¹ Omusaiza bw'a twalanga omukali n'a mukwa, kale olwatuukanga, bw'a taaganjenga n'a katono mu maiso ge, kubanga aboine ku iye ekitali kisa, yamuwandiikiranga ebbaluwa ey'o kumubbinga, n'a gimuwa mu ngalo gye; n'a mubbinga mu nyumba ye: ² Awo bw'a bbanga aviire mu nyumba ye, asobola okwaba okubba omukali w'o musaiza ogondi. ³ Era ibaye ow'o kubiri bw'a mukyawanga, n'a muwandiikira ebbaluwa ey'o kumubbinga, n'a gimuwa mu ngalo gye, n'a mubbinga mu nyumba ye; oba ibaye ow'o kubiri bw'afanga, eyamukweire; ⁴ ibaye ow'o luberyeberye, eyamubbingire, tamutwalanga ate okumukwa, bwe yamalire okwonoonebwa; kubanga ekyo ky'o muzizo mu maiso ga Mukama: so tokolesyanga nsi bibbiibi, Mukama Katonda wo gy'a kuwa okubba obusika. ⁵ Omusaiza bw'a kwaanga omukali omuyaka, tatabaalanga n'e igye, so tasalirwanga mirimu gyonagyona: yamalanga omwaka gumu eika nga w'e idembe, yasanyusyanga omukali gw'a kweire. ⁶ Omuntu yenayena tasingirwanga lubengo waire enso: kubanga asingirwa obulamu bw'o muntu. ⁷ Bwe basanganga omuntu ng'a ibba omuntu yenayena ku bagande be abaana ba Isiraeri, n'a mukola ng'o mwidu, oba n'a mutunda; kale omubbiibi oyo yaitibwanga: otyo bwewatoolanga obubbiibi wakati mu iwe. ⁸ Weekuumenga mu kibonyoobonyo eky'e bigenge, okwatirenga dala okolenga byonabyona bakabona Abaleevi bye babegeresyanga: nga bwe nabalagiire ibo, mutyo bwe mwakwatanga okukola. ⁹ Ijukira Mukama Katonda wo bwe yakolere Miryamu, mu ngira bwe mwabbaire muva mu Misiri. ¹⁰ Bw'o yazikanga mwinawo ekintu kyonakyona ekyazikiibwe, toyingiranga mu nyumba ye okusyoma omusingo gwe. ¹¹ Wayemereranga ewanza, n'o muntu gw'o yazika yafulumyanga omusingo ewanza gy'oli. ¹² Era bw'abbanga omwavu, togonanga ng'olina omusingo gwe: ¹³ tolekanga kumwirirya musingo obwire bwe bwawungeeranga, kaisi agone mu kivaalo kye, era akusabire omukisa: era kyabbanga butuukirivu eri iwe mu maiso ga Mukama Katonda wo. ¹⁴ Tojooganga musenze akolera empeera omwavu eyeetaaga, bw'aba ku muwendo gwa bagande bo oba ku muwendo gwa banaigwanga bo abali mu nsi yanyu munda w'e njigi gyo: ¹⁵ ku lunaku lwe mwa muwanga empeera ye, so n’e isana tirigwanga ng'e kaali eriyo; kubanga mwavu era agiteekaku omwoyo gwe: alekenga okukungiranga Mukama okukuwaabira, ni kibba kibbiibi gy'oli. ¹⁶ Baitawabwe ti baitibwanga okubalanga abaana baabwe, so n'a baana ti baitibwanga okubalanga baitawabwe: buli muntu bamulangenga ekibbiibi kye iye okumwita. ¹⁷ Tokyamyanga musango gwa munaigwanga, waire ogwoyo abula itaaye; so tosingirwanga kivaalo kya na mwandu: ¹⁸ naye waijukiranga nga wabbaire mwidu mu Misiri, Mukama Katonda wo n'a kununula n'a kutoolayo: kyenva nkulagira okukolanga ekigambo ekyo. ¹⁹ Bw'o kungulanga ebikungulwa byo mu nimiro yo ni weerabira ekinywa mu nimiro, toirangayo ate okukisyoma; kyabbanga kya munaigwanga, ky'oyo abula itaaye, era kya namwandu: Mukama Katonda wo kaisi akuwenga omukisa mu mulimu gwonagwona ogw'e ngalo gyo. ²⁰ Bw'okubbanga omuzeyituuni gwo, toiranga mu matabi lwo kubiri: gwabbanga gwa munaigwanga, gw'oyo itaaye, era gwa namwandu. ²¹ Bw'o kungulanga eizabbibu ery'o mu lusuku lwo, toirangamu ng'o malire omulundi gumu: lya bbanga lya munaigwanga, ly'oyo itaaye, era lya na mwandu. ²² Era waijukiranga nga wabbaire mwidu mu nsi y'e Misiri: kyenva nkulagira okukolanga ekigambo ekyo. Ensuula