¹ Eyasumitiibwe, oba eyasaliibweku ebitundu by'o mubiri gwe eby'e kyama, tayingiranga mu ikuŋaaniro lya Mukama. ² Omwana omwebolererye tayingiranga mu ikuŋaaniro lya Mukama; okutuusya ku mirembe eikumi tewabbangawo ku babe abayingira mu ikuŋaaniro lya Mukama. ³ Omwamoni oba Omumowaabu tayingiranga mu ikuŋaaniro lya Mukama; okutuusya ku mirembe eikumi ti wabbangawo ku bantu baabwe abayingira mu kuŋaaniro lya Mukama enaku gyonagyona: ⁴ kubanga tebabasisinkaine mu ngira nga balina emere n'a maizi, bwe mwaviire mu Misiri; era kubanga bawereire Balamu omwana wa Byoli okumutoola mu Pesoli eky'o mu Mesopotamiya, okumulaama. ⁵ Naye Mukama Katonda wo yagaine okuwulira Balamu; naye Mukama Katonda wo n'afuula ekiraamo okubba omukisa gy'oli, kubanga Mukama Katonda wo yakutakire. ⁶ Tosagiranga mirembe gyabwe waire omukisa gwabwe enaku gyo gyonagyona emirembe gyonagyona. ⁷ Tokyawanga Mwedomu; kubanga mugande wo: tokyawanga Mumisiri; kubanga wabbaire mugeni mu nsi yaabwe. ⁸ Abaana banakabiri abalibazaalirwa baliyingira mu ikuŋaaniro lya Mukama. ⁹ Bw'o tabaalanga mu nsiisira okulwana n'a balabe bo, wekuumanga mu buli kintu ekibbiibi. ¹⁰ Bwe wabbanga mu imwe omusaiza yenayena, atali mulongoofu olw'ekyo ekyamubbangaku obwire, yafulumanga mu lusiisira, tayingiranga munda w'o lusiisira: ¹¹ naye olwatuukanga, obwire bwe buwungeeranga, yabbanga n'a maizi: kale eisana bwerimalanga okugwa, n'a yingiranga mu lusiisira. ¹² Era bwewabanga n'e kifo ewanza w'o lusiisira, gyewafulumanga: ¹³ era wabbanga n'e kisimu mu bintu byo; awo olwatuukanga, bwewafulumanga n'o tyama, wakisimisyanga n'o kyuka n'o biika ku ekyo ekyakuvangamu: ¹⁴ kubanga Mukama Katonda wo atambulira wakati, mu lusiisira lwo, okukuwonya, n'o kugabula abalabe bo mu maiso go; olusiisira lwo kye lwavanga lubba olutukuvu: alekenga okubona mu iwe ekintu kyonakyona ekitali kirongoofu, n’a kukubba amabega. ¹⁵ Toiryanga eri mukama we omwidu eyairukire ku mukama we okwiza gy'oli: ¹⁶ yatyamanga naiwe, wakati mu iwe, mu kifo kyeyatakanga munda mw'e njigi gyo olumu, bweyasinganga okusiima: tomujooganga. ¹⁷ Ti wabbanga mwenzi ku bawala ba Isiraeri, so tewabbanga alya ebisiyaga ku bataane ba Isiraeri. ¹⁸ Toleetanga mpeera y'o mwenzi, waire empeera y'e mbwa, mu nyumba ya Mukama Katonda wo olw'o bweyamu bwonabwona: kubanga ebyo byombiriri bye mizizo eri Mukama Katonda wo. ¹⁹ Towolanga mugande wo lwa magoba; amagoba ag'e feeza, amagoba ag'e byokulya, amagoba ag'e kintu kyonakyona ekiwolwa olw'a magoba: ²⁰ munaigwanga ti kibbiibi okumuwola olw'a magoba; naye mugande wo tomuwolanga lwa magoba: Mukama Katonda wo kaisi akuwenga omukisa mu byonabyona by'o teekaku omukono gwo, mu nsi gy'o yingiramu okugirya. ²¹ Bwe weyamanga obweyamu Mukama Katonda wo, totenguwanga kubusasula: kubanga Mukama Katonda wo talireka kububuulya gy'oli: era kyandibbaire kibbiibi mu iwe: ²² Naye bw'o lekanga okweyama, ti kiribba kibibiibi mu iwe. ²³ Ekyabbaire kiviire mu mumwa gwo wakyekuumanga n'o kikola; nga bwe weeyamire Mukama Katonda wo, ekiweebwayo ku bubwo, kye wasuubizirye n'o munwa gwo. ²⁴ Bw'o yingiranga mu lusuku olw'e mizabbibu olwa mwinawo, ti kibbiibi okulya eizabbibu okwikuta nga bw'otaka iwe: naye togisakangaku mu kintu kyo. ²⁵ Bw'o yingiranga mu ŋaanu ekaali kukungulwa eya mwinawo, ti kibbiibi okunoga ebirimba n'e ngalo gyo; naye toteekanga kiwabyo kuŋaanu ekaali kukungulwa eya mwinawo Ensuula