¹ Tosalanga okubba sadaaka eri Mukama Katonda wo ente waire entama eriku obuleme oba ekitali kisa kyonakyona: kubanga ekyo kyo muzizo eri Mukama Katonda wo. ² Bwe wabonekanga wakati wo, munda w'o lwigi lwonalwona ku njigi gyo Mukama Katonda wo gy'a kuwa, omusaiza oba mukali, akola ekiri mu maiso ga Mukama Katonda wo ekibbiibi, ng'a sobya ku ndagaanu, ³ era ng'a yabire n'a weererya bakatonda abandi n'a basinza, oba isana, oba mwezi, oba ku igye ery'o mu igulu, bye ntaalagiire; ⁴ ni bakukobera era ng'o kiwuliire, kaisi onyiikiranga okubuulirirya, era, bona, bwe kyabbanga eky'a mazima, ekigambo ni kitabuusibwabuusibwa, ng'e ky'o muzizo ekiri kityo kikolerwa mu Isiraeri; ⁵ kaisi n'o fulumyanga omusaiza oyo oba mukali oyo, abakolere ekigambo ekyo ekibbiibi, awali enjigi gyo, omusaiza oba mukali; kale wabakubbanga amabbaale bafe. ⁶ Olw'o munwa gw'a bajulizi ababiri oba bajulizi basatu, ayaba okufa bweyaitibwanga; olw'o munwa gw'o mujulizi omumu taitibwanga. ⁷ Omukono gw'a bajulizi niigwo gwasookanga okumubbaaku okumwita, omukono gw'abantu bonabona kaisi ni gumubbangaku: Otyo bwewatoolangawo ekibbiibi wakati wo. ⁸ Bwe wabbangawo ensonga ekulema okugisalira omusango, nga bavunaana omusaayi n'o musaayi, nga bavunaana ensonga n'e nsonga, era nga bavunaana omwigo n'o mwigo, nga bawakanira ebyo munda w'e njigi gyo: kale wagolokokanga, n'o yambuka mu kifo Mukama Katonda ky'alyeroboza; ⁹ n'o iza eri bakabona Abaleevi, n'eri omulamuzi yabbangawo mu naku gidi: n'o buulya; era ibo bakulaganga ensala y'o musango: ¹⁰ weena wakolanga ng'o musango bwe gwabbanga, gwe bakulaganga nga bayema mu kifo Mukama ky'a lyeroboza; era wakwatanga okukola nga byonabyona bwe byabbanga bye bakwegeresya: ¹¹ ng'e iteeka bwe lyabbanga lye bakwegeresyanga, era ng'e nsala bweyabbanga gye bakukoberanga, wakolanga otyo: tokyamanga okuva mu musango gwe bakulaganga okwaba ku mukono omulyo, waire omugooda: ¹² Era omuntu yakolanga eby'e kyeju, nga tawulira kabona ayemerera eyo okuweererya mu maiso ga Mukama Katonda wo, oba mulamuli, omuntu oyo yafanga: era watoolangawo obubbiibi obwo mu Isiraeri. ¹³ Era abantu bonabona bawuliranga ni batya, ni batakola ate bye kyeju. ¹⁴ Bw'olibba ng'otuukire mu nsi Mukama Katonda wo gy'a kuwa, n'o girya, n'o tyama omwo; n'o tumula nti nateekerewo kabaka okunfuga, era nga n’a mawanga gonagona aganeetoloire; ¹⁵ tolekanga kuteekawo oyo okubba kabaka okukufuga, Mukama Katonda wo gw'a lyeroboza: Omumu ku Bagande bo gw'o liteekawo okubba kabaka okukufuga: ti kisa iwe okuteekawo munaigwanga okukufuga, awabula mugande wo. ¹⁶ Kyooka teyeefuniranga mbalaasi nyingi, so tairyangayo bantu mu Misiri, kaisi yeefunire embalaasi enyingi: kubanga Mukama yabakobere nti Temwirangayo ate mu ngira eyo okuva atyanu. ¹⁷ So teyeefuniranga bakali bangi, omwoyo gwe gulekenga okukyuka: so teyeefuniranga feeza nyingi inu waire zaabu. ¹⁸ Awo olulituuka bw'alityama ku ntebe y'o bwakabaka bwe, alyewandiikira eiteeka lino mu kitabo, ng'a litoola mu ekyo ekiri mu maiso ga bakabona Abaleevi: ¹⁹ era kyabbanga gy'ali, era yakisomangamu enaku gyonagona egy'o bulamu bwe: ayege okutya Mukama Katonda we, okwekuumanga ebigambo byonabyona eby'e iteeka lino n'e biragiro bino okubikolanga: ²⁰ omwoyo gwe gulekenga okugulumizibwa ku bagande be, era alekenga okukyama okuva mu kiragiro okwaba ku mukono omulyo waire omugooda: Kaisi awangaale enaku nyingi mu bwakabaka bwe, iye n'a baana be, wakati mu Isiraeri. Ensuula