¹ Wulira, iwe eigulu, nzena natumula; n’e nsi ewulire ebigambo by’o munwa gwange: ² Okwegeresya kwage kwatonya ng'a maizi, Okutumula kwange kwagwa ng'o musulo; ng'obwiziizi ku isubi eigonvu, era ng'olufunyagali ku mwido: ³ Kubanga natendera eriina lya Mukama: Muwe obukulu, Katonda waisu. ⁴ Lwazi, omulimu gwe gwatuukirira; Kubanga amangira ge gonagona musango: Katonda ow'o bwesigwa abula bubbiibi, w'a mazima oyo era we nsonga. ⁵ Baakolanga ebitali byo butuukirivu eri iye, ti baana be, niilyo eibala lyabwe: niigyo mirembe emikakanyali egyakyamire. ⁶ Bwe musasula Mukama mutyo, imwe abantu abasirusiru ababula magezi? Ti niiye itaawo eyakugulire? Niiye yakukolere, niiye yakunywezerye iye. ⁷ Ijukira enaku egye ira, lowooza emyaka gy'e mirembe emingi: Buulya itaawo, yakulaga; Abakaire bo, bakukobera. ⁸ Ali waigulu einu bwe yawaire amawanga obusika bwabwe, bwe yayawire abaana b'a bantu: Yateekerewo ensalo gy'a mawanga ng'o muwendo bwe gwabbaire ogw'a baana ba Isiraeri. ⁹ Kubanga omugabo gwa Mukama niibo bantu be; Yakobo: niigwo muteeko gw'o busika bwe. ¹⁰ Yamusangire mu nsi ey'e idungu, Era mu kigumbo ekyereere ensolo we gikungira; Yamwetooloolanga, Yamwijanjabanga. Yamukuumanga ng'e mbooni y'e riiso lye: ¹¹ Ng'e ikookoma erisansaanya ekisu kyalyo, lipapalira ku bwana bwalyo, Lyayanjulwirye ebiwawa byalyo, n'a batwala, n'abasitulira ku byoya bye, ¹² Mukama yenka niiye Yamutangiire, So ti wabbanga katonda, gondi wamu naye. ¹³ Yamuniinisirye ku bifo ebigulumivu eby'e nsi, n'alya e kyengera eky’e nimiro; N'amusagiranga omubisi gw'e njoki okuva mu lwazi, n'a mafuta okuva mu lwazi olw'e mbaalebaale; ¹⁴ Omuzigo gw'e nte n'a mata g'e ntama, n'a masavu g'a baana b'e ntama, n'e ntama enume egy'e ngeri ey'e Basani, n'e mbuli emandwa; n'e ŋaanu eya sava ng'a masavu g'e nsigo; n'o nywanga omwenge oguva mu musaayi gw'o muzabbibu. ¹⁵ Naye Yesuluuni n'a savuwala, n'a samba: Wasavuwaire, wanewalire, wafuukire munyirivu: Kaisi n'a leka Katonda eyamukolere, n'a nyooma olwazi olw'o bulokozi bwe. ¹⁶ Ba mukwatisyanga eiyali na bakatonda abandi, Ba musunguwalyanga n'e by'e mizizo. ¹⁷ Baawanga sadaaka balubaale abatali Katonda, Bakatonda be baatamanyanga, bakatonda abayaka abakaiza bayimuke, bazeiza banyu be bataatyanga. ¹⁸ Lwazi eyakuzaire tomwijukira, Era weerabiire Katonda eyakuzaire. ¹⁹ Mukama n'akibona n'a batamwa Olw'o kusunguwalya kwa bataane be na bawala be. ²⁰ N'a tumula nti Nababayakiirye amaiso gange, ndibona enkomerero yaabwe bw'eribba: Kubanga niigyo mirembe egy'e kyeju ekingi, abaana omubula kwikirirya. ²¹ Ba nkwatisyanga eiyali n'ekyo ekitali Katonda; Bansunguwalyanga n'e bigambo byabwe ebibulamu: Nzena ndibakwatisya eiyali eri abo abatali igwanga; ndibasunguwalya n'e igwanga esirusiru. ²² Kubanga omusyo gukoleire mu busungu bwange; era gwakire okutuuka mu magombe aga wansi einu, Era gwokya ensi n'e kyengera kyayo, Era gukoleerya ensozi we gisibuka. ²³ Ndibatuumaku obubbiibi; ndimalira obusaale bwange ku ibo: ²⁴ Balikoozimba n'e njala, n'o kwokya okungi kulibamalawo, n''okuzikirira okukambwe; n'a mainu g'e nsolo ndibasindikira, n'o busagwa bw'e byewalula eby'o mu nfuufu. ²⁵ Ewanza ekitala kyabafuulanga bamulekwa, n'o mu bisenge entiisya; yazikiriryanga omulenzi era n'o muwala, anyonka era n'o musaiza amerere envi. ²⁶ Natumwire nti nandibasaansaanyirye wala, nandimalireyo okwijukirwa kwabwe mu bantu: ²⁷ Singa ti natiire kusunguwalya kwo mulabe, Abaabakyawa baleke okwebbeya, baleke okutumula nti omukono gwaisu gugulumizibwa, Era Mukama ti y'a kolere bino byonabyona: ²⁸ Kubanga nilyo eigwanga eritamaite kuteesya bigambo, so mubula kutegeera mu ibo. ²⁹ Singa ba magezi ni bategeera ni balowooza enkomerero yaabwe ey'o luvanyuma! ³⁰ Omumu yandibbingire atya olukumi; n'a babiri bandipyatisirye batya omutwalo, lwazi lwabwe singa teyabatundire, era Mukama singa ti yabagabwire? ³¹ Kubanga olwazi lwabwe ti ruli sooti olwazi lwaisu, waire abalabe baisu beene nga niibo basala omusango. ³² Kubanga omuzabbibu gwabwe gwaviire ku muzabbibu ogw'e Sodoma, n'o mu nimiro egy'e Gomola: egy'e izabbibu gyabwe izabbibu gyo mususa, Ebiyemba byagyo bikaawa: ³³ Omwenge gwabwe busagwa bwe misota, Era busagwa bukambwe bwe mbalasaasa. ³⁴ Kino kyagisiibwe gye ndi, nga kiteekeibweku akabonero mu bugaiga bwange? ³⁵ Okuwalana kwange, n'o kusasula, obwire bwe bulituuka ekigere kyabwe ni kityerera: Kubanga olunaku lwabwe olw'o kubona enaku luli kumpi: Ni byaba okubaizira biryanguwa: ³⁶ Kubanga Mukama alisalira abantu be omusango; era alyejjusa olw'a baidu be; bw'ali bona ng'o buyinza bwabwe buweirewo, so wabula asigairewo, oba musibe oba ti musibe. ³⁷ Era atumula nti Bakatonda baabwe bali waina, olwazi lwe beesiganga; ³⁸ Abaalyanga amasavu ag'e sadaaka gyabwe, abaanywanga omwenge ogw'ekyo kye baawangayo ekyokunywa. Bagolokokere bababbeere, babbe ekigo kyanyu, ³⁹ Mubone watyanu nga nze, ninze oyo, so wabula katonda wamu nanze: Nze ngita; era nze mpa obulamu; nsumitire, era mponya: So wabula asobola okulokola okutoola mu mukono gwange: ⁴⁰ Kubanga ngolola omukono gwange eri eigulu, ni ntumula nti nga bwe ndi omulamu emirembe gyonagyona, ⁴¹ Bwe ndiwagala ekitala kyange ekimasamasa, Omukono gwange ni gukwata ku musango; ndiwalana eigwanga ku balabe bange, ndisasula abo abankyawa. ⁴² Obusaale bwange ndibutamiirya omusaayi, n'e kitala kyange kirirya enyama; n'o musaayi gw'abo abaitibwa n'a bawambe, okuva ku mutwe gw'abo abatangira abalabe, ⁴³ Musanyuke, imwe amawanga, wamu n’a bantu be. Kubanga aliwalana eigwanga ly'o musaayi gw'a baidu be, era alisasula abalabe be okubonerezebwa; Era alitangirira ensi ye, abantu be. ⁴⁴ Musa n'a iza n'a tumula ebigambo byonabyona eby'o lwembo luno mu matu g'a bantu, iye n'o Koseya omwana wa Nuni: ⁴⁵ Musa n'a malira dala okutumula ebigambo ebyo byonabyona eri Isiraeri yenayena: ⁴⁶ n'a bakoba nti muteeke omwoyo gwanyu ku bigambo byonabyona bye mbategeeza watyanu; bye muliragira abaana banyu, okukwata ebigambo byonabyona eby'a mateeka ago okubikolanga. ⁴⁷ Kubanga ti kigambo ekibulamu gye muli kubanga niibwo bulamu bwanyu, era olw'e kigambo ekyo kyemwavanga muwangaala enaku gyanyu ku nsi gye musomokera Yoludaani okugirya. ⁴⁸ Mukama n'a koba Musa ku lunaku olwo nti ⁴⁹ Niina ku lusozi luno abalimu, ku lusozi Nebo, oluli mu nsi ya Mowaabu, olwolekera Yeriko; olengere ensi ya Kanani gye mpa abaana ba Isiraeri okubba obutaka: ⁵⁰ ofiire ku lusozi lw'o niinaku, okuŋaanyizibwe eri abantu bo; nga Alooni mugande wo bwe yafiirire ku lusozi Koola, n'a kuŋaanyizibwa eri abantu be: ⁵¹ kubanga mwansoberyeku wakati mu baana ba Isiraeri ku maizi ag'e Meriba mu Kadesi, mu idungu Zini; kubanga ti mwantukuzirye wakati mu baana ba Isiraeri. ⁵² Kubanga olirengera ensi mu maiso go; naye tolyabayo mu nsi gye mpa abaana ba Isiraeri. Essuula