¹ Bwe wabbangawo empaka n'a bantu, ni baiza okusalirwa omusango, ni bagubasalira; basaliranga omutuukirivu okugusinga, n’o mubbiibi okusingibwa; ² awo olwatuukanga, omubbiibi bweyabbanga akolere ogwamukubbya, omulamuzi yamugalamiryanga, yamukubbiranga mu maiso ge, ng'o bubbiibi bwe bwe buli, emiigo emibale. ³ Asobola okumusalira emiigo ana, tasukyangawo: mugande wo alekenga okufaanana atali w'o muwendo gy'oli, bw'abbanga asuukiryewo ng'a mukubbire emiigo mingi okusinga egyo. ⁴ Togisibanga munwa ente ng'e wuula. ⁵ Ab'o luganda bwe babbanga awamu, omumu ku ibo n’afa, nga abula mutaane, omukali w'oyo afiire tafumbirwanga wandi atali wo luganda: mugande wa ibaye ayingire gy'ali, amukwe, amukolere ebigwanira mugande wa ibaye ⁶ Awo olwatuukanga, omuberyeberye gw'a lizaala niiye yasikiranga eriina lya mugande we eyafiire, eriina lye lirekenga okusangulibwa okuva mu Isiraeri. ⁷ Era omusaiza bweyabbanga tataka kukwa mukali wa mugande we, mukazi wa mugande we ayambukenga mu mulyango eri abakaire, atumule nti Mugande wa bawange agaana okuyimusirya mugande we eriina mu Isiraeri, tataka kunkolera ebigwanira mugande wa ibawange. ⁸ Kale abakaire b'o mu kibuga kyabwe bamwetenga, bamukobe; kale bweyayemeranga n'a tumula nti ti ntaka kumukwa; ⁹ kale mukali wa mugande we aizenga gy'ali mu maiso g'a bakaire, anaanule engaito mu kigere kye, afuuje amatanta mu maiso ge; airemu atumule nti kityo bwe kyakolerwanga, omusaiza atazimba nyumba ya mugande we. ¹⁰ Era eriina lye lyetebwenga mu Isiraeri nti nyumba y'oyo eyananuliirwe engaito. ¹¹ Abasaiza bwe babbanga balwana bonka na bonka, mukali w'o mumu n'a sembera okulokola ibaye mu mukono gw'oyo amukubba, n'a golola omukono gwe, n'a mukwata wamberi: ¹² omutemangaku omukono, eriiso lyo ti risaasiranga. ¹³ Tobbanga n'e byo kupima ebitali bimu, ekinene n'e kitono, mu nsawo yo. ¹⁴ Tobbanga n'e bigero ebitali bimu, ekinene n'e kitono; mu nyumba yo. ¹⁵ Obbenga n'e ky'okupima ekituukirivu ekitasoba; obbenga n'e kigero ekituukirivu ekitasoba: enaku gyo gibbenga nyingi mu nsi Mukama Katonda wo gy'a kuwa. ¹⁶ Kubanga bonabona abakola ebiri ng'ebyo, bonabona abakola ebitali byo butuukirivu, muzizo eri Mukama Katonda wo. ¹⁷ Ijukira Amaleki bwe yakukoleire mu ngira bwe mwabbaire nga muva mu Misiri; ¹⁸ bwe yakusangire mu ngira, n'a ita abasembi enyuma wo, abanafu bonabona ab'e nyuma, bwe wazirikire era ng'okoowere; n'atatya Katonda. ¹⁹ Awo olulituuka, Mukama Katonda wo bw'alibba ng'akuwaire okuwumula eri abalabe bo bonabona enjuyi gyonagyona, mu nsi Mukama Katonda wo gy'a kuwa okubba obusika okugirya; kyoliva osangula okwijukiribwa kwa Amaleki wansi w'e igulu: ti weerabiranga. Ensuula