watyanu.) ¹⁵ Gireyaadi n'e mpaayo Makiri, ¹⁶ n'Abalewubeeni n'Abagaadi ni mbawa okuva ku Gireyaadi okutuusya ku kiwonvu kya Alunoni, ekiwonvu ekya wakati, n'e nsalo yaakyo; okutuusya ku mwiga Yaboki, niiyo nsalo y'a baana ba Amoni; ¹⁷ era ne Alaba n'e Yoludaani n'e nsalo yaagwo; okuva ku Kineresi okutuusya ku nyanza ya Alaba, enyanza ey'o munyu, awali entunumba gye Pisuga ku luuyi olw'e buvaisana. ¹⁸ Ne mbalagira mu biseera ebyo nga ntumula nti Mukama Katonda wanyu abawaire ensi eno okugirya: mwasomoka nga mukwaite eby'o kulwanisya mu maiso ga bagande banyu abaana ba Isiraeri, abasaiza bonabona abazira. ¹⁹ Naye bakaali banyu n'a baana banyu Abatobato n'e bisibo byanyu (maite nga mulina ebisibo bingi) byabbanga mu bibuga byanyu bye nabawaire; ²⁰ okutuusya Mukama lw'aliwa bagande banyu okuwumula, nga mweena, era boona nga baliire ensi Mukama Katonda wanyu gy'a bawa emitala w'e Yoludaani: Kaisi ni mwira buli muntu mu butaka bwe bwe na bawaire. ²¹ Ni ndagira Yoswa mu biseera ebyo nga ntumula nti Amaiso go gaboine byonabyona Mukama Katonda wanyu by'akolere bakabaka bano bombiri: Atyo Mukama bw'alikola obwakabaka bwonabwona gye musomoka okwaba. ²² Temubatyanga: kubanga Mukama Katonda wanyu, oyo y'a balwaniriire. ²³ Ni negayirira Mukama mu biseera ebyo ng'a ntumula nti ²⁴ Ai Mukama Katonda, omogere okulaga omwidu wo obukulu bwo n'o mukono gwo ogw'a maani; kubanga katonda ki ali mu igulu oba mu nsi asobola okukola ng'e mirimu gyo bwe giri era ng'e bikolwa byo eby'a maani bwe biri? ²⁵ Nsomoke, nkwegayirira, mbone ensi ensa eri emitala wa Yoludaani, olusozi ludi olusa, ne Lebanooni. ²⁶ Naye Mukama n'a nsunguwalira nze ku bwanyu n'a tampulira: Mukama n'a nkoba nti kikumale: totumula ate nanze ku kigambo ekyo. ²⁷ Niina ku ntiiko ya Pisuga, oyimusye amaiso go omoge ebugwaisana n'o bukiika obugooda n'o bulyo n'e buvaisana, obone n'a maiso go: kubanga tolisomoka Yoludaani guno. ²⁸ Naye kuutira Yoswa omugumye omuwe amaani: kubanga niiye alisomoka ng'atangira abantu bano, era niiye alibasikisya ensi gy'olibona. ²⁹ Awo ni tutyama mu kiwonvu ekyolekera Besupyoli. Ensuula