¹ Era guno niigwo mukisa Musa omusaiza wa Katonda gwe yasabiire abaana ba Isiraeri nga akaali kufa. ² N'atumula nti Mukama yaviire ku Sinaayi, Era yabagolokokeire ng'ava ku Seyiri; Yamasamasire okuva ku lusozi Palani, N'ava eri obukumi bw'a batukuvu: Ku mukono gwe omulyo kwabbaire ku amateeka ag'o musyo gye bali: ³ Niiwo awo, ataka amawanga; Abatukuvu be bonabona bali mu mukono gwo. Ne batyama ku bigere byo; Buli muntu aliweebwa ku bigambo byo. ⁴ Musa yatulagiire amateeka, Obusika obw'e kibiina kya Yakobo. ⁵ Era yabbaire kabaka mu Yesuluni. Emitwe gy'a bantu bwe baakuŋaanyiziibwe, ebika byonabyona ebya Isiraeri wamu: ⁶ Lewubeeni abbenga omulamu, alekenga okufa; Naye abasaiza be babbenga batono: ⁷ Era guno niigwo mukisa gwa Yuda: n'a tumula nti wulira Mukama, eidoboozi lya Yuda, Omuyingirye eri abantu be: N'e mikono gye yeerwanirira; Era wabbanga mubeeri eri abalabe be. ⁸ N'o ku Leevi n'a tumula nti Sumimu wo ne Ulimu wo biri n'o musaiza wo atya Katonda, Iwe wakemeire e Masa, iwe wa wakaine naye ku maizi ag'e Meriba; ⁹ Eyatumwire ku itaaye n'o ku maye nti ti muboine; so teyaikiriirye bagande be, So teyamaite baana be iye: Kubanga bakwaite ekigambo kyo, Era beekuuma endagaanu yo. ¹⁰ Bayegeresyanga Yakobo emisango gyo, n'e Isiraeri bamwegeresyanga amateeka go: Bateekanga eby'o kwoterya mu maiso go, n'e kiweebwayo ekyokyebwa ekiramba ku kyoto kyo. ¹¹ Ebintu bye, Mukama, abiwenga omukisa, Oikirirye omulimu gw'e mikono gye: osumitire dala enkende yabwe abaamugolokokerangaku, n'abo abamukyawa balekenga okugolokoka ate. ¹² Ku Benyamini n'a tumula nti omutakibwa wa Mukama yatyamanga mirembe awali iye; Amubiikaku okuzibya obwire, Era atyama wakati w'e bibega bye ¹³ N'o ku Yusufu n'a tumula nti ensi ye eweebwe Mukama omukisa; Olw'e by'o muwendo omungi eby'o mu igulu, olw'o musulo, n'o lw'e nyanza egalamira wansi, ¹⁴ N'o lw'e by'o muwendo omungi eby'e bibala by'e isana. N'o lw'e by'o muwendo omungi ebiva mu kukula kw'e myezi, ¹⁵ N'o lw'e bikulu eby'e nsozi egy'e ira, N'o lw'e by'o muwendo omungi eby'e nsozi egitawaawo. ¹⁶ N'o lw'e by'o muwendo omungi eby'e nsi n'o kwizula kwayo, N'e kisa ky'oyo eyatyaime mu kisaka: Omukisa gwize ku mutwe gwa Yusufu, N'o ku bwezinge bw'o mutwe gw'oyo eyayawuliibwe na bagande be. ¹⁷ Niiyo ente ye emberyeberye, obukulu niibwo bubwe; N'a maziga ge, maziga ge mbogo: Aligasindikisya amawanga gonagona, enkomerero gy'e nsi: Era niigyo Emitwaalo gya Efulayimu, Era niigyo enkumi gya Manase. ¹⁸ N'o ku Zebbulooni n'a tumula nti Sanyuka, Zebbulooni; mu kufuluma kwo, weena, Isakaali, mu weema gyo. ¹⁹ Balyeta amawanga eri olusozi; Baweeranga eyo Sadaaka egy'o butuukirivu: Kubanga balinuuna okwizula kw'e nyanza, N'o bugaiga obugise obw'o mu musenyu. ²⁰ No ku Gaadi n'a tumwire nti aweebwe omukisa oyo agaziya Gaadi; Atyama ng'e mpologoma enkali, N'a taagula omukono; era obwezinge bw'o mutwe. ²¹ Ni yeegisira omugabo ogw'o luberyeberye, Kubanga, eyo ekitundu eky'o mugabi w'a mateeka, kyagisiibwe; n'a iza awamu n'e mitwe gy'a bantu, yakolere eby'o butuukirivu, ebya Mukama, n'e misango gye eri Isiraeri. ²² Ne ku Daani n'a tumula nti Daani mwana we mpologoma, Abuuka okuva mu Basani. ²³ N'o ku Nafutaali n'a tumula nti iwe Nafutaali, aikutire obuganzi, aizwire omukisa gwa Mukama: iwe lya ebugwaisana n'o bukiika obulyo. ²⁴ Ne ku Aseri n'a tumula nti Aseri aweebwe omukisa gw'a baana; asiimibwenga bagande be. Era ainikenga ekigere kye mu mafuta ²⁵ Ebisiba byo byabbanga kyoma n'o lukomo; Era ng'e naku gyo, amaani go bwe gabbanga gatyo. ²⁶ Wabula eyafaanana Katonda, iwe Yesuluni, Eyeebagala ku eigulu olw'o kukubbeera, Era ku ibbanga mu bukulu bwe obusinga: ²⁷ Katonda atawaawo niikyo ekifo ky'o tyamamu, Era emikono egitawaawo gikuwanirira: na simbulamu abalabe mu maiso go, natumula nti zikiriza. ²⁸ Era Isiraeri atyama mirembe, ensulo ya Yakobo eri lwonka, Mu nsi ey'e ŋaanu n'o mwenge; niiwo awo, eigulu niilyo litoonya omusulo. ²⁹ Olina omukisa iwe Isiraeri: Yani akufaanana iwe, eigwanga eryalokolwa Mukama, engabo ey'o kubbeerwa kwo, era niikyo kitala eky'o bukulu bwo obusinga! Era abalabe bo balikujeemulukukira; weena oliniina ku bifo byabwe ebya waigulu. Ensuula