¹ Omuntu bweyaasangibwanga ng'aitibwe mu nsi Mukama Katonda wo gy'a kuwa okugirya, ng'ali mu nsiko, so ti kimanyibwa bw'ali amukubbbire: ² abakaire ibo n'a balamuli ibo kaisi ni bafulumanga, era bageranga okutuuka ku bibuga ebimwetooloire oyo eyaitiibwe: ³ awo olwatuukanga ekibuga ekisinga okubba okumpi omuntu eyaitiibwe, abakaire b'e kibuga ekyo bairiranga ente enduusi okugitoola mu nte, etekolebwanga mirimu, etewalulanga ng'eri mu jooko; ⁴ era abakaire b'e kibuga ekyo baserengetyanga enduusi mu kiwonvu omuli amaizi agakulukuta, ekitali kirime so ekitali kisige, ni bakutula eikoti ly'e nte enduusi eyo mu kiwonvu: ⁵ awo bakabona abaana ba Leevi basemberanga; kubanga abo Mukama Katonda wo be yeerobozerye okumuweereryanga, n'o kusabanga omukisa mu liina lya Mukama; era ng'e kigambo kyabwe bwe kyabbanga, gityo buli mpaka na buli kulumbagana bwe byamalibwanga: ⁶ awo abakaire bonabona ab'e kibuga ekyo, abasinga okubba okumpi omuntu eyaitiibwe, banaabiranga engalo ku nte enduusi ekutwiirweku eikoti mu kiwonvu: ⁷ era bairangamu ni batumula nti engalo gyaisu ti niigyo gyayiwire omusaayi guno, so n'a maiso gaisu ti gaguboine. ⁸ Sonyiwa, ai Mukama, abantu bo Isiraeri, be wanunwire, so toganya musaayi ogubulaku musango okubba wakati mu bantu bo Isiraeri. Kale omusaayi gwabasonyiyibwanga. ⁹ Otyo bwe watolangawo omusaayi ogubulaku musango wakati wo, bwewakolanga ekiri mu maiso ga Mukama ekisa. ¹⁰ Bwe watabaalanga okulwana n'a balabe bo, Mukama Katonda wo n'a bagabula mu mikono gyo, n'o batwala ngo mwandu, ¹¹ n'o bona mu mwandu omukali omusa, n'o mwegomba, n'o taka okumukwa; ¹² Kaisi n'o mutwalanga ewuwo mu nyumba yo; naye yamwanga omutwe gwe n'a sala ebidete bye; ¹³ era yayambulanga ebivaalo eby'o bunyage bwe, yabba mu nyumba yo n'a mala omwezi omulamba ng'a kungira itaaye n'o maye: kale oluvanayuma kaisi n'o yingira gy'ali; n'obba naye nga mukali wo. ¹⁴ Awo olwatuukanga, bw'otoomusanyukirenga n'a katono, wamulekanga okwaba gy'ataka; naye tomutundangamu bintu n'a katono, tomukolanga ng'o muzaana, kubanga wamutoowaza. ¹⁵ Omusaiza bw'abbanga n'a bakali babiri, omumu nga muganzi, ogondi nga mukyawe, era nga bombiri bamuzaalira abaana, omuganzi n'o mukyawe; era omwana ow'o bwisuka omuberyeberye bw'abbanga ow'o mukyawe; ¹⁶ awo olwatuukanga, ku lunaku lw'a lisikisya abaana be ebyo by'alina, tafuulanga mwana wo muganzi okubba omuberyeberye, omwana w'o mukyawe, niiye muberyeberye, ng'a kaali mulamu: ¹⁷ naye yaikiriryanga omuberyeberye, omwana w'o mukyawe, ng'a muwa emigabo ibiri ku ebyo byonabyona by'alina: kubanga oyo niikwo kusooka kw'a maani ge; eby'o mubereberye bibye. ¹⁸ Omuntu bw'a bbanga n'o mutaane we omukakanyavu omujeemu, ataikirirya kugondera idoboozi lya itaaye, waire eidoboozi lya maye, era waire nga bamubonererya, nga taikirirya kubawulira: ¹⁹ kale itaaye n'o maye bwe yamukwatanga, ni bamufulumya eri abakaire ab'o mu kibuga kyabwe, n'eri wankaaki w'e kifo kyabwe: ²⁰ ni bakoba abakaire ab'o mu kibuga kyabwe nti omwana waisu ono mukakanyali mujeemu, taikirirya kugondera idoboozi lyaisu; w'e mpisa mbibbi, era mutamiivu. ²¹ Abasaiza bonanona ab'o mu kibuga kyabwe ni bamukubba amabbaale okumwita: otyo bwewatolangawo Obubbiibi okuva wakati wo; kale Isiraeri yenayena eyawuliranga yatyanga. ²² Era omuntu bw'abba ng'a kolere ekibbiibi ekisaanira okumwitisya; ne bamwita, n'o muwanika ku musaale; ²³ omulambo gwe ti gugonanga ku musaale, naye tolekanga kumuziika ku lunaku olwo; kubanga awanikiibwe ng'alaamiibwe Katonda; olekenga okugwagwawalya ensi yo Mukama Katonda wo gy'akuwa okubba obusika. Ensuula