¹ Awo Musa n'a bakaire ba Isiraeri, ni balagira abantu, nga batumula nti Mwekuumenga ekiragiro kyonakyona kye mbalagira watyanu. ² Kale olulituuka ku lunaku olwo lwe mulisomoka Yoludaani okuyingira mu nsi Mukama Katonda wo gy'a kuwa, olyesimbira amabbaale amanene, n'o gasiigaku enoni: ³ era oliwandiika ku igo ebigambo byonabona eby'a mateeka gano, bw'o limala okusomoka; Kaisi oyingire mu nsi Mukama Katonda wo gy'a kuwa, ensi ekulukuta amata n'o mubisi gw'e njoki, nga Mukama, Katonda wa bazeiza bo, bwe yakusuubizirye. ⁴ Awo olulituuka bwe mulibba nga musomokere Yoludaani; Kaisi ni musimba amabbaale gano, ge mbalagira watyanu, ku lusozi Ebali, n'o gasiigaku enoni. ⁵ Era olizimbira eyo ekyoto kya Mukama Katonda wo, ekyoto eky'amabbaale: togayimusyangaku kintu kye kyoma. ⁶ Ekyoto kya Mukama Katonda wo wakizimbisyanga amabbaale agatali mateme: era okwo kw'e waweeranga ebiweebwayo ebyokyebwa eri Mukama Katonda wo: ⁷ era wasalanga ebiweebwayo olw'e mirembe, n'o liiranga eyo; era wasanyukiranga mu maiso ga Mukama Katonda wo. ⁸ Era oliwandiikira dala kusa ku mabbaale ago ebigambo byonabona eby'a mateeka gano. ⁹ Awo Musa na bakabona Abaleevi ni bakoba Isiraeri yenayena nti Musirike, muwulire, iwe Isiraeri; watyanu ofuukire igwanga lya Mukama Katonda wo. ¹⁰ Kyewavanga ogondera eidoboozi lya Mukama Katonda wo, n'o kolanga ebiragiro bye n'a mateeka ge, bye nkulagira watyanu. ¹¹ Awo Musa n'a kuutiira abantu ku lunaku olwo, ng'a tumula nti ¹² Bano niibo balyemerera ku lusozi Gerizimu okusabira abantu omukisa nga mumalire okusomoka Yoludaani; Simyoni, n'o Leevi, n'o Yuda, no Isakaali, n'o Yusufu, n'o Benyamini: ¹³ era bano niibo balyemerera ku lusozi Ebali olw'o kulaama; Lewubeetu; Gaadi, n'o Aseri, n'o Zebbulooni; Daani, n'o Nafutaali. ¹⁴ Kale Abaleevi baliiramu ni bakoba abasaiza bonabona aba Isiraeri n'e idoboozi einene nti ¹⁵ Alaamiibwe omuntu akola ekifaananyi ekyole oba ekifumbe, eky'o muzizo eri Mukama; omulimu gw'e ngalo gy'o mukozi, n'a kisimba mu kyama. Abantu bonabona ni bairamu ne bakoba nti Amiina. ¹⁶ Alaamiibwe oyo anyooma itaaye oba maye. Abantu bonabona ni bakoba nti Amiina. ¹⁷ Alaamiibwe oyo aijulula ensalo yo muliraanwa we. Abantu bonabona ni bakoba nti Amiina. ¹⁸ Alaamiibwe oyo akyamya omuwofu w'a maiso okuva mu ngira. Abantu bonabona ni bakoba nti Amiina. ¹⁹ Alaamiibwe oyo akyamya ensonga ey'o munaigwanga n'abula itaaye n'o namwandu. Abantu bonabona ni bakoba nti Amiina. ²⁰ Alaamiibwe oyo agona n'o mukaali wa itaaye; kubanga abiikwire olukugiro lwa itaaye. Abantu bonabona ni bakoba nti Amiina: ²¹ Alaamiibwe oya agona n'e nsolo yonayona. Abantu bonabona ni bakoba nti Amiina. ²² Alaamiibwe oyo agona n'o mwanyoko we, omuwala wa itaaye oba omuwala wa maye. Abantu bonabona ni bakoba nti Amiina. ²³ Alaamiibwe oyo agona n'o muko we. Abantu bonabona ni bakoba nti Amiina. ²⁴ Alaamiibwe oyo akubba muliraanwa we mu kyama. Abantu bonabona ni bakoba nti Amiina. ²⁵ Alaamiibwe oyo alya empeera olw'o kwitisya omuntu abulaku musango. Abantu bonabona ne bakoba nti Amiina. ²⁶ Alaamiibwe oyo atanywezya bigambo by’a mateeka gano okubikolanga. Abantu bonabona ni bakoba nti Amiina. Essuula