¹ Tobonanga ente yo mugande wo waire entama ye ng'e kyama, ni wegisa okuva gye giri: tolekanga kugiirya eri mugande wo. ² Era mugande wo bw'abba nga takuli kumpi oba bw'obba nga tomumaite, wagitwalanga eika ewuwo, yabbaanga naiwe okutuusya mugande wo lw'aligisagira, n'o giirya ate gy'ali. ³ Era wakolanga n'e ndogoyi ye otyo; era wakolanga n'e kivaalo kye otyo; era wakolanga na buli kintu ekya mugande wo ekyamugotanga naiwe ng'o kirondere: okwegisa ti kusa. ⁴ Tobonanga ndogoyi ya mugande wo waire ente ye ng'e gwire mu ngira, ni wegisa okuva gye giri: tolekanga kumubbeera okugiyimusya ate. ⁵ Omukali tavalanga ky'o musaiza, so n'o musaiza tavalanga kivaalo ky'o mukali: kubanga buli akola ebyo wo muzizo eri Mukama Katonda wo. ⁶ Ekisu ky'e nyonyi bwe kibba nga kikuli mu maiso mu ngira, ku musaale gwonagwona oba wansi, obwana nga buliwo oba magi, maye ng'atyaime ku bwana oba ku magi, totwalanga maye wamu n'a magi: ⁷ tolekanga kwita maye, naye osobola okwetwalira obwana; kaisi obonenga ebisa, era owangaalenga enaku nyingi. ⁸ Bw'o zimbanga enyumba enjaaka, wakolanga omuziziko ku ntiiko, ng'o muntu yenayena ayemere okwo n'agwa, olekenga okuleeta omusaayi ku nyumba yo. ⁹ Tosiganga ngeri ibiri gye nsigo mu lusuku lwo olw'e mizabbibu: olekenga okufiirwa ebibala byonabyona, ensigo gye wasigire n'e kyengera eky'o lusuku. ¹⁰ Tolimisyanga nte n'e ndogoyi wamu. ¹¹ Tovaalanga lugoye olugaita ebibiri, ebyoya n'e segamwenge wamu. ¹² Wekoleranga amatanvuuwa mu mpete ina egy'e kivaalo kyo ky'o vaala. ¹³ Omusaiza yenayena bwakwanga omukali, n'a yingira gy'ali, n'a mukwa, ¹⁴ n'a muwaabira eby'e nsoni, n'a muleetaku eriina eibbiibi, n'a tumula nti nakweire omukali ono, kale bwe namusembereire, ni ntamubonaku bubonero bwo butamanya musaiza: ¹⁵ awo itaaye w'o mukali n'o maye kaisi ni bairira obubonero bw'o muwala oyo obw'o butamanya musaiza ni babuleetera abakaire b'e kibuga mu mulyango: ¹⁶ itaaye w'o muwala n’akoba abakaire nti Omusaiza ono na muwaire omwana wange okumukwa, naye amukyawire; ¹⁷ era, bona, amuwabiire eby'e nsoni, ng'a koba nti ti naboine mu mwana wo bubonero bw'o butamanya musaiza; era naye obubonero bw'o mwana wange obw'o butamanya musaiza buuno. Kale ni bayaliira ekivaalo mu maiso g'a bakaire b'e kibuga. ¹⁸ Awo abakaire b'e kibuga ekyo ni batwala omusaiza oyo ni bamukubba; ¹⁹ ne bamutanzya sekeri egy'e feeza kikumi, ni bagiwa itawabwe w'o muwala oyo, kubanga yamuleetereku eriina eibbiibi omuwala wa Isiraeri: era yabbanga mukali we; tamubbinganga enaku gye gyonagyona. ²⁰ Naye oba ng'e kigambo kino kya mazima, obubonero bw'o butamanya musaiza obutaboneka mu muwala: ²¹ awo ni bafulumya omuwala oyo mu mulyango gw'e nyumba ya itaaye, abasaiza ab'o mu kibuga kyabwe ne bamukubba amabbaale ni bamwita: kubanga yakolere obusirusiru mu Isiraeri, okwendera mu nyumba ya itaaye: bwe watoolanga otyo obubbiibi wakati mu iwe. ²² Bwe basanganga omusaiza ng'a gona n'o mukali eyafumbiirwe ibaye, bombiri bafenga omusaiza eyagonere n'o mukali, n'o mukali: otyo bwewatoolanga obubbiibi mu Isiraeri. ²³ Bwe wabbangawo omuwala atamanyanga musaiza ayogerezebwa omusaiza, omusaiza n'a musanga mu kibuga n'a gona naye; ²⁴ bombiri mwabafulumyanga eri wankaaki w'e kibuga ekyo, ne mubakubba amabbaale n'o kufa ne bafa; omuwala kubanga ti yakubbire nduulu, ng'ali mu kibuga; n'o musaiza kubanga yatoowazirye mukali wa mwinaye: otyo bwe watoolanga obubbiibi wakati mu iwe. ²⁵ Naye omusaiza bw'a sanganga omuwala ayogerezebwa mu nimiro, omusaiza n'a muwalirizya, n'a gona naye; omusaiza eyagonere naye yenka niiye yafanga: ²⁶ naye omuwala tolimukola kintu; ku muwala kubula kibbiibi ekyamwitisya: kuba ng'o muntu bw'a golokokera ku mwinaye n'a mwita, n'e kigambo ekyo bwe kiri kityo: ²⁷ kubanga yamusangire mu nimiro; omuwala ayogerezebwa n'a kubba enduulu, ne watabbaawo amulokola. ²⁸ Omusaiza bw'a sanganga omuwala atamanyanga musaiza, atayogerezebwa, n'a mukwata n'a gona naye ni bababona; ²⁹ kale omusaiza eyagonere naye yamuwanga itaaye w'o muwala sekeri egy'e feeza ataanu, era yabbanga mukali we, kubanga yamutoowazirye; tasobola kumubbinga enaku gye gyonagyona. ³⁰ Omusaiza takwanga mukali wa itaaye, so tabiikulanga lukugiro lwa itaaye. Ensuula