¹ Awo Musa n'a yaba n'akobera Isiraeri yenayena ebigambo ebyo. ² N'a bakoba nti watyanu nakamala emyaka kikumi mu abiri; tinkaali nsobola kufuluma n'o kuyingira: era Mukama yankobere nti Toiza kusomoka Yoludaani ono. ³ Mukama Katonda wo niiye alikutangira okusomoka; niiye alizikirirya amawanga gano mu maiso go, weena oligalya: era Yoswa niiye alikutangira okusomoka, nga Mukama bwe yatumulanga. ⁴ Era Mukama alibakola nga bwe yakolere Sikoni n'e Ogi, bakabaka b'Abamoli, n'e nsi yabwe; be yazikiriirye. ⁵ Era Mukama alibagabula mu maiso ganyu, mwena mulibakola ng'e kiragiro kyonakyona bwe kiri kye mbalagiire. ⁶ Ba n'a maani, guma omwoyo, totya so tobatekemukira kubanga Mukama Katonda wo niiye oyo ayaba naiwe; taakulekenga so taakwabulirenga. ⁷ Awo Musa n'a yeta Yoswa n’a mukoba mu maiso ga Isiraeri yenayena nti Bba n'a maani, guma omwoyo: kubanga olyaba n'a bantu bano mu nsi Mukama gye yalayiriire bazeiza baabwe okubawa; era oligibasikisya. ⁸ Mukama niiye oyo abatangira; yabbanga naiwe, taakulekenga so taakwabulirenga: totya so totekemuka. ⁹ Awo Musa n'a wandiika amateeka gano n'a gawa bakabona abaana ba Leevi, abaasitulanga esanduuku ey'e ndagaanu ya Mukama, n'a bakaire bonabona aba Isiraeri. ¹⁰ Awo Musa n'a balagira ng'a tumula nti buli myaka musanvu bwe gyawangaku, mu kiseera ekyateekeibwewo eky'o mwaka ogw'o kusumululiramu, mu mbaga ey'e nsiisira. ¹¹ Isiraeri yenayena nga baizire okubonekera mu maiso ga Mukama Katonda wo mu kifo ky'a lyeroboza, wa someranga amateeka gano mu maiso ga Isiraeri yenayena mu matu gaabwe. ¹² Okuŋaanyanga abantu; abasaiza n'a bakali n'a baana Abatobato, n'o mu naigwanga wo ali munda mw'e njigi gyo, bawulire, era bayege, era batye Mukama Katonda wanyu, era bakwatenga ebigambo byonabyona eby'a mateeka gano okubikola; ¹³ era abaana baabwe; abakaali kumanya, bawulire era beege okutyanga Mukama Katonda wanyu, enaku gyonagyona nga mukaali mutyama mu nsi gye musomokera Yoludaani okugirya. ¹⁴ Mukama n'a koba Musa nti bona, enaku gyo giri kumpi kikugwaniire okufa: yeta Yoswa, mweyanjule mu weema ey'o kusisinkanirangamu, kaisi mulagire. Awo Musa n'o Yoswa ni baaba ni beeyanjula mu weema ey'o kusisinkanirangamu. ¹⁵ Awo Mukama n'a bonekera mu weema mu mpango y'e kireri: empango y'e kireri n'e yemerera waigulu w'o lwigi lw'e weema. ¹⁶ Mukama n'a koba Musa nti bona, oligona n'a bazeiza bo; n'a bantu bano baligolokoka ni baaba nga bayenda okusengererya bakatonda abandi ab'o mu nsi, gye baaba okubbanga mu ibo wakati, era balindeka ni bamenya endagaanu yange gye nalagaine nabo. ¹⁷ Obusungu bwange kaisi ni bubuubuuka ku ibo ku lunaku ludi, nzena ndibaleka, era ndibagisa amaiso gange, era baliriibwa, n'o bubbiibi n'e naku enyingi biribaizira; n'o kutumula ni batumula ku lunaku ludi nti obubbiibi buno ti niikyo kye buviire butwizira kubanga Katonda waisu tali mu ife? ¹⁸ Era tindireka kugisa maiso gange ku lunaku ludi olw'o bubbiibi bwonabwona bwe balibba nga bakolere, kubanga bakyukiire bakatonda abandi. ¹⁹ Kale watyanu mwewandiikire olwembo luno, era olwegeresye abaana ba Isiraeri: oluteeke mu minwa gyabwe, olwembo luno lubbenga omujulizi wange eri abaana ba Isiraeri. ²⁰ Kubanga bwe ndibba nga mbayingiirye mu nsi gye nalayiriire bazeiza baabwe, ekulukuta amata n'o mujenene gw'e njoki; era bwe balibba nga baliire ni baikuta, ni bageiza; kaisi ne bakyukira bakatonda abandi, ni babaweererya, ni banyooma nze, ni bamenya endagaanu yange. ²¹ Awo olulituuka, obubbiibi bungi n'e naku bwe biribba nga bibaiziire, olwembo luno lulitegeeza mu maiso gaabwe ng'o mujulizi; kubanga terulyerabirwa okuva mu minwa gy'e izaire lyabwe: kubanga maite okulowooza kwabwe kwe bagobereire, ne watyanu, nga nkaali kubayingirya mu nsi gye nalayiriire. ²² Awo Musa n’a wandiika olwembo luno ku lunaku olwo, n'a lwegeresya abaana ba Isiraeri. ²³ N'alagira Yoswa omwana wa Nuni, n'a tumula nti Bba n'a maani, guma omwoyo: kubanga oliyingirya abaana ba Isiraeri mu nsi gye nabalayiriire: nzena n'a bbanga wamu naiwe. ²⁴ Awo olwatuukire, Musa bwe yamaliire dala okuwandiika ebigambo eby'a mateeka gano mu kitabo, okutuusya lwe byaweire, ²⁵ Musa n'a lagira Abaleevi, abasitulanga esanduuku y'e ndagaanu ya Mukama ng'a tumula nti ²⁶ Mwirire ekitabo kino eky'a mateeka; mukiteeke ku mbali kw'e sanduuku y'e ndagaanu ya Mukama Katonda wanyu, kibbenga eyo okubba omujulizi gy'oli. ²⁷ Kubanga maite obujeemu bwo n'e ikoti lyo eikakanyali: bona, nga nkaali mulamu nga nkaali wamu na imwe lwatyanu, mwabbanga mutaka okujeemera Mukama; temulyeyongera inu nga malire okufa? ²⁸ Mukuŋaanyirye gye ndi abakaire bonabona ab'e bika byanyu, n'a baami banyu, kaisi ntumulire ebigambo bino mu matu gaabwe, era njete eigulu: n'e nsi okubba abajulizi gye bali. ²⁹ Kubanga maite nga mulyeyonoonera dala nga malire okufa, era mulikyama okuva mu ngira gye nabalagiire; era obubbiibi bulibabbaaku mu naku egy'e nkomerero; kubanga mulikola ekiri mu maiso ga Mukama ekibbiibi, okumusunguwalya olw'o mulimu gw'e mikono gyanyu. ³⁰ Era Musa n'a tumulira mu matu g'e kibiina kyonakyona ekya Isiraeri ebigambo eby'o lwembo luno, okutuusya lwe byaweire. Ensuula