¹ Bakabona Abaleevi, niikyo kika kyonakyona ekya Leevi, ti babbanga na mugabo waire obusika awamu n'e Isiraeri: baalyanga ebiweebwayo ebya Mukama ebikolebwa n'o musyo, n'o busika bwe. ² So tebabbanga na busika mu bagande babwe: Mukama niibwo busika bwabwe, nga bwe yabakobere. ³ Era lino niilyo lyabbanga eibbanja lya bakabona lye babbanjanga abantu, abo abawangayo sadaaka, bw'ebba ente oba ntama, bawenga kabona omukono, n'e mba gyombiri, n'o sebusa. ⁴ Ebiberyeberye by'e ŋaanu yo, eby'e nvinyu yo n'e by'a mafuta go, n'e biberyeberye by'e byoya by'e ntama gyo, wabimuwanga, ⁵ Kubanga Mukama Katonda wo yamwerobozerye mu bika byo byonabyona, okwemereranga okuweereryanga n'e riina lya Mukama, iye n'o bataane be emirembe gyonagyona. ⁶ Era Omuleevi bweyavanga mu lwigi lwonalwona ku njigi gyo mu Isiraeri yenayena, mw'a tyama, n'a iza mu kifo Mukama ky'alyeroboza, emeeme ye nga yeegombera dala okwiza; ⁷ yaweereryanga n'e riina lya Mukama Katonda we, nga bagande be bonabona Abaleevi bwe bakolere, abemerera eyo mu maiso ga Mukama, ⁸ Babbanga n'e migabo egyekankana okulya, obutateekangaku ebyo ebiviire mu kutunda obutaka bwe. ⁹ Bw'o limala okutuuka mu nsi Mukama Katonda wo gy'a kuwa, toyeganga kukola ng'e by'e mizizo eby'a mawanga gadi bwe biri. ¹⁰ Ti wabonekanga gy'oli muntu yenayena abitya mu musyo mutaane we oba muwala we, waire akola eby'o bufumu, waire alagulisya ebireri; waire omulogo, waire omuganga, ¹¹ waire omusawo, waire asamira omuzimu, waire emandwa, waire abuulya abafu. ¹² Kubanga buli akola ebyo wo muzizo eri Mukama: era olw'e mizizo egyo Mukama Katonda wo kyava abbinga mu maiso go. ¹³ Wabbanga eyatuukiriire eri Katonda wo, ¹⁴ Kubanga amawanga gano g'olirya, bawulira abo abalagulisya ebireri n'a bafumu: naye iwe Mukama Katonda wo takuganyirye kukolanga otyo. ¹⁵ Makama Katonda wo alikuyimusirya nabbi wakati wo, ku bagande bo, afaanana nga nze; oyo gwe muliwulira; ¹⁶ nga byonabyona bwe byabbaire bye wasabire Mukama Katonda wo ku Kolebu ku lunaku olw'o kukuŋaaniraku, ng'o tumula nti ndeke okuwulira ate eidoboozi lya Mukama Katonda wange, era ndeke okubona ate omusyo guno omungi, ndeke okufa. ¹⁷ Mukama n'a nkoba nti Batumwire kusa ebyo bye bankobere. ¹⁸ Ndibayimusirya nabbi ku bagande baabwe, afaanana nga iwe; era nditeeka ebigambo byange mu munwa gwe, era alibakobera byonabyona bye ndimulagira. ¹⁹ Kale olulituuka buli ataliwulira bigambo byange by'a litumula mu liina lyange, ndimulanga ekyo. ²⁰ Naye nabbi yatumulanga ekigambo mu liina lyange nga yeetulinkiriirye, bye ntamulagiire kutumula, oba eyatumulanga mu liina lya bakatonda abandi, nabbi oyo yafanga. ²¹ Era bwewatumulanga mu mwoyo gwo nti twategeeranga tutya ekigambo Mukama ky'atatumwire? ²² Nabbi bwe yatumulanga mu liina lya Mukama, ekigambo ekyo bwe kitaiza so ti kituukirira, ekyo niikyo kigambo Mukama ky'atatumwire: nabbi ng'atumwire nga yeetulinkiriirye, tomutyanga. Ensuula