¹ Awo olulituuka, bw'olibba ng'o yingiire mu nsi Mukama Katonda wo gy'a kuwa okubba obusika, n'o girya, n'o tyama omwo; ² olitoola ku biberyeberye by'e bibala byonabona eby'e itakali, by'o litoola mu nsi yo Mukama Katonda wo gy'a kuwa: n'o biteeka mu kiibo, n'o yaba mu kifo Mukama Katonda wo ky'alyeroboza okutyamisya omwo eriina lye. ³ Era oliiza eri kabona alibbaawo mu biseera ebyo, n’o mukoba nti njatuliire watyanu Mukama Katonda wo: nga nyingiire mu nsi Mukama gye yalayiriire bazeiza baisu okugituwa. ⁴ Kale kabona alitoola ekiibo ng'a kitoola mu mukono gwo; n’a kiteeka wansi mu maiso g'e kyoto kya Mukama Katonda wo. ⁵ Wena oliiramu n'o tumula mu maiso ga Mukama Katonda wo nti Omusuuli eyabbaire ng'ali kumpi okugota niiye yabbaire itawange, n'a serengeta mu Misiri, n'atyama omwo, omuwendo gwe nga mutono; n'afuuka eyo eigwanga, einene, ery'a maani, eryayalire. ⁶ Abamisiri ni batukola kubbiibi, ni batubonyaabonya, ni batuteekaku obwidu obukakanyali: ⁷ ni tukoowoola Mukama Katonda wa bazeiza baisu, Mukama n'a wulira eidoboozi lyaisu, n'a bona okubonaabona kwaisu, n'o kutegana kwaisu, n'o kujoogebwa kwaisu: ⁸ Mukama n'a tutoola mu Misiri n’e ngalo egy'a maani n'o mukono ogwagoloilwe, n'e ntiisya enyingi, n'o bubonero n'e by'a magero: ⁹ n'a tuyingirya mu kifo muno, n'a tuwa ensi eno, ensi ekulukuta n'a mata n'o mubisi gw'e njoki. ¹⁰ Era atyanu, bona, ndeetere ebiberyeberye eby'o ku bibala by'e itakali, ly'o mpaire iwe, ai Mukama. Era olibiteeka wansi mu maiso ga Mukama Katonda wo n'o sinza mu maiso ga Mukama Katonda wo: ¹¹ era olisanyukira ebisa byonabyona Mukama Katonda wo by'a kuwaire iwe n'e nyumba yo, iwe n'Omuleevi n'o mu naigwanga ali wakati wo. ¹² Bwe wamalanga okusoloozya ekitundu eky'e ikumi eky'e kyengera kyo kyonakyona mu mwaka ogw'o kusatu, niigwo mwaka ogusoloolezebwamu ekitundu eky'e ikumi, kaisi n'o kiwa Omuleevi, n'o mu naigwanga, n'a bula itaaye, n'o namwandu, baliire munda mw'e njigi gyo baikute; ¹³ era watumulanga mu maiso ga Mukama Katonda wo nti ebintu ebyatukuziibwe mbitoole mu nyumba yange; era mbiwaire Omuleevi, n'o munaigwanga, abula itaaye, n'o namwandu, ng'e kiragiro kyo kyonakyona bwe kiri kye wandagiire: tinsoberye ku biragiro byonabyona n'e kimu, so timbyerabiire: ¹⁴ tinkiryangaku nga nkaali mu naku gyange, so tinkigisangaku nga tindi mulongoofu, so tinkiwangaku olw'a bafu: nawuliire eidoboozi lya Mukama Katonda wange, nkolere nga byonabyona bwe biri bye wandagiire. ¹⁵ Moga ng'o yema mu kifo kyo ekitukuvu mw'o tyama, mu igulu, owe omukisa abantu bo Isiraeri, n'e itakali ly'o tuwaire, nga bwe walayiriire bazeiza baisu, ensi ekulukuta n'a mata n'o mubisi gw'e njoki. ¹⁶ Watyanu Mukama Katonda wo akulagira okukolanga amateeka gano n'e misango: kyewavanga obyekuuma n'o bikola n'o mwoyo gwo gwonagwona n'e meeme yo yonayona. ¹⁷ Oyatwire watyanu Mukama nga niiye Katonda wo, era nga watambuliranga mu mangira ge, ni weekuumanga amateeka ge n'e biragiro bye n'e misango gye; n'o wuliranga eidoboozi lye: ¹⁸ era Mukama ayatwire atyanu iwe okubbanga eigwanga ery'e nvuma eri iye mwene, nga bwe yakusuubizirye, era weekuumenga ebiragiro bye byonabyona; ¹⁹ era akugulumizyenga okusinga amawanga gonagona ge yakolere, olw'e itendo n'o lw'e riina n'o lw'e kitiibwa; era obbenga eigwanga eitukuvu eri Mukama Katonda wo; nga bwe yatumwire. Ensuula