¹ Awo Musa n'ava mu nsenyu gya Mowaabu n'a niina ku lusozi Nebo, ku ntiiko ya Pisuga, olwolekera Yeriko: Mukama n'a mulaga ensi yonayona eye Giriyaadi okutuusya ku Daani; ² n'e Nafutaali yonayona, n'e nsi, ya Efulayimu n'e Manase, n'e nsi yonayona eya Yuda okutuusya ku nyanza ey'e nyuma; ³ n'Obukiika obulyo, n'Olusenyu olw'e kiwonvu eky'e Yeriko ekibuga eky'e nkindu okutuusya ku Zowaali. ⁴ Mukama n'a mukoba nti eyo niiyo ensi gye nalayiriire Ibulayimu, Isaaka, n'o Yakobo, nga ntumula nti ndigiwa ezaire lyo ngikulengeirye n'a maiso go, naye tolisomoka kwabayo. ⁵ Awo Musa omwidu wa Mukama n'afiira eyo mu nsi ye Mowaabu, ng’e kigambo kya Mukama bwe Kyabbaire. ⁶ N'a muziika mu kiwonvu mu nsi ye Mowaabu awoolekera e Besupyoli: naye ti wabbaire muntu amaite amagombe ge ne watyanu. ⁷ Era Musa yabbaire yaakamala emyaka kikumi mu abiri bwe yafiire; eriiso lye lyabbaire ti rizibire, so n'a maani ge ag'o buzaaliranwa gabbaire ti gakendeireku. ⁸ Abaana ba Isiraeri ni bakungiira Musa amaliga mu nsenyu gya Mowaabu enaku asatu kale enaku egy'o kukungiramu nga banakuwalira Musa ni giwa. ⁹ Era Yoswa omwana wa Nuni yabbaire aizwire omwoyo ogw'a magezi; kubanga Musa yabbaire amuteekereku emikono; abaana ba Isiraeri ni bamuwuliranga, ni bakola nga Mukama bwe yalagiire Musa. ¹⁰ Era wakaali kuyimuka mu Isiraeri nabbi afaanana Musa, Mukama gwe yamaite ng'a bonagana n'a maiso: ¹¹ mu bubonero obwo bwonabwona n'e by'a magero, Mukama bye yamutumire okukola mu nsi y'e Misiri, eri Falaawo, n'eri abaidu be bonabona, n'eri ensi ye yonayona; ¹² n'o mu mukono ogwo gwonagwona ogw'a maani, n'o ntiisya eyo yonayona enene, Musa gye yakoleranga mu maiso ga Isiraeri yenayena.