¹ Mukama Katonda wo bw'alizikirirya amawanga, Mukama Katonda wo ensi yaago gy'a kuwa, wabasikira, n'o tyama mu bibuga byabwe n'o mu nyumba gyabwe; ² olyeyawulira ebibuga bisatu wakati mu nsi yo, Mukama Katonda wo gy'a kuwa okugirya. ³ Olyelimira oluguudo, era olisala mu nsalo gy'e nsi yo, Mukama Katonda wo gy'a kusikisya, okubba ebitundu bisatu, buli aita omuntu airukirenga omwo. ⁴ Era eno niiyo ensonga y'oyo aita omuntu yairukiranga omwo n'abba nga mulamu: buli eyaitanga mwinaye nga tamanyiriire, so nga tamukyawanga oluberyeberye; ⁵ ng'o muntu bw'a yingira mu kibira n'o mwinaye okutema omusaale, n'a galula empasa omukono gwe okutema omusaale, empasa n'e wanguka mu mwini gwayo, n'egwa ku mwinaye, n'o kufa n'afa; yairukiranga mu kimu ku bibuga ebyo n'abba mulamu: ⁶ awalana eigwanga ly'o musaayi alekenga okusengererya eyaitire omuntu, omwoyo gwe nga gukaali gusunguwaire, n'a mutuukaku, kubanga olugendo lunene, n'a musumita okumwita; so ga tasaaniire kufa, kubanga tamukyawanga luberyeberye. ⁷ Kyenva nkulagira nga ntumula nti olyeyawulira ebibuga bisatu. ⁸ Era oba nga Mukama Katonda wo aligaziya ensalo yo, nga bwe yalayiriire bazeiza bo, n'a kuwa ensi yonayona gye yasuubizirye okuwa bazeiza bo; ⁹ bwe wekuumanga ekiragiro kino kyonakyona okukikola, kye nkulagira atyanu, okutakanga Mukama Katonda wo, n'o kutambuliranga mu mangira ge bulijjo; Kaisi ni weeyongerera ebibuga bisatu ebindi ku bino ebisatu: ¹⁰ omusaayi ogubulaku musango guleke okuyiika mu nsi yo Mukama Katonda wo gy'akuwa okubba obusika, kityo omusaayi ni gukubbaaku. ¹¹ Naye omuntu yenayena bw'a kyawanga mwinaye, n'a muteega, n'a mugolokokeraku, n’a musumita okumwita n'o kufa n'afa; n'a irukira mu kimu ku bibuga ebyo: ¹² kale abakaire b'e kibuga kye, batumanga ni bamutoolayo, ni bamuwaayo mu mukono gw'oyo awalana eigwanga ly'o musaayi, afe. ¹³ Eriiso lyo ti rimusaasiranga; naye watoolangawo mu Isiraeri omusaayi ogubulaku musango, kaisi obonenga ebisa. ¹⁴ Toijululanga nsalo ya muliraanwa wo, ab'eira gye basimbire, mu busika bwo bw'olisika mu nsi Mukama Katonda wo gy'a kuwa okugirya. ¹⁵ Omujulizi omumu tagolokokeranga ku muntu olw'o butali butuukirivu bwonabona oba olw'e kibbiibi kyonakyona, mu kibbiibi kyonakyona ky'a yonoona: olw'o munwa gw'a bajulizi ababiri oba olw'o munwa gw'a bajulizi abasatu ekigambo kyanywezebwanga. ¹⁶ Omujulizi atali mutuukirivu bw'a golokokeranga ku muntu yenayena okutegeeza ng'a kolere kubbiibi; ¹⁷ abasaiza bombiri abawakana empaka egyo bayemereranga mu maiso ga Mukama, mu maiso ga bakabona n'a balamuli abalibbaawo mu naku gidi; ¹⁸ kale abalamuzi bakemereryanga nayo: era, bona, omujulizi oyo bw'abbanga omujulizi ow'o bubbeyi, era ng'a waayirirya mugande we; ¹⁹ kale mwamukoleranga nga bw'abbaire alowooza okukola mugande we: otyo bwewatolangawo obubbiibi wakati wo. ²⁰ N'abo abasigalawo bawuliranga ni batya ni batakola ate okuva ku biseera bidi obubbiibi bwonabona obuli ng'obwo wakati wo. ²¹ So n'e riiso lyo ti risaasiranga; obulamu bugaitwenga obulamu, eriiso ligaitwenga eriiso, eriinu ligaitwenga eriinu, omukono gugaitwenga omukono, ekigere kigaitwenga ekigere. Ensuula