¹ Awo olwatuukanga, ebyo byonabyona bwe birimala okukwizira, omukisa n'e kiraamo, bye ntekere mu maiso go, weena bwewaijukiranga mu mawanga gonagona Mukama Katonda wo gy'a kubbingiire, ² n'o irawo eri Mukama Katonda wo, n'o gondera eidoboozi lye nga byonabyona bwe biri bye nkulagira watyanu, iwe n'a baana bo, n'o mwoyo gwo gwonagwona, era n'e meeme yo yonayona; ³ Mukama Katonda wo kaisi n'akyusya okunyagibwa kwo; n'a kusaasira, n'a iryawo n'a kukuŋaanya ng'a kutoola mu mawanga gonagona, Mukama Katonda wo gye yakusaansaanirye. ⁴ Omuntu yenayena ku babo ababbingiibwe bw'abba ng'ali mu nsonda gy'e igulu, Mukama Katonda wo yakutoolanga eyo okukukuŋaanya, era yakusyomanga eyo: ⁵ era Mukama Katonda wo yakuyingiryanga mu nsi bazeiza bo gye baliire, weena oligirya; era alikukola kusa. alikwalya okusinga bazeiza bo. ⁶ Era Mukama Katonda wo alikukomola omwoyo, n'o mwoyo gw'e izaire lyo, okutakanga Mukama Katonda wo n'o mwoyo gwo gwonagwona, n'e meeme yo yonayona, Kaisi obbe omulamu. ⁷ Era Mukama Katonda wo aliteeka ebiraamo ebyo byonabyona ku balabe bo, n'o ku abo abaakukyawa, abakuyiganyanga. ⁸ Era oliirawo n'o gondera eidoboozi lya Mukama, n'o kola ebiragiro bye byonabyona, bye nkulagira watyanu. ⁹ Era Mukama Katonda wo alikwalya mu mulimu gwonagwona ogw'o mukono gwo, mu bibala by'o mubiri gwo, n'o mu bibala by'e kisibo kyo, n'o mu bibala by'e itakali lyo, olw'o busa: kubanga Mukama alikusanyukiraku ate olw'o busa, nga bwe yasanyukiire ku bazeiza bo: ¹⁰ oba ng'o ligondera eidoboozi lya Mukama Katonda wo, okwekuumanga ebiragiro bye n'a mateeka ge ebiwandiikiibwe mu kitabo kino eky'a mateeka; oba ng'o likyukira Mukama Katonda wo n'o mwoyo gwo gwonagwona n'e meeme yo yonayona. ¹¹ Kubanga ekiragiro kino kye nkulagira watyanu ti kyasobolenga kukukaluubirira, so ti kiri wala. ¹² Ti kiri mu igulu n'o kutumula n'o tumula nti Yani yatuniinira mu igulu, akituleetere, akituwulirye, Kaisi tukikole? ¹³ So ti kiri mitala w'e nyanza n'o kutmula n'o tumula nti Yani alituwungukira enyanza; akituleetere, akituwulirye, kaisi tukikole? ¹⁴ Naye ekigambo kikuli kumpi inu, mu munwa gwo n'o mu mwoyo gwo kaisi okikolenga. ¹⁵ Bona, watyanu ntekere mu maiso go obulamu n'o busa, n'o kufa n’o bubbiibi; ¹⁶ kubanga nkulagira watyanu okutakanga Mukama Katonda wo, okutambuliranga mu mangira ge, n'o kwekuumanga ebiragiro bye n'a mateeka ge n'e misango gye, kaisi obbenga omulamu oyalenga era Mukama Katonda wo kaisi akuwenga omukisa mu nsi gy'o yingira okugirya. ¹⁷ Naye omwoyo gwo bwe gwakyamanga n'o gaana okuwulira, naye n'o sendebwasendebwanga n'o sinzanga bakatonda abandi n'o baweereryanga; ¹⁸ mbategeezerya dala watyanu nga ti mulireka kuzikirira; temulimala naku gyanyu nyingi ku nsi gy'o somokera Yoludaani okuyingira okugirya. ¹⁹ Njeta eigulu n'e nsi okubba abajulizi gye muli watyanu, nga ntekere mu maiso go obulamu n'o kufa, omukisa n'okulaamibwa: kale weerobozye obulamu, Kaisi obbenga omulamu, iwe n'e izaire lyo: ²⁰ okutakanga Mukama Katonda wo, okugonderanga eidoboozi lye, n'o kwegaitanga naye: kubanga oyo niibwo bulamu bwo, era niikwo kuwangaala enaku gyo: Kaisi otyamenga mu nsi Mukama gye yalayiriire bazeiza bo, Ibulayimu, Isaaka, n'o Yakobo, okubawa. Ensuula