¹ Awo olwatuukanga, bwewanyiikiranga okuwulira eidoboozi lya Mukama Katonda wo, okukwata ebiragiro bye byonabona bye nkulagira watyanu, okubikolanga, Mukama Katonda wo yakugulumilyanga okusinga amawanga gonagona agali ku nsi: ² n'e mikisa gino gyonagyona gyakwiziranga gyakutuukangaku, bwe wawuliranga eidoboozi lya Mukama Katonda wo. ³ Wabbanga n'o mukisa mu kibuga, era wabbanga n'o mukisa mu kyalo. ⁴ Ekibala ky'o mubiri gwo kyabbanga n'o mukisa, n'e kibala ky'e itakali lyo, n'e kibala ky'e kisibo kyo, eizaire ly'e nte gyo n'a baana b'e mbuli gyo. ⁵ Ekiibo kyo kyabbanga n'o mukisa n'o lugyo lwo olw'o dyokoleramu. ⁶ Wabbanga n'o mukisa bwewayingiranga, era wabbanga n'o mukisa bwe wafulumanga: ⁷ Mukama yakubbiranga mu maiso go abalabe bo abakugolokokeraku: bafulumanga okukutabaala mu ngira imu, ni bairukanga mu maiso go mu mangira musanvu. ⁸ Mukama yalagiranga omukisa okubba ku iwe mu mawanika go, ne mu byonabona by'oteekaku omukono gwo; era yakuweeranga omukisa mu nsi Mukama Katonda wo gy'a kuwa. ⁹ Mukama yakunywezanga okubba eigwanga eitukuvu eri ye, nga bwe yakulayiriire; bwe wakwatanga ebiragiro bya Mukama Katonda wo n'o tambuliraaga mu mangira ge. ¹⁰ Awo amawanga gonagona ag'o ku nsi gabbanga ng'o tuumiibwe eriina lya Mukama; ni gakutyanga: ¹¹ Era Mukama yakugaigawalyanga olw'e bisa, n'e bibala by'o mubiri gwo n'o mu bibala by'e nsolo gyo n'o mu bibala by'e itakali lyo; mu nsi Mukama gye yalayiriire bazeiza bo okukuwa. ¹² Mukama yakwigulirangawo eigisiro lye eisa eigulu okugaba amaizi g'e nsi yo mu bwire bwayo, n'o kuwa omukisa omulimu gwonagwona ogw'o mukono gwo: era wawolanga amawanga mangi; so ti weewolenge. ¹³ Era Mukama yakufuulanga omutwe so ti mukira; era wabbanga waigulu wonka so ti wansi; oti wawuliranga ebiragiro bya Mukama Katonda wo; bye nkukuutira watyanu, okubikwatanga n'o kubikolanga; ¹⁴ n'o leka okukyamanga; okuva mu kigambo kyonakyona ku ebyo bye mbalagira watyanu, okwaba ku mukono omulyo waire ku mugooda, okusengererya bakatonda abandi okubaweererya: ¹⁵ Naye olulituuka, bw'o toliwulira eidoboozi lya Mukama Katonda wo, okukwata ebiragiro bye byonabona n'a mateeka ge bye nkulagira watyanu okubikola; ebiraamo bino byonabona birikwizira, birikutuukaku. ¹⁶ Oliraamibwa mu kibuga, era oliraamibwa mu kyalo. ¹⁷ Ekiibo kyo kiriraamibwa n'o lutiba lwo olw'o kudyokeramu. ¹⁸ Ebibala by'o mubiri gwo biriramiibwa, n'e bibala by'e itakali lyo, eizare ly'e nte gyo, n'a baana b'e mbuli gyo. ¹⁹ Walaamibwanga bwewayingiranga era walaamibwanga bwewafulumanga. ²⁰ Mukama yakusindikangaku okulaamibwa n'o kulemwa n'o kunenyezebwa; mu byonabona by'oteekaku omukono gwo okukola, okutuusya lw'o lizikirizibwa, n'o kutuusya lw'o lifaafaagana amangu; olw'o bubbiibi bw'e bikolwa byo ebyakunsengukirye. ²¹ Mukama yakulwalyanga kawumpuli yegaitenga naiwe okutuusya lw'a likumalawo okuva ku nsi, gy'o yingiramu okugirya. ²² Mukama yakukubbanga akakono, n'o musuja, n'o kuzimba, n'o kwokya okungi, n'e kitala, n'o kwonooneka, n'o kugengewala; era byakusengereryanga okutuusya lw'o lizikirira. ²³ N'e igulu lyo eriri waigulu ku mutwe gwo lyabbanga kikomo, n'e itakali eriri wansi wo lyabbanga kyoma. ²⁴ Mukama yafuulanga amaizi g'e nsi y'o kubba eifufuge n'e nfuufu: mu igulu mweyavanga okwika ku iwe, okutuusya lw'o lizikirizibwa. ²⁵ Mukama yakukubbanga mu maiso g'a balabe bo: wafulumanga okubatabaala mu ngira imu, era wairukanga mu mangira musanvu mu maiso gabwe: era wayiganyizibwanga eruuyi n'e ruuyi mu bwakabaka bwonabona obw'e nsi: ²⁶ N'o mulambo gwo gwabbanga kyo kulya kye nyonyi gyonagyona egy'o mu ibbanga, era kye nsolo egy'o ku nsi, so tewaabbengawo aligiguŋumula. ²⁷ Mukama yakuleetangaku eiyute ery'e Misiri, n'a mabbwa, n'o lukonvuba n'o buwere ebitakuwonyerekaku: ²⁸ Mukama yakuleetangaku eiralu n'o buzibe bw'a maiso n'o kusamaalirira kw'o mwoyo: ²⁹ era wawamantanga mu iyangwe, ng'o muwofu w'a maiso bw'a wamantira mu ndikirirya; so ti wabonenga mukisa mu mangira go: era wajoogebwanga bujoogebwi era wanyagibwanga enaku gyonagyona, so ti wabbengawo eyakulokola. ³⁰ Wayogerezyanga omukali, ogondi yagonanga naye: wazimbanga enyumba, so ti wabbeenga omwo: wasimbanga olusuku lw'e mizabbibu, so toolyenga bibala byalwo. ³¹ Ente yo yaitirwanga mu maiso go, so toogiryengaku: endogoyi yo yanyagibwanga lwa maani mu maiso go, so teekwiriiribwenga: entama gyo gyagabirwanga abalabe bo, so toobbengaku eyakulokolanga. ³² Batabane bo na bawala bo bagabirwanga eigwanga erindi, era amaiso go gamoganga gazibanga olw'o kubeegomba okuzibya obwire: so ti waabbengawo kintu ekyabbanga mu buyinza bw'o mukono gwo. ³³ Ebibala by'e itakali lyo, n'e mirimu gyo gyonagyona, eigwanga ly'o tomaite liribirya; era wajoogebwanga bujoogebwi era wabbetentebwanga enaku gyonagyona: ³⁴ n'o kulaluka n'o laluka olw'o kubona kw'a maiso go kwewabbanga. ³⁵ Mukama yakulwalyanga amakumbo n'a magulu eiyute ebbiibi, ly'o tawonyezeka, okuva munda w'e kigere kyo okutuusya ku bwezinge bw'o mutwe gwo. ³⁶ Mukama yakuleetanga iwe n'o kabaka gw'o liyimusya okukufuga, eri eigwanga ly'o tamanyanga iwe waire bazeiza bo; era waweereryeryanga eyo bakatonda abandi, emisaale n'a mabbaale. ³⁷ Era wafuukanga ekyewuunyo, olugero, n'e kigambo eky'o buwemu mu mawanga gonagona Mukama gy’e yakutwalanga. ³⁸ Wafulumyanga mu nimiro ensigo nyingi, wayingiryanga ntono; kubanga enzige yagiryanga: ³⁹ wasimbanga ensuku gy'e mizabbibu n'o girima, naye toonywenga ku nvinyu yaamu waire okukungula; kubanga akawuka kagiryanga. ⁴⁰ wabbanga n'e mizeyituuni mu nsalo gyo gyonagyona, naye toosaabenga mafuta gaagyo; kubanga omuzeyituuni gwo gwakunkumulanga ebibala byagwo. ⁴¹ Olizaala abaana ab'o bubwisuka n'a b'o buwala, naye tebaabbenga babo; kubanga balitwalibwa mu busibe: ⁴² Emisaale gyo gyonagyona n'e bibala by'e itakali lyo enzige yabiryanga. ⁴³ Munaigwanga ali wakati mu iwe yeyongerayongeranga okuniina waigulu okukusinga; weena watumultumulanga okwika wansi. ⁴⁴ Yakuwolanga; weena toomuwolenga: yabbanga mutwe, weena wabbanga mukira. ⁴⁵ Era ebiraamo ebyo byonabona byakwiziranga byakusengereryanga byakutuukangaku okutuusya lw'o lizikirizibwa; kubanga tewawuliire idoboozi lya Mukama Katonda wo, okukwata ebiragiro bye n'a mateeka ge bye yakulagiire: ⁴⁶ era byabbanga ku iwe okubba akabonero n'e kyewuunyo, n'o ku izaire lyo enaku gyonagyona: ⁴⁷ kubanga tewaweerererye Mukama Katonda wo n'e isanyu era n'o mwoyo ogujaguza, olw'e bintu byonabona okubba ebingi: ⁴⁸ kyewavanga oweererya abalabe bo Mukama basindikanga okukulumba, ng'o lumwa enjala n'e nyonta, era ng'oli bwereere, era ng'o bulwa ebintu byonabona: era yateekanga ejooko ey'e kyoma ku nkoto yo, okutuusya lw'a limala okukuzikirirya. ⁴⁹ Mukama alikuleetaku eigwanga ng'a kitoola wala mu nkomerero y'e nsi, ng'e ikookooma bw'e ribuuka; eigwanga ly'o tolitegeera lulimi lwalyo; ⁵⁰ eigwanga ery'o bweni obulalu, eritalitya maiso ga bakaire, so ti ririsaasira batobato: ⁵¹ yalyanga ebibala by'e nsolo gyo, n'e bibala by'eitakali lyo, okutuusya lw'o lizikirizibwa: era eritalikulekera ŋaanu, waire envinyu, waire amafuta, eizaire ly'e nte gyo, waire abaana b'e mbuli gyo, okutuusya lw'a likuzikirirya: ⁵² Era yakuzingizyanga mu miryango gyo gyonagyona, okutuusya enkomera gyo empaavu egiriku ebigo gye weesiga lwe girigwa mu nsi yo yonayona: era alikuzingizya mu miryango gyo gyonagyona mu nsi yo yonayona, Mukama Katonda wo gy'a kuwaire: ⁵³ Era walyanga ebibala by'o mubiri gwo iwe, enyama y'a baana bo ab'o bwisuka n'a b'o buwala Mukama Katonda wo b'a kuwaire; mu kuzingizibwa n'o mu kuziyizibwa abalabe bo kwe bakuziyizyanga; ⁵⁴ Omusaiza omugonvu mu imwe era omwenaanyi eini, eriiso lye lyabbanga ibbiibi eri mugande we n'eri omukali ow'o mu kifubba kye, n'eri abaana be abasigaire abakaali baliwo: ⁵⁵ n'o butawa n'atawa muntu yenayena ku ibo ku nyama y'a baana be b'alyanga ng'a bulaku ekimusigaliire; mu kuzingizibwa n'o mu kuziyizibwa omulabe wo kweyakuziyizanga mu miryango gyo gyonagyona. ⁵⁶ Omukali omugonvu mu imwe era omwenaanyi, ataganyirye kuniinisya ku itakali kigere kye olw'o kwenaanya n'o bugonvu, eriiso lye lyabbanga ibbiibi eri ibaye ow'o mu kifubba kye, n'eri mutaane we, n'eri muwala we; ⁵⁷ n'eri omwana we omutomuto afuluma wakati w'e bigere bye, n'eri abaana be b'alizaala; kubanga yabalyanga nkiso olw'o kubulwa ebintu byonabyona: mu kuzingizibwa n'o mu kuziyizibwa omulabe wo kweyakuziyizyanga mu miryango gyo. ⁵⁸ Bwe wakwatenga ebigambo byonabyona eby'o mu mateeka gano ebiwandiikiibwe mu kitabo kino okubikolanga, kaisi otyenga eriina lino ery'e kitiibwa era ery'e ntiisya, Mukama Katonda wo; ⁵⁹ awo Mukama yafuulanga ebibonyoobonyo eby'e kitalo, n'e bibonyoobonyo by'e zaire lyo, ebibonyoobonyo ebinene era ebirwawo einu, era endwaire endalu era egirwawo einu. ⁶⁰ Era yakuleetangaku ate endwaire gonagyona egy'e Misiri gye watyanga; era gyegaitanga naiwe. ⁶¹ Era na buli ndwaire na buli kibonyoobonyo ekitawandiikiibwe mu kitabo eky'a mateeka gano, ebyo Mukama yabikuleetangaku, okutuusya lw'o lizikirizibwa. ⁶² Era mulisigalawo omuwendo gwanyu nga mutono, waire nga mwabbaire ng'e munyenye egy'o mu igulu olw'o bungi; kubanga tewawuliire idoboozi lya Mukama Katonda wo. ⁶³ Awo olwatuukanga Mukama nga bwe yabasanyukiireku okubakola obusa n'o kubaalya; atyo Mukama yabasanyukirangaku okubazikirirya n’o kubafaafaaganya; era yabatoolebwangaku okuva ku nsi gy'o yingira okugirya. ⁶⁴ Era Mukama yakusaasaanyanga mu mawanga gonagona; okuva ku nkomerero y'e nsi okutuusya ku nkomerero y'e nsi; era waweerereryanga eyo bakatonda abandi b'o tomanyanga iwe waire bazeiza bo, emisaale n’a mabbaale. ⁶⁵ Era mu mawanga ago tolibona kwesiima kwonakwona, so n'e kigere kyo ti kyabbengaku we kiniina okuwumula: naye Mukama yakuwanga omwoyo ogutengera, n'a maiso agaziba, n'e meeme ekoozimba, ⁶⁶ n'o bulamu bwo bwa buusibwabuusibwanga mu maiso go; era watyanga emisana n'o bwire, so toobbengaku kw'otegeerera obulamu bwo bwe bwabba: ⁶⁷ amakeeri watumulanga nti singa buwungeire! era olweigulo watumulanga nti Singa bukyeire! olw'o kutya kw'o mwoyo gwo kwewatyanga, n'o lw'o kubona kw'a maiso go kw'e wabonanga. ⁶⁸ Era Mukama alikwirya mu Misiri ate n'a maato, mu ngira gye nakukobereku nti toliribona ate mulundi gw'o kubiri: era eyo mulyetunda eri abalabe banyu okubba abaidu n'a bazaana, so tewaabbengawo muntu eyabagulanga. Ensuula