¹ Awo kaisi ni tukyuka, ni tutambula mu idungu mu ngira ebita mu nyanza emyofu, nga Mukama bwe yankobere: ni twetooloolera olusozi Seyiri enaku nyingi. ² Mukama n'a tumula nanze nti ³ Mulwiire okwetooloola olusozi luno: mukyuke mwabe ebukika obugooda. ⁴ Wena lagira abantu ng'o tumula nti Mwaba kubita mu nsalo ya bagande banyu abaana ba Esawu abatyama ku Seyiri, era ibo balibatya: kale mwekuume inu mwenka: ⁵ ti mutongana nabo; kubanga tinjaba kubawa ku nsi yabwe waire awaniinibwa n'e kigere: kubanga nawaire Esawu olusozi Seyiri okubba obutaka. ⁶ Mwagulanga emere n'e feeza gye bali mulyenga; era n'a maizi mwagagulanga n'e feeza gye bali munywenga. ⁷ Kubanga Mukama Katonda wo akuwaire omukisa mu mulimu gwonagwona ogw'o mukono gwo: yamaite okutambula kwo mu idungu lino einene: emyaka gino ana Mukama Katonda wo ng'abba wamu naiwe; tewabbangawo kye wabulirwe: ⁸ Awo ni tubita ku mbali bagande baisu abaana ba Esawu abatyama ku Seyiri, mu ngira ya Alaba okuva mu Erasi ne Ezyonigeba. Ni tukyuka ni tubita mu ngira y'o mu idungu lye Mowaabu. ⁹ Mukama n'a nkoba nti tosunguwalya Mowaabu so tolwana nabo mu lutalo: kubanga ti njaba kukuwa ku nsi ye okubba obutaka; kubanga nawaire abaana ba Luuti Ali okubba obutaka. ¹⁰ (Abemi baatyamanga omwo oluberyeberye, eigwanga eikulu, era einene era eiwanvu nga Abanaki bwe bali; ¹¹ era boona bayeteibwe Balefa, nga Abanaki bwe babbaire; naye Abamowaabu babetere Bemi. ¹² Era n'Abakooli batyamanga ku Seyiri olubereberye, naye abaana ba Esawu ni babasikira; ne babazikirirya mu maiso gaabwe, ni batyama mu kifo kyabwe; nga Isiraeri bwe yakolere ensi ey'o butaka bwe Mukama gye yabawaire.) ¹³ Kale mugolokoke musomoke akaiga Zeredi. Ni tusomoka akaiga Zeredi. ¹⁴ Era enaku gye twamalire kasookeire tuva e Kadesubanea okutuusya lwe twasomokere akaiga Zeredi gyabbaire emyaka asatu mu munaana; okutuusya emirembe gyonagyna egy'a balwani lwe baweirewo wakati mu lusiisira, nga Mukama bwe yabalayiriire. ¹⁵ Era omukono gwa Mukama gwalwananga nabo, okubazikirirya wakati mu lusiisira, okutuusya lwe baweirewo. ¹⁶ Awo olwatuukire, abalwani bonabona bwe bamalire okuwaawo era nga bafiire mu bantu, ¹⁷ Mukama kaisi n'a nkoba nti ¹⁸ Atyanu wabita mu Ali, niiyo ensalo y'e Mowaabu: ¹⁹ era bwewasemberera abaana ba Amoni era ng'o boolekeire, tobasunguwalya so totongana nabo: kubanga ti njaba kukuwa ku nsi y'a baana ba Amoni okubba obutaka: kubanga nagiwaire abaana ba Luuti okubba obutaka. ²⁰ (Era n'eyo eyetebwa nsi ya Balefa: Balefa bagityamangamu eira; naye Abamoni babetere Bazamuzumu; ²¹ eigwanga eikulu era einene era eiwanvu. nga Abanaki bwe babbaire; naye Mukama yabazikiriirye mu maiso gaabwe; ni babasikira ne batyama mu kifo kyabwe: ²² nga bwe yakolere abaana ba Esawu, abaatyama ku Seyiri, bwe yazikiriirye Abakooli mu maiso gaabwe; ni babasikira, ni batyama mu kifo kyabwe Okutuusya atyanu: ²³ n'Abavi abatyamanga mu byalo okutuuka ku Gaza, Abakafutoli abaviire mu Kafutoli ni babazikirirya ni batyama mu kifo kyabwe.) ²⁴ Mugolokoke, mutambule, mubite mu kiwonvu kya Alunoni: bona, ngabwire mu mukono gwo Sikoni Omwamoli, kabaka w'e Kesuboni, n'e nsi ye: tandiika okugirya, olwane naye mu lutalo. ²⁵ Watyanu nasooka okuteeka entiisya yo n'e kitiibwa kyo ku mawanga agali wansi w'e igulu lyonalyona, abaliwulira eitutumu lyo ni batengera ni balumwa ku bubwo. ²⁶ Ne ntuma ababaka okuva mu idungu ery'e Kedemosi eri Sikoni kabaka w'e Kesuboni n'e bigambo eby'e mirembe, nga ntumula nti ²⁷ Mubite mu nsi yo: natambuliranga mu luguudo, ti njaba kukyamira ku mukono omulyo waire mugooda. ²⁸ Emere wangulyanga na feeza ndyenga; n’a maizi wangulyanga na feeza nywenga: kyoka mbitemu n'e bigere byange; ²⁹ ng'a baana ba Esawu abatyama ku Seyiri, n'Abamowaabu abatyama mu Ali bwe bankola; Okutuusya lwe ndisomoka Yoludaani okwaba mu nsi Mukama Katonda waisu gy'atuwa. ³⁰ Naye Sikoni kabaka w'e Kesuboni n'a tatuganya kubita ku mbali kwe: kubanga Mukama Katonda wo yakakanyairye omwoyo gwe, n'a muwaganyalya omwoyo gwe kaisi amugabule mu mukono gwo nga watyanu. ³¹ Mukama n'a nkoba nti Bona, ntanwire okugabula Sikoni n'e nsi ye mu maiso go: tandika okulya ensi ye kaisi ogisikire. ³² Sikoni kaisi na situla okutulumba, iye n'a bantu be bonabona okulwanira e Yakazi. ³³ Mukama Katonda waisu n'a mugabula mu maiso gaisu; ni tumwita iye n'a baana be n'a bantu be bonabona. ³⁴ Ne tunyaga ebibuga bye byonabyona mu biseera ebyo, ne tuzikiririrya dala buli kibuga omuli abantu, wamu n'a bakali n'a baana abatobato; tetwasigairyewo n'o mumu: ³⁵ ente gyonka gye twetwaliire okubba omunyago, wamu n'e byo bye twatoire mu bibuga bye twanyagire. ³⁶ Okuva ku Aloweri ekiri ku mbali g'e kiwonvu kya Alunoni, era okuva ku kibuga ekiri mu kiwonvu okutuusya ku Gireyaadi, wabula kibuga ekyatulemere olw'o bugulumivu bwakyo: Mukama Katonda waisu yagabwire byonabyona mu maiso gaisu: ³⁷ kyonka tewasembereire nsi y'a baana ba Amoni: oluuyi lwonalwona olw'o mwiga Yaboki, n'e bibuga eby'o mu nsi ey'e nsozi, ne yonayona Mukama Katonda waisu gye yatugaine. Essuula